Read Lamkang PAUPHUWN 5 Bible Online

PAUPHUWN 5 - Lamkang bible

PAUPHUWN 5

¹Ungta tu ku onna leenni kuk ong Mma khut chang ktongtha mdu mdilli mdo kjit dok, kbiinam rek tikheu vi mdo nam dok jiik kjul khat neiji deinu.

²Ungu ruktang lang lang Waan tamsii ngi krowl kparyaa langlang ngi “Jik kjul pvangda ungu kbiinam rek kupkuira kurhui ku ka am da?” Dida kthe khuw kaksam neiji aryaa nu.

³Ungbi Parwaan thang daat don dulti leen daat don mata dulti rilki ku mii khat lee ngi jiik kjul ava kapvang ra mdit mata mthungki ava ksuwra kapchaang ku khat lee ame.

⁴Ungbi jiik kjul pvangda ungu mthungki ksuwra kurhui ku khat lee mphaak ma thungta neia kdung ngi ṭap chnu.

⁵Au dilli kver rek thungki khat ava ngi ki hin theda, “ṭap ma, asuw, Judah chati thungki, humpii smang, Devid arjung ava ngi jiik kjul ungta mthungki kbiinam rek tikheu ava mdo pvan nrangki mapchaan dokka.”

⁶Ungta mku onna leh kring saa rek plii arlakki kver rek mlaiṭim mi marki tikheu ungu mmik tikheu pum, te eayo dok hep daat Jaonao krip daat neiji deinu, ava dultipaam mkheng thu mdo sii Isowr Pthla rekka tikheu lam.

⁷Ungta Mma ngi vangda ungu tku onna tun ni kuk ong Mma khut chang ktongki jiik kjul ava louda.

⁸Ungu Mma ngi jiik kjul ava mlo thungta kring saa rek plii ungta kver rek som knii lei plii ngi Jaonao ava maiṭhuwm mi kuwn lamda, mii pum ktaiji tingsai khat khat sin lamda, kintiing rek do ṭhil chaak ava mkrim kdi langlang mdo pkaakki kdim jeering tleengbeel ava amda.

⁹Ungta mmaanni laa ren kthe ngi the lamda, “Jiik kjul ungu kbii namrek louda kapvang ava Nang daat pti, mleija Nang nga a eayou lamda ungta chati leh pau ungu, mii rek ungta chati mkheng thungki Nah ahii ngi mren chaan ti,

¹⁰ungu mmaan ava neenki Isowr hintha, Kruwngpaam ki thiimpu rek ra seem tinu, ungta mmaanni dulti tunni kpaal na lamra.”

¹¹Au dilli tku onna ava kloi kring saa rek leh kver rek punpii ki punpii ungu pun ki pun Waan tamsii rek krowl neiji deinu ungu taryaak ruk aryaanu.

¹²Krowl kparyaa ngi the lamda, “Rutan, ungta alrou, lousing ungu ruktang sii ungta kunlor ungu, laarnee ungta suwṭhat karlaang, ungu mdo eayo dok Jaonao Mma ngi kurhui sii a!”

¹³Ungta Parwaan ki ungu dulti leenki ungta dulti ril ki ungu truwn thungki mthungki mkheng leh mdo seem khim khaiji hanto mdo the neiji aryaa nu, “Tkonna tun ni kuk ong Mma hin tha ungta Jaojao ava hinni kpanpaak ungu kakjat ungta laarnee ungu ruktang sii ava kṭuw knai liit kma amso!”

¹⁴Ungta kring saa rek plii ngi theda, “Amen!” Ungu kver rekki kuwn lamda luwbuk chlamda.