Read Lamkang PAUPHUWN 9 Bible Online

PAUPHUWN 9 - Lamkang bible

PAUPHUWN 9

¹Ungta mparngat na Waan tamsii ngi peengkhul dumda, ungbi parwaan ki bursi khat dulti tunni arjung ktla neiji dei nu, ungu Mma ava ti knung rel khur ner ava chungkam mhin pii da.

²Mma ngi ti knung rel khur ner ava pvang da, ungta mangmei khat hep daat khur ner thungki meikhut arhan thuwk da, ungbi kniw leh parwaan ava khur ner thungki meikhutti pum jiing ngi jiing chda.

³Au dilli mei khut thungki khaopruwn rek dulti tunni thuwk da, ungu mmaan ava dulti tunki ruwlparthi rek rutan hep daat rutan ava pii lamda.

⁴Dultimii ava mapchel tunni Isowr ri kbii mdo namma rek kma donle, dulti tunki arnaa kmowng ke er do khim khai mdit mata dinglung haikhe lu chaat sul mdo purnul ma nraan mhin inni theda.

⁵Mmaanni ke eayou kma thla parnga lik thu suwk mdo pthuw nlamra rot pik lamda, ungta mmaan suwk pthuw ava ruwl parthi ngi miilai mdo pkee hep daatti suwk pthuwk lamda.

⁶Hava nit rek thung ngi mii rekki mdiyo nraan kthlaam lamra ungu pha chlam nime; mmaanni kdiyou nuwm lamra, ungta kdiyou ava mmaan hinki kchen chra.

⁷Tsut ndaat va khaopruwn rek ava rawl karnaak ṭhira kirsim skowl rek hep daat lam; mluw leen thaanva jeering luwkhum lulu; mmai in ava dultimii mai hep daat lam.

⁸Msam inna snu rek sam hep daat, ungu mhaa inna humpii smang haa hep daat lam.

⁹Thiir plung arkuw hep daat klip thloi lamda, ungta mapthla in archaang nga skowl rek knempokki rawl karnaa kalrei ava archaang hep daat lam.

¹⁰Marmei inna ruwl parthi lulu, ungu mkruw ka am, ungta thla parnga lik thu miirek suwk mdo pthuw nraanki rutan ava marmei leen inni ka am.

¹¹Mmaan tunni kruwng lulu tiknung rel khur thungki tamsii khat thloi lamda; mma miing nga Hebru pauvi Abaddon mdo dit Grik pauva Apollyon mdo dit.

¹²Ru kri reepki suwthit na ava kvei dokka; asuw in, suwthit na knii thleng mlai.

¹³Au dilli mtruk na Waan tamsii ngi peengkhul dumda, ungbi Isowr maiṭhuwm thungki jeering suwlbuwr thungki arkii rek plii thungki krowl khat neiji aryaa nu.

¹⁴Peengkhul kthloi mtrukna Waan tamsii hin theda, “Euphrats kreng klin langlang thung ngi mdo bowl daat Waan tamsii rek plii ava apthla dok lam.”

¹⁵Ava leiji ṭhang, nit, thla, kum tummi mdo purthlon dok Waan tamsii rek plii ava dulti sruk kdum thungki khat ke eayou ra pthla da.

¹⁶Skowl ktuwng rawlmii rek msing ava vei knii thung ngi pun sowm sowmmi pun sowm kdingi neiji aryaa nu.

¹⁷Ungta nei kmik kleng thu skowl rek ava hanto deinu: Ktuwng rek plung arkuw ava saphire lung mman klu haikok reirui, ungu kantup pditti mei pdit hep daat lam, ungta skowl rek luw ava humpii smang rek luw hep daat, ungu mei, meikhut leh kantup ava mmaan ner thungki thuwkda.

¹⁸Hava tngana rek kdum mi dultimii sruk kdum thungki khat ava mner in thungki kthuwk mei ungta meikhut ungu kantup ava ngi eayou da.

¹⁹Mleija skowl rek rutanna mner in leh marmei thuwnki kthuwk; mmaan armeija pruwl rek lulu, mluw pum, ava ngi miirek sul purnul lamda.

²⁰Hava tngana rek do eayo ma dultimii rek mkekleem va khut dosak tarnam ungu khut do sak pthla rek leh jeering ungta jeering kpowl ungu thiir ksen ungta ding lung, kdei pchaang kma, karyaa pchaang kma mdit mata kchet pchaang kma luw kbuk thungki mmaanni down liit lamme ungu ava thungki plung ren hur lamme.

²¹Mdit mata mmaanni mii ke eayou thungki, mit trang nong thungki, mata pang turkuiji kturkui cha thungki, ungu kup pru thungki plung ren hur liit lamme.