Read Lamkang PAUPHUWN 8 Bible Online

PAUPHUWN 8 - Lamkang bible

PAUPHUWN 8

¹Jaonao vi mtikheu na kbiinam mpvan thungta, Parwaan ava ṭhang mṭim arveel thu rim kdi am chda.

²Au dilli Isowr maiṭhuwm mi krip Waan tamsii rek tikheu, ungu mmaan hinni peengkhul tikheu mdo piik lam neiji deinu.

³Ungta krim kdi langlang tapkaak na jeering tleengbeel kdilsuwn ksin ktlok Waan tamsii khat suwlbuwr betha rip daat da; ungta Mma ngi tku onna maiṭhuwm mi ka am jeering suwlbuwr tunni kintiing rek mkheng doṭhil chaak ava tu mdo purchuwmra, Mma hin mkrim kdi langlang ava pii lamda.

⁴Ungta Waan tamsii khut tunki meikhut ava ngi kintiing rek do ṭhil chaak tu kilṭhi ngi Isowr maiṭhuwmmi hanthlut da.

⁵Au dilli Waan tamsii ava ngi tleengbeel kdilsuwn ava louda suwlbuwr thungki mei louda pdim dok thida dultipaam thu var da, ungbi kdung ngi pṭeek kpuwk krowl amda, kowl plek da, ungu ringnaang thuwkda.

⁶Tunva peengkhul tikheu ksin Waan tamsii rek tikheu vi, mpeengkhul in kdum rangki kirsim lamda.

⁷Ru kri verki Waan tamsii ngi peengkhul dumda, ungbi ṭil leh mei ava hii tu kurchuwmmi dulti tun tla da; ungta dulti sruk kdum thungki khat ava kbung chda, ungu ding rek ruk sruk kdum thungki khat kbung chda, ungta nowm arnaa ke er mkheng nga kbung chda.

⁸Miknit na Waan tamsii ngi peengkhul ava dumda, ungbi meiji kṭuwng slii lown kparthaang langlang hep daat ava truwn thu var pthiida.

⁹Ungbi truwn ava sruk kdum thungki khat hii kur owl chda, truwn thungki kring tuwlva khim khaija diyou chda, ungta arkuwngpii sruk kdum thungki khat ava eakrep da.

¹⁰Mukdum na Waan tamsii ngi peengkhul dumda, ungbi Parwaan ki bursi klin langlang khat meila choi heppi kṭuwng ava arjun tla da, ungbi kreng sruk kdum thungki khat ungta diitlaang kphul rek khim khai tunni arjung tla da.

¹¹Bursi miing ava ding arkit mdo dit ungta dii sruk kdum thungki khat ava arkit kur owl chda, ungu ava mkhat reen leiji dii knee mii knempok diyou chda.

¹²Miplit na Waan tamsii ngi peengkhul dumda, ungbi kniw sruk kdum thungki khat, ungu thla sruk kdum thungki khat, ungta bursi sruk kdum thungki khat ava prei da, ava leiji mar awng sruk kdum thungki khat ava jiing chda, ungu suwnki kleng sruk kdum thungki khat leng mda, anto lulu ngi jaanki sruk kdum thungki khat ava ame.

¹³Au dilli pliim ava ngi Parwaan ṭimmi kjuwng neiji deinu, ungu krowl kparyaa khatti owngda, “Waan tamsii rek kdummi peengkhul kdum rangki mkirsim lei inni, dulti tunni ka am mii rek ava tija thu msuwkthi chdaatta! msuwkthi chdaatta! msuwkthi chdaatta!”