Read Lamnso Kèʼlo 1 Bible Online

Kèʼlo 1 - Lamnso bible

Kèʼlo 1

¹Yì‑iì dzə̀ fó mbìy, Nyùy‑iì bòm yúv wùn à nsay.

²Nsay‑iì dzə̀ kilàsir, a dzə ji nə̀ʼkìkì, e kfə̀n a dzə kisáŋ, a ndzə́v ye wiyí súm kitú ke nsay kidzə̀m, a virə́ʼ ví sə́n ji cùm, a Kiyoy ke Nyùy ki ghán e kitu ke ndzəv.

³Nyùy nèn sùúy jii, «Ráne wáa dzə.» Yí ku nèn a dzə.

⁴Wù leéy rán yee shooy, a yí dzə̀ e juŋ feyì. Wù nèn jàvsìn rán fo ndzə ye sənér,

⁵e yòŋ rán ji «shùy», e yòŋ ndzə ye sənér ji «vitsə́ʼ». Á kijàvndzə wùn à ŋkuùr[1] fo kishiíy ké mbìy ki.

⁶Nyùy nèn sùúy jii, «Kikum ki wáa dzə ke kí javsìn ndzə́v, é yí wáa dzə mbìv sibaà, é yímóʼó wáa dzə e yuv, é yímóʼó wáa dzə fo sar.»

⁷Wù nèn fèr kikum, kí jàvsìn ndzə́v, yímóʼó kfə́n é yuv, yímóʼó gòʼ e nsay. Kí ku nèn a dzə bèy.

⁸Nyùy nèn yòŋ kikum ke kí‑iì jàvsìn ndzə́v kiy ji «yúv». Á kijàvndzə wùn à ŋkuùr fo kishiíy ke kí meen ji baà.

⁹Nyùy nèn sùúy jii, «Ndzə́v ye yí dzəə̀n é sar yuví báʼtí kirə́ʼ kimòʼón, é kirə́ʼ ke yumér kí yénsín.» Kí ku nèn a dzə bèy.

¹⁰Wù yòŋ kirə́ʼ ke yumér kiy ji «nsay», e yòŋ ndzə́v ye yí‑iì baʼtin rəy ji «rìbà ndzə̀v[2]». Nyùy leéy, e yèn, a kí dzə̀ kijuŋ feyì.

¹¹Nyùy kfən sùúy jii, «Nsay fəə́r á kfəə́ se vifa ve teʼèn ví, é vímóʼ ví wáa fo ŋgoòy, é vicí ve ví koom vi koóm, a fo báŋ si, kee shó mo kí dzəə̀n.» Kí ku nèn a dzə bèy.

¹²Nsay ku nèn fə̀ə́r vifá jeéy jeéy. Vímóʼ ví ve ví fó ŋgoòy, à vicí ve ví koom vi, kee shó mo kí dzəə̀n. Nyùy leéy, e yèn, a kí dzə̀ kijuŋ feyì.

¹³Á kijàvndzə wùn à ŋkuùr fo kishiíy ke kí meen ji taár.

¹⁴Nyùy nèn sùúy jii, «Vikaʼày ví wáa dzə e yuv, e fíʼ jàvsìn shùy fo vitsə́ʼ ví, é ví wáa dzə visəəm ve ví din ghán sé vinyò, din sa vishiíy wùn à viyá vi.

¹⁵Vikaʼày vin vi lóo dzə e yuv, é ví wáa ban, a fo rán e kitu ke nsay.» Kí ku nèn a dzə bèy.

¹⁶Nyùy nèn fèr lúm se vikàʼày sibaà, ke kuʼùn kí wáa ban e shùy, ke terí kí wáa ban vitsə́ʼə́. Wù fèr sa mejiy.

¹⁷Wù‑uù lèm vikaʼày vin e yuv ji ví wáa ban, a fo rán e kitu ke nsay.

