Read Lamnso Kèʼlo 21 Bible Online

Kèʼlo 21 - Lamnso bible

Kèʼlo 21

¹NYÙY TÀR shám Sara mo wù‑uù kàʼàn,

²wù bóŋ bvəm wùn Abraham, e fùm wán lumèn, aáwune dzə́nkír ne. Vé‑eè dzə̀ə́ wán və̀n a dzə̀ é ghan see shó se Nyùy‑iì kàʼàn.

³Abraham nèn shù yír wan wo Sara‑aà dzəən və̀n ji Aysi[51].

⁴Aysi meé kishiíy waamé, Abraham sáŋ mbèʼ sə́ mo Nyùy‑iì suuyin.

⁵Abraham‑eè dzə̀ viyá wií e ghan se wù‑uù kooyin Aysi.

⁶Kinyo kìn ki koóy, Sara wáa sheʼrí, a yòŋ jii, «Nyùy shèʼér ne mo. Wìr dzə̀m wo wù yíi yu kinyo kìn yíi a sheʼrí vèr wun.»

⁷Wù kfən sùúy jii, «A yì‑iì dzə̀ biìmé la ji a dzə̀ Sara wìy nyòór wan Abraham? Yii bèy, m kù dzə̀ə́ ne wán vèr Abraham, a Abraham dzə́n ne.»

⁸Aysi kúy, á shóʼ fó vin, tàr wov Abraham wáa ker ŋkàʼ wo kuʼùné e kishiíy fóo fèy.

⁹Wìy lòo dzə e kishiíy kímóