Read Lamnso Kèʼlo 19 Bible Online

Kèʼlo 19 - Lamnso bible

Kèʼlo 19

¹Nsheèlav se Nyùy see sibaà se sí kì loòn fó mbìy sìy si meé é Sodom e ŋkuùr, a Lot kì dzə́ e shùu kibùʼ ke kí nəə e ŋkàlaʼ foo fèy. Kù mò wù yenen wír vìy, e nèn tùm é yuv, e dù, wùn áwune tárnín. Wù tsə́m ndzəə́, e làʼ kitú e nsay,

²e yòŋ jii, «Atàr vem, kii vèn, vèn ku shaà e kwàn wóné lav. Vèn wiy, e sù wuú yéné, e shìíy, ndzə lóo jàv, é bo vèn shaa, a dù fo vèn kì du.» Áwune bìnèr jii, «Vèr kù‑úù shiíy a dzə̀ é mvə̀m ŋkàlaʼ fèn e ŋgèŋgèr.»

³Wù nèn kù a lon áwune kitávín, á yiì lò, e biìmé, wùn à Lot nèn dù e wun lav. Lot nèn sùúy, á fèr vifá ve yi, e kfə̀n tòn *kibán kee là nyaà, áwune yí.

⁴Ghán sé neèm si lòo gheén, vilum veé Sodome nèn wìy, e kaàrí lav, e tàr, a yì‑iì dzə̀ vilum veé ŋkàlaʼ foo fèy adzə̀m, wónlè wùn à ŋgày sé wìr si.

⁵Á nèn jàŋ Lot, e dzə̀r shó jii, «Vilum ve á kì nəən wò e shùu ŋkuùri bèé? Wìy shó, bìʼ fo vèr taʼ, e shiíy e vilum vee shooyi.»

⁶Lot lòo fəə ji wun yén á áwune, e sə̀tí shúu lav,

⁷e sùúy jii, «Afə̀r vem, kii vèn, lá vèn yòʼ yiì kfə́ə liì kisaŋ və̀n.

⁸Vèn leéy, e yèn, m kér wón vee vikìy abaà, a bó á yòʼ‑oò yiì ne kìíy lumèn. M lo, e lì, e fo e vèn, é vèn yii aáwune mo vèn taʼà. Kí dzə̀ cáʼ ji lá vèn yòʼ yiì kinyo e wír vìne, bìʼ fo áwune beè a dzə̀ mo, a m kù kér fó kìŋsìn áwune.»

⁹Áwune bìnèr jii, «Kíŋrí fó dzəə, é vèr shaa. Jwè və̀n, wò‑oò wìy fen, aà dzə̀ kiŋgwìy, à dzə̀ ké la, e bó a dìn kinyo ke a dzə̀ vèr yiì. Kóʼtí fó dzəə, fo vèr nyavri e wò, e shaà mo a kì dzə̀ vèr nyàvrì aáwune.» Á ku nèn a ghiʼ Lot bèy, a tàʼ, e kiv shúu lav.

¹⁰Viŋgwìy ve ví kì wìyìn Lot vìy vi tsə́nsí kiwó, e sə̀ŋ wun, e siìr fo mvəm, e sə̀tí shúu lav.

¹¹Mo á siìrìn Lot e lav, e nèn tsə̀m wír ve á kì tíy e shùu lav e vimfìr vi. Sí wìr dzə̀me səə́né, à ŋgàywìr, à wánlè, la á yòʼ dzəə́ a yen shúu lav gheéy.

¹²Viŋgwìy ve Lot vi nèn dzə̀r shó jii, «À dzəə́ kér wír wùmòʼ é kirə̀ʼ fen à? Kìn dzə̀ sə wò, kìn wan wò woo lumèn, kìn woo wiíy, kìn dzə̀ la wò, wo wù dzəə̀n é ŋkàlaʼ fèn, à kù fə̀ə́r fo fo,

¹³bìʼ fo vèr sí lo, e laàr kirə́ʼ kin. NYÙY TÀR yù ne liì kisaŋ woo kùm kirə́ʼ kin, e nèn tùm ver ji vèr wiy á, e laàr.»

¹⁴A Lot kì kér rú asə́ və́ ve wù‑uù kàʼàn wón və́ vee vikìy shó. Wù nèn dù, e yòŋ áwune jii, «Vèn lo cér fo kirə̀ʼ fen, bìʼ fo NYÙY TÀR sí lo, e laàr ŋkàlaʼ rə̀n. Á yú bey, a kwàʼ ji wù səə́ri a səə̀rín.»

¹⁵Kù bey, ndzə lòo kaʼ, nsheèlav se Nyùy sìy si wáa banrí Lot, a suúy jii, «Ku yiì cér, e lì wiiy wò wùn à wón vé vee vikìy vee abaà víne, é vèn áwune fəə́ fó fèn. Là bey, bo á lo, e tatí, e laàr vèn à wír veé ŋkàlaʼ fène.»

¹⁶A Lot kù ghvəə́ ghvəə́n, nsheèlav se Nyùy sìy si nèn ghàr wùn à wiíy, à wón vəə́, e fə̀ə́r fo ŋkàlaʼ fèy. Kí‑iì kòóy bey, a kù dzə̀ cáʼ ji NYÙY TÀR‑iì rə́r a mendzən me Lot.

¹⁷Nsheèlav se Nyùy si fəə́r áwune bey, e yòŋ jii, «Vèn wáa nyeŋ e vitú vén ví, é la wìr yòʼ lèéy bám, kìn ji wìr tiím é kirə̀ʼ, a fèn dzə̀ é mboʼ. Vèn du dúun, e kòʼ áàgwan, là bey, bo á yíi laàr sa ven fó.»

¹⁸Lot ku bìnèr aáwune jii, «Àáy atàr vem.

¹⁹Ké ru kí, vèn yèn ne kwàn wón, a kòŋ, a rər mendzən mvə, e sə̀ wun fo kpúu, yii bèy, a bó yòʼ dzə̀ m yù fóo nyeŋ, e koʼ aàgwan. A m lò a mùm, bo virómróm vin vi kù yíi koóy mo é dzəə, é m kpú.

²⁰Leéy, e yèn, ntèʼ yìmòʼ dzə̀ fó mentsə̀m ye a kì dzə̀ m lèʼ, e dù fo. Yì dzə̀ e térí féyì, aá màʼtì, m nyéŋ, e dù fo, la m yòʼ bòy à?»

²¹Nshìylav Nyùy yìmòʼ bìnèr sho jii, «M kù kfə̀n‑éè shám sá wò e kin ki, e làa yòʼ laàr ntèʼ ye à yoŋ rə̀n.

²²Lò cér, e lèʼ, e dù fo. Bó yòʼ dzə̀ m yiì kinyo, a bó vèn meé fó.» Mo Lot‑iì yòŋèn ntèʼ yee shooy ji ye terí, á nèn sìíy, a yòŋ yír ntèʼ rə̀y ji Tsoar[48].

²³Lot‑iì nə̀ə́ é ntèʼ yee Tsoar, a shùy ku tò toón.

²⁴NYÙY TÀR ku nèn màʼ və́y fó yuv, wú wáa shwi, a baarí moo mekàŋ, e sùm Sodom wùn Gomorra,

²⁵e nèn laàr ŋkà se laʼ see shooy wùn à mboʼ yee fó e dzə̀m. Wìr dzə̀m kpú, vifá ve ví‑iì kúy fo vi bò.

²⁶A wiiy Lot kì wiy fo wun bàm, e nèn bìnkìr, e lèéy bám. Mo wù leeyin bey, e kù nèn bìnkìr e kilan ke dzəə̀n shiŋgwáŋ.

²⁷Abraham bvəə́shí, e lò e yuv kijàvndzə, e nèn dù e kirə̀ʼ fo NYÙY TÀR‑iì suŋnin e wun.

²⁸Wù máʼ sí, e lèéy mbìv Sodom wùn Gomorra, e lèéy mboʼ yee fó e dzə̀m, e yèn a kindzə́ʼ ki dzəm fo fo mo á tòn kincaàrì e kifir.

²⁹Á mo Nyùy‑iì lóo laàr ŋkà se laʼ seé mboʼ foo fèy sìn, e kuùmé kinyo ke Abraham‑eè lonen, e fə̀ə́r Lot, e bóo laàr ŋkà se laʼ sìn, é wù boy.

³⁰Lot wáa dzə e Tsoar bèy, e nèn kèʼ, a fàn, e lì wón və́ vee vikìy vee abaà viy, wùn áwune kóʼ, a dzə e gwan, a shiíy e mbvə̀ʼ.

³¹Wan və woo ŋgàywìr nèn wìy lò, e sùúy e wo bàm jii, «Tàr wòsò dzə̀n ne, a wíri yòʼ dzə̀ fen vée lì wòsò ji vikìy vév, é vèsən áwune wáa dzəə́ wón.

³²Wìy ri, é wòsò taʼ meluʼ, e fò, é tàr wòsò nó, é wòsò fiʼ shìíy vèsən áwune. Wù nó, mè koó, é wù shiíy e wòsò, aá tiím bvəm, e dzə̀ə́ wón, e fíʼ lèm rám yesən.»

³³Áwune nèn fò meluʼ, kitàr kí nó vitsə́ʼ vee shooy. Wo mbìy dù, e shìíy wùn tàr wov, la tàr wov yòʼ fə̀m kìíy ghán se wù‑uù neèmèn, kìn se wù‑uù loòn.

³⁴Ndzə bvəə́shí, e ràn, wo mbìy suúy e wo bàm jii, «Yén ri mbà, m sìíy, e shìíy vèr tàr wòsò. Wòsò kfən fò meluʼ sho vitsə́ʼ vé lán vi, é wù nó, áà nèn dù, é vèn wun shiíy lèn, áà fíʼ koóy wón, fo rám tàr wòsòo lay.»

³⁵Á bèy, áwune nèn yiì, tàr wov kfən nò meluʼ vitsə́ʼ vee shooy, wo bàm nèn lò, e dù, e shìíy wùn kitàr kí, la tàr wov yòʼ fə̀m kìíy ghán se wù‑uù neèmèn, kìn se wù‑uù loòn.

³⁶Á mo wón Lot vee vikìy víne‑eè kooyin wón fo tàr wov.

³⁷Wo mbìy‑iì dzə̀ə́ wán lumèn, e shù yír ji Moav. Dzə̀ wun wo dzəə̀n tàr à wìr veé Moav[49], e wìy meé lán.

³⁸Wo bàm koóy sá wán woo lumèn, e shù yír ji Ben‑Ammi[50]. Dzə̀ wun wo dzəə̀n tàr à wìr veé Ammon, e wìy to lán.