Read Lamnso Kèʼlo 16 Bible Online

Kèʼlo 16 - Lamnso bible

Kèʼlo 16

¹Saray woo wiiy Abram‑eè dzə̀, a bó wù yòʼ dzəə, a wù kér wánlè wiíy ji kwàn, a dzə̀ wan wìr Ejiv, a yír rəə́‑əə̀ dzə̀ ji Hagar.

²Saray nèn lò sùúy e Abram jii, «Ku yuùrí e yù, NYÙY TÀR yiì ne, m wáa dzə là wán. Lì kwàn wómé, é vèn wun shiíy, kìn mo‑óò koóy wán woo lò fo wun.» Abram biímé kinyo ke Saray suuyin.

³Wun woo Saray woo wiiy Abram nèn lì Hagar woo kwàn və́ woo wan wìr Ejiv və̀y, e fò e lum və Abram ji wíiy və wùmòʼ. Kinyo kìn ki‑iì kooy bèy, a Abram dzə́ʼə́m ne e wòŋ Kanan kiyá e ghvə̀m.

⁴Abram shiíy wùn Hagar, wù bóŋ bvəm. Mo wù kiiyin ji wun sì á e bvə́me, e nèn a koʼór wún, a gumér shuu wùn Saray wo wù‑uù lim fo fo.

⁵Saray nèn sùúy e Abram jii, «Yiì wò, é bo Hagar wáa nə̀ʼsì mo. Mò‑oò fò kwàn wóm ji wú kóytí wò, wú yén, a wú sì e bvə́me, e nèn a ŋway mo. Kù yíi tinén Nyùy nsaʼ yèsò.»

⁶Á bèy, Abram suúy e Saray jii, «Yén, kù kér wò vitaáví fo kwàn wóo, á yiì sho mo à yenen.» Saray nèn a nyàvrì sho, wù túmnín, a leʼ.

⁷Nshìylav NYÙY TÀR yén wun e woʼ, a wù dzə́ e ghaa dàn, e dzəə ye yì du e Shur,

⁸e dzə̀r jii, «Hagar woo kwǎn Saray, à wiy fo feé, aà du fèé?» Wù bìnèr jii, «M léʼ Saray wo m lim fo wun.»

⁹Nshìylav NYÙY TÀR nèn sùúy sho jii, «Á kfən e bàm, e dù yèn Saray, a yu fo fo.»

¹⁰Yì kfən sùúy jii, «M wíy yiì, é rám yée wáa dzə nyanyày ye bó yòʼ dzə̀ á tàŋ, e tòʼ.»

¹¹Nshìylav NYÙY TÀR nèn kfə̀n sùúy sho jii, «Yuúrí, e yù, à sì e bvə́me, aà wíy dzəə́ wán lumèn. À wíy shù yír rə́ ji Ishmael[41], bìʼ fo Nyùy yuun ne tóŋ yé.

¹²Wù wíy a dzə kilámákwaʼ, a tàʼ melaà wùn à wíri, é wíri wáa tàʼ sa melaà wùn áwune. A bó wù yòʼ wíy a tatí wùn aàfə́r vəə́.»

¹³Hagar nèn a ghay wún jii, «M yèn ne rú Nyùy, e gòʼ e tin à?» Wù nèn yòŋ yír NYÙY TÀR wo wù‑uù suŋnin e wun jii, «Nyùy wo wù yén mo.»

¹⁴Á kinyo ke kí‑iì yiìn, é bo á wáa yòŋ dàn və̀y, wo wù dzəə̀n é kintìntìn ke Kadesh wùn Bered ji «Dàn Ŋgaà wo wù dzəə̀n e tin, wo wù yén mo.»[42]

¹⁵Hagar nèn dzə̀ə́ wán lumèn wùn Abram. Abram yòŋ yír wan və ji Ishmael.

¹⁶Abram‑eè dzə̀ viyá nshòv ntuùfú e mwaamé (86) e ghan sin se Hagar‑iì dzəən Ishmael.