Read Lamkang PAUPHUWN 6 Bible Online

PAUPHUWN 6 - Lamkang bible

PAUPHUWN 6

¹Tunva Jaonao ava ngi kbiinam tikheu thungki khat mdo pvan ava neiji deinu, ungta kring saa plii thungki khatti, khuw kippri krowl khat heppi “Arvang” dida mdo the neiji aryaa nu.

²Ungu neiji dei nu, ungta asuw in, skowl kpowl khat, ungu kthou ava ngi jai khat sinda; ungta laar luwkhum khat Mma hin piida, ungu kapchaang slii ngi kapchaang rang ki chet da.

³Mma ngi miknit na kbiinam mpvan thungta, miknit na kringsaa ava ngi theda, “Arvang!” dida mdo the neiji aryaa nu.

⁴Ungta ksen reirui, ktlok skowl khat thuwk da; kthou ava dulti tuwn ki kdaai mdolo pthii nrangki rot pik da, miirekki khat leh khat mkursur yo nraan ki; Mma ava kaang ksaang klin khat pii da.

⁵Mma ngi mukdum na kbiinam mpvan thungta, mukdum na kring saa ngi “Arvang!” dida mdo the neiji aryaa nu. Ungu, ungta asuw in, skowl kvom khat neiji deinu, ungta kthou ava khut thung ngi mdo owl nra sinda.

⁶Ungta kring saa rek plii arlakki krowl khat heppi, “Kehu sear khatti dinari arjaa khat, ungu tujun sear kdummi dinari arjaa khat; pdainu thao leh rik rou dii ava thowng ma!” dida mdo the neiji aryaa nu.

⁷Mma ngi miplit na kbiinam mpvan thungta, kring saa miplit na ngi “Arvang!” dida mdo the neiji aryaa nu.

⁸Ungta ungu asuw in, skowl kbal phet phut khat neiji deinu, ungu ava kthou miing ava kdiyou, ungu sim mi mdil ṭoida, ungta mmaan ava dultipaam sruk plii thungki khat ava hin rutan piida, kaang ksaang ngi mdo eayo nraan, ungu poitham ungta omlai ungu dulti tunki nowm saa ngi mdo eayo nraan ki rutan pii lamda.

⁹Mma ngi mparngat naki kbiinam mpvan thungta, Isowr pauna lei ungu mmaanni sakhi mdo hur lei inni mdo eayo dok in mmaan ki raothla rek ava suwlbuwr tingi neiji deinu.

¹⁰Krowl kparyaa langlang ngi mmaanni owng lam da the lamda, “O kinreel siingi Kchiir, ungta mkindit ki Mukpu, dultipaam thu ka am rek tun kṭewl ti don, neen ki hii mphuw ado talo pik nraanna tak pang ksot rangda?”

¹¹Ava dilli mmaanna phrik kturrown khat khat pii chlamda ungta sra owr mdo kurthut ṭhi in ungu mu u mnao rek mmaan ava lulu ngi ke eayou rangki mdo tlot slii in msing ava mkurkhum du khim khai, mpha mruk tummi mkarngat bong chaak nraan Mma ngi theda.

¹²Mma ngi mtruk na kbiinam mpvan thungta, neiji deinu, ungu asuw in, klin langlang ringnaang thuwk da; ungta kniw ava saavun lulu vom chda, thla kukkloi peeng ava hii hep daatti sen chda.

¹³Ungta tirthli kraang ngi kduwt ding ke er mdo pṭut tir pthii lulu ngi, parwaan ki bursi ava dulti tun tla tir chda.

¹⁴Parwaan ava jiik kjul heppi kjul dok da, ungta lown leh prahpaam khim khaija ma amna mun thungki punthot pthii da.

¹⁵Au dilli dultipaam ki kruwng rek, paam kpu rek, rawlmii ki ber ksu rek, ungu suwang rek, ruktang rek, suwk leh kintek mii pum ktai ava khur thung ngi kurdowl lamda, ungu lown ki lownpii rek arlakki kurdowl lamda.

¹⁶Lown rek leh lownpii rek hin own lamda, “Neen kleen inni mhai tlaak pik inra tku onna tun ni kuk ong Mma maiṭhuwm ki, ungta Jaonao plung thit rang thungki mhai dowl chaan.

¹⁷Mleija Mmaan plung thit ki Nit klin langlang kthleng nga, ungu ava maiṭhuwm mi ku krip pchaang rang da?”