Read Lamnso Kèʼlo 11 Bible Online

Kèʼlo 11 - Lamnso bible

Kèʼlo 11

¹Yì‑iì dzə̀ é ghan símóʼ sí fó mbìy, a wír veé kitu ke nsay adzə̀me‑eè kér lám e mòʼón, súŋnin dzə́ə e mòʼón.

²Mo vé‑eè ghán ghanén é mbìv wòŋ yee fo shùy yii tó, á nèn dù, e bvə̀ysín e mboʼ yìmòʼ é nsay Shinar,[36] e nèn dzə̀ʼə̀m fo.

³Á nèn wìy lò, e sùŋnín jii, «Vèn wiy, é vèsən tsə́m nsay, e tòn, é yì táv kijuŋ.» Á nèn a ker nsay ye vé‑eè tònèn rə̀y e kiliŋ ke tiy. Aá kfə̀n kér sa kunta woo túŋ fó nsay e kiliŋ ke kishàʼàr.

⁴Áwune nèn kfə̀n sùúy jii, «Vèsən báʼtí, e bòm ŋkàlaʼ yèsən wùn à kirùmèn ki, é kí dar, e kòʼ, e mèé e ntoò yùv, é wíri fiʼ kìíy vèsən ji antav. Vèsən yii bèy, é la vèsən yòʼ dzəə tàʼrí e kitu ke nsay.»

⁵NYÙY TÀR nèn wìy lò, e sə̀ʼə́y fo yuv ji wun yén á ŋkàlaʼ wùn à kirùmèn ke wíri bómé e sí rəə́.

⁶Wù yén, e sùúy jii, «Kee ben á ka! Wír vìne dzə̀ amòʼón, aá súŋnin lám e mòʼón. Kin ki kù dzə̀ə́ keʼ fo kinyò ke áwune taʼ, e wìy mùm. A bó kinyo kímóʼ kí yòʼ dzəə́ wìy ghaʼ áwune ke á wayin ji á ku yiì.

⁷Vèsən sə́y fó, e tòvsìn lám wóv, é la wìr wùmòʼ yòʼ a yu kinyo ke wùmòʼ suuyì.»

⁸Á bèy, NYÙY TÀR nèn tàʼár áwune kitú ke nsay kidzə̀m, kibaʼrì ke ŋkàlaʼ rə̀y ki tiím.

⁹Á kinyo ke kí‑iì yiìn, bo á wáa yòŋ yír ŋkàlaʼ yee shooy ji Babel[37], bìʼ fo dzəə̀n fó, fo Nyùy‑iì tòvsìn lám wìr dzə̀m, e nèn tàʼár áwune kitú ke nsay kidzə̀m.

¹⁰Rám Sheme rə̀ne. Shem‑eè mèé kiyá wií, e nèn dzə̀ə́ Arpakshad, a sì viyá vibaà mo ndzə́ví‑iì màyìn fó kitu ke nsay.

¹¹Mo wù dzəən Arpakshad bèy, e kfə̀n dzə̀ʼə̀m viyá vímóʼ ví ghii tàn, e dzə̀ə́ wón ámóʼó vee vilum wùn à vee vikìyí.

¹²Arpakshad dzə̀ʼə̀m kiyá nshòv sitàn e mtaár, e dzə̀ə́ Shela,

¹³e kfə̀n dzə̀ʼə̀m viyá vímóʼ ví nshòv sitaár e ghiì kweè (403), e dzə̀ə́ wón ámóʼó, vee vilum wùn à vee vikìyí.

¹⁴Shela dzə̀ʼə̀m kiyá mtaár, e dzə̀ə́ Eber,

¹⁵e kfə̀n dzə̀ʼə̀m viyá vímóʼ ví nshòv sitaár e ghiì kweè (403), e dzə̀ə́ wón ámóʼó vee vilum wùn à vee vikìyí.

¹⁶Eber dzə̀ʼə̀m kiyá nshòv sikweè e mtaár, e dzə̀ə́ Peleg,

¹⁷e kfə̀n dzə̀ʼə̀m viyá vímóʼ ví kishóv mtaár e ghiì kweè (430), e dzə̀ə́ wón ámóʼó vee vilum wùn à vee vikìyí.

¹⁸Peleg dzə̀ʼə̀m kiyá mtaár, e dzə̀ə́ Reʼu,

¹⁹e kfə̀n dzə̀ʼə̀m viyá vímóʼ ví nshòv bvə̀ʼə̀ e ghiì baà (209), e dzə̀ə́ wón ámóʼó vee vilum wùn à vee vikìyí.

²⁰Reʼu dzə̀ʼə̀m kiyá nshòv sibaà e mtaár, e dzə̀ə́ Serug,

²¹e kfə̀n dzə̀ʼə̀m viyá vímóʼ ví nshòv saàmbà e ghiì baà (207), e dzə̀ə́ wón ámóʼó vee vilum wùn à vee vikìyí.

²²Serug dzə̀ʼə̀m kiyá mtaár, e dzə̀ə́ Nahor,

²³e kfə̀n dzə̀ʼə̀m viyá vímóʼ ví ghii baà (200), e dzə̀ə́ wón ámóʼó vee vilum wùn à vee vikìyí.

²⁴Nahor dzə̀ʼə̀m kiyá nshòv bvə̀ʼə̀ e mbaà, e dzə̀ə́ Tera,

²⁵e kfə̀n dzə̀ʼə̀m viyá vímóʼ ví nshòv bvə̀ʼə̀ e ghvə̀m e wiì (119), e dzə̀ə́ wón ámóʼó vee vilum wùn à vee vikìyí.

²⁶Tera dzə̀ʼə̀m kiyá msaàmbà, e dzə̀ə́ Abram wùn à Nahor, à Haran.

²⁷Rám Teràa nén a dzə jii, Tera‑aà dzə̀ tàr à Abram wùn à Nahor, à Haran. Haran‑eè dzə̀ tàr à Lot,

²⁸e nèn lò, e kpù é Ur fo vé‑eè dzəən wun, e wòŋ Kaldea, a tàr wov dzə̀ə́ sho.

²⁹Abram koóy wiíy, a yírí dzə̀ Saray. Nahor nèn kòóy sa və́ə, a yírí dzə̀ ji Milka. Milka və̀n‑eè dzə̀ wan Haran, a fər Milka dzə̀ Iska.

³⁰Saray‑iì dzə̀ kár, a bó wù yòʼ‑oò ló a ker wán.

³¹Tera nèn lò, e lì Abram woo wán və, à Lot woo wan Haran, à Saray woo wiíy wan və Abram, wùn áwune lò fo Ur, e wòŋ Kaldea foo fèy, a dù e wòŋ Kanan. Á meé é Haran, e nèn gòʼ fo.

³²Tera nèn wìy kpù fó. Viyá ve Tera vidzə̀m vi‑iì dzə̀ nshòv sitàn e ghiì baà (205).