Read Lamnso Kèʼlo 12 Bible Online

Kèʼlo 12 - Lamnso bible

Kèʼlo 12

¹NYÙY TÀR nèn lò, e yòŋ e Abram jii, «Màʼtì woŋ wóo wùn aàfə́r vée, à láʼ tàr woné, e dù e wòŋ wo m wíy dìn e wò.

²M wíy yiì, áà wáa ker kfəə́, é yí wìy a dzə kitúm ke kuʼùn kí. M wíy bùʼ wò, e yiì, é yír yée wáa dzə yír ye kuʼùné, áà wáa dzə wir kisəə̀vì fo wíri.

³M wíy a səə̀vì wír ve á ghvə́m wò, a shov wír ve á roʼ wò. M wíy shaà fo wò, e səə̀vì rám yeé kitu ke nsay e dzə̀m.»

⁴Abram ku nèn lò mo NYÙY TÀR‑iì suuyin shó, e lòo lò, Lot lò sa wùn wun. A Abram‑eè sì kiyá nshòv sitàn e msaàmbà (75) e ghan se wù‑uù lo fo Haran sìn.

⁵Wù‑uù lì Saray woo wíiy və wùn à Lot woo wan fər və, à kéŋ ye vé‑eè kooyin é Harane e dzə̀m, e kfə̀n lì akwàn ve vé‑eè kooyin sá fo, wùn áwune lò, a dù e wòŋ Kanan. Áwune meé fó,

⁶e dù, e mèé e kirə̀ʼ kee fo kicí kee *oak kímóʼ kí‑iì tíyí, aá yoŋ ji keé More,[38] a kí‑iì dzə̀ é ghaa ntèʼ yee Shekem. Yì‑iì dzə̀ é ghan sin, a wír veé Kanane‑eè dzə̀ é wòŋ foo fèy.

⁷NYÙY TÀR nèn lò, e wìy fo Abram wùn, e sùúy sho jii, «M yíi fo woŋ və̀n e rám yée.» Mo NYÙY TÀR‑iì wìyìn fo wun wùn é kirə̀ʼ fóo fèy, wù nèn bòm *kíy cù NYÙY TÀR fó.

⁸Wù nèn yiì lò fo fo, a dù e mbìv agwan ve á dzəə̀n é ghaa ntèʼ yee Betel, e mbìv yee fo shùy yii tó. Wù meé fó, e tàm kibàn kfə́ é kintìntìn ke Betel wùn Ay. Betel wáa dzə e mbìv yee fo shùy yii nəə, a Ay dzə̀ é mbìv yee fo shùy yii tó. Wù kfən bòm kíy cù NYÙY TÀR, a cù wun, a yòŋ yír rə́ fó.

⁹Abram ku nèn a ghan, a lò fo fèy, a dù fèy, a səy səyín é mbìv yeé tsən ye á yoŋ ji Negev[39].

¹⁰E ghan sin, jìŋ nèn lò, e koò é Kanan e dzəə ye tavín, e yiì, Abram nyéŋ səə́ və̀n, a dù e wòŋ Ejiv ji wun dzəʼti á fo shintàm.

¹¹Wù lòo meʼ Ejiv, e sùúy e Saray woo yeè lav və jii, «M kì ji à dzə̀ wiíy, aà bòŋ feyì.

¹²Wír veé Ejivi yíi yen wò, aá nèn yòŋ jii, à dzə̀ á wíiy wom, e nèn yuyrí mo, e fíʼ lèm wò.

¹³Ku yiì yòŋ jii, à dzə̀ á jemèr yem, aáwune fiʼ màʼtì mo e tin, e kfə̀n a geʼ e mò bìʼ wò.»

¹⁴Kí ku nèn kòóy bèy. Abram nəə́ é Ejiv, wír vee fóo yén ji Saray bòŋ a feyì.

¹⁵Atǎr ntoʼo yén bey, e nèn dù, e fìʼtì e Farao[40] mo wù dzəə̀n. Á nèn lì wun, e dù sho e ntoʼ.

¹⁶Fòn nèn kù a geʼ e Abram kijuujùŋ bìʼ Saray, e fò wun ŋgoo se njiì, sé bvəy, sé nàʼ, sé vimbèʼbìy, e kfə̀n fò akwàn vee vikìy wùn à vee vilume, à nyám se á yoŋ ji akamer si.

¹⁷Yii bèy, mo fòn‑eè lèmèn Saray woo wiiy Abram ji wíiy və, Nyùy nèn màʼ yàsí wo biibí e wùn à kfə́ə rəə́ wùn.

¹⁸Fòn nèn tòóy Abram, e dzə̀r shó jii, «Ke à yiìn e mò ben ki dzə̀ ka? Yì‑iì yiì ka, la à yòʼ sùúy e mò ji Saray dzə̀ wiiy wò?

¹⁹Bìʼ ka mo wò‑oò yòŋèn ji dzə̀ jemèr yè, bo m li ji wiíy wom. Wiiy wò və̀ne, lì ri, a dù sho.»

²⁰Fòn nèn sùúy e wír vəə́, á tsəə́né Abram, e fə̀ə́r fo wun wòŋ wùn à wiiy və, à kifá ke wù‑uù kér ki kidzə̀m.