Read Lamnso Kèʼlo 14 Bible Online

Kèʼlo 14 - Lamnso bible

Kèʼlo 14

¹Wáa dzə e ghan fóo fèy, a Amrafel, wun woo fon woó Shinar, e lì Ariok woo fon woó Elasar, à Kedorlaomer woó Elam, à Tidal woó Goyiim‑eè lò, e nèn màʼ rə́r wùn aàfon ámóʼó atàn,

²aá dzə̀ jii, Fòn Bera woó Sodom wùn à Fòn Birsha woó Gomorra, à Shinav woó Admaa, à Shemeber woó Tsəboyiim, à woó ŋkàlaʼ Bela ye á yoŋ sa ji Tsoar.

³Afon vee atàn vìne‑eè yiì ne *mensaŋ, e bàʼtí shuu sév sé rər é Mboʼ Siddim ye dzəə̀n lèn ji Ndzə́v Shiŋgwaŋe.

⁴A kí‑iì dzə̀ jii, áwune‑eè rə̀sí, e rèŋ vikwàn e Kedorlaomer sar kiyá nshòv sibaà e ghvə̀m, e lòo meé e kee nshòv sitaár e ghvə̀m ki, áwune jéykír, e tèn sáʼ rə́.

⁵Lòo dzə e kiya kee nshòv sikweè e ghvə̀m, Kedorlaomer wùn aàfon və́ kiŋkaàyi báʼtí vitú vév, e dù, e tòn wír veé Refayim e Ashterot‑Karnayim, e kfə̀n tòn veé Susim e Ham, à veé Emime e Shave‑Kiriatayim,

⁶à wír veé Hori e gwan woó Seir. Á tòn virə́ʼ vév, e dù, e mèé e El‑Paran e ŋguùŋè wòʼ. Á tòn bèy, e nèn bìnkìr,

⁷e kfə̀n é Enmishpat wo dzəə̀n Kadesh, e tòn virə́ʼ vé wìr veé Amalek vidzə̀m, e kfə̀n tòn wír veé Amor ve vé‑eè dzə́ e Hasason‑Tamar.

⁸Fòn woó Sodom wùn à woó Gomorra, à woó Admaa, à woó Tsəboyiim, e lì woó Bela fo á yoŋ sa ji Tsoar nèn lò sa lèn, e fə̀ə́r wóv woo shúu rər é Mboʼ Siddim ji á tám á wùn aàfon vìne, vee jii,

⁹Kedorlaomer woó Elam wùn à Tidal woó Goyiim, à Amrafel woó Shinar, e lì Ariok woó Elasar. Afon vee akweè vìne nèn tàm wùn à vee atàne.

¹⁰E ghan fen, Mboʼ Siddim rə̀n‑eè kér bií sé kunta e ŋàŋ. Fòn woó Sodom wùn à woó Gomorra lòo leʼ, wír ámóʼó tókír shó, ámóʼó nyéŋ, e kòʼ áàgwan.

¹¹Afon vee akweè ve vé‑eè tònèn wír veé Sodom wùn à veé Gomorràa nèn kùúy vifá vév vidzə̀m wùn à vifá ve yi vi, e dù sho.

¹²Vé‑eè lì sá Lot woo wan fər Abram wo wù‑uù dzə́ e Sodom, e kfə̀n kùúy sa káv və́, e dù sho.

¹³Wìr wùmòʼ‑oò mùm, e lèʼ, e wìy, e bì Abram woo wír woó Hibru kinyo ke kí‑iì kooyin, a Abram‑eè dzə́ e ghaa vici vee *oak ve dzəə̀n vé Mamre woo wír woó Amor. Mamre‑eè dzə̀ fər Eshkol wùn Aner, aáwune‑eè dzə̀ vé kiŋkàay Abram.

¹⁴Mo Abram yuun ji á koò ne a fər və é shùu rər, wù nèn lì nsheèlav sə́ nshòv waamé e ghvə̀m e ghiì taár (318), se wù‑uù yeʼeyin ne mo á wáa màʼ rə́r, wùn áwune jùm, e dù, e mèé e mbìv Dan.

¹⁵Lòo dzə vitsə́ʼə́, wù jàv shúu rər áàkáŋ aàkáŋ, sí tsəə́m, wù tòn áwune, e jùm, e dù, e mèé e ntèʼ yee Hoba e mbìv Damaskus yee fó kùy.

¹⁶Wù nèn faàsì káv wo vé‑eè kuuyin e dzə̀m, e kfə̀n faàsì sa Lot woo fər və, à káv vəə́ e dzə̀m, à vikìy, à vé sháŋ ámóʼó sá.

¹⁷Mo Abram tatin Kedorlaomer wùn aàfon ve wùn áwune‑eè dzəə̀né, e tòn, a kfən e bàm, fòn woó Sodom nèn fəə̀, wùn wun tár é Mboʼ Shave ye á yoŋ sa ji Mboʼ Fòn.

¹⁸Melkisedek woo fon woó Salem nèn wìy e vifá ve yi vi wùn à meluʼ mè ji wun fó á e Abram. Wù‑uù dzə̀ taà cù Nyùy woo Taà Vitu.

¹⁹Wù nèn a səə̀vì Abram, a ka jii: «Nyùy woo Taà Vitu, wo bomen wun yúv wùn à nsay, ku səə̀vì wò.

²⁰Búríi kú a dzə fo Nyùy woo Taà Vitu. Wù yiì ne, à só aŋgaà vé vibàn.» Wù ká bey, Abram nèn jàv vifá ve wù‑uù kuuyin fó shùu rər kirə́ʼ e ghvə̀m, e fò kee kimòʼón ki shó.

²¹Fòn woó Sodom nèn sùúy e Abram jii, «Ku fò wír vémé e mò, e lì vifá vi ji vé.»

²²Abram bìnèr kfə́ e fòn woó Sodom jii, «M kì yiì á ne kilìʼ fo NYÙY TÀR, wun woo Nyùy woo Taà Vitu, wun wo wù‑uù bomen yúv wùn à nsay,

²³ji bó m yòʼ ghár a kiŋkív ke ntar fo fòn vifa, kìn dzə̀ ka, fo fòn wìy a dzə̀v nsaŋ a ji yì‑iì yiì wun, bo Abram kuʼ.

²⁴Bó m yòʼ yíi ghar a kifá gheéy, kifá ke m liìn kí kù mày a ke wónlě nsùm vémé yiin é dzəə. A m kfə̀n lì sa a mbìv vé kiŋkaày vém, aá dzə̀ á ji Aner wùn à Eshkol, à Mamre. Áwune ku lì rì a mbìv yev.»