¹⁸Kímóʼ kí wáa ban e shùy, kímóʼ kí wáa ban vitsə́ʼə́, é ví kfə́n a jàvsìn ndzə ye ranén fo ye sənér. Nyùy leéy, e yèn, a kí dzə̀ kijuŋ feyì.

¹⁹Á kijàvndzə wùn à ŋkuùr fo kishiíy ke kí meen ji kweè.

²⁰Nyùy nèn sùúy jii, «Vifá ve ŋeʼèn ví rún é ndzəv sí, é menə́n mè wáa dzə, a feŋ e yuv.»

²¹Nyùy nèn bòm nyám se kuʼkìn sí se sí yii dzə́ e ndzəv, e bòm sə́ si, à vifá vidzə̀m ve ví yii dzə́ e ndzəv ví, kfəə́ si kfəə́ si, e kfə̀n bòm menə́n medzə̀m, kfəə́ si jeéy jeéy. Nyùy leéy, e yèn, a kí dzə̀ kijuŋ feyì.

²²Wù nèn səə̀vì vifá vee shooy vidzə̀m ji veé ndzəv ví wáa fəə́r kiŋgoòy kév, a kùʼ, e rùn ndzə́v sidzə̀m, é menə́n mè wáa kùʼ kitú ke nsay kidzə̀m.

²³Á kijàvndzə wùn à ŋkuùr fo kishiíy ke kí meen ji tàn.

²⁴Nyùy nèn sùúy jii, «Nsay fəə́r á vifá ve ŋeʼèn ví, kfəə́ si kfəə́ si, veé laʼ wùn à veé kwaʼ vi, ve kuʼkìn ví wùn à ve ŋaŋrìn ví.» Kí ku nèn a dzə bèy.

²⁵Wù nèn fèr nyám seé kitu ke nsay sidzə̀m, seé laʼ wùn à seé kwaʼ si, se kuʼkìn sí wùn à se ŋeerín sí, kfəə́ si kfəə́ si. Wù leéy, e yèn, a kí dzə̀ kijuŋ feyì.

²⁶Nyùy nèn sùúy jii, «Vèsən fer wíri e vèsə́n nshwìnín, aá wáa dzə moo vèsən, e yiì, aáwune wáa ker vitaáví vé a leéy sə́ si wùn à menə́n mè, à nyám seé laʼ wùn à seé kwaʼ si, à vifá vidzə̀m ve ví ŋaŋrì e nsay, e kfə̀n a saʼ kitú ke nsay kidzə̀m.»

²⁷Nyùy nèn bòm wír e wun nshwìnín. Wù bóm áwune a dzə̀ lumèn wùn wiíy. Wù bóm, á wáa dzə rú moo wun.

²⁸Nyùy nèn səə̀vì áwune, e sùúy jii, «Vèn wáa dzəə́, a kùʼ, e rùn kitú ke nsay. Vèn kfə́n a saʼ kitú ke nsay, a ker vitaáví vé a leéy sə́ si wùn à menə́n mè, à vifá ve ví ghán e kitu ke nsay vi vidzə̀m.»

²⁹Wù kfən sùúy jii, «Vèn yén ri mbà, fo vifa ve ví dzəə̀n é kitu ke nsay, m fò ne ven ŋgoòy se vifa kfəə́ si kfəə́ si wùn à vicí ve ví koom vi, kfəə́ si kfəə́ si, ji vifá vén vé yi.

³⁰Yii bèy, fo nyám si sidzə̀m, menə́n wùn à vifá vidzə̀m ve ví ŋeʼ, ghán e kitu ke nsay vi, m nen fò a dzə̀ vikwiíy wùn à vav se vifa si ji vév vee viyíkìr.» Kí ku nèn a dzə bèy.

³¹Nyùy leéy vifá vidzə̀m ve wù‑uù fèrìn, a ví dzə̀ vijuŋ e mbòómbòŋ. Á kijàvndzə wùn à ŋkuùr fo kishiíy ke kí meen ji ntuùfú.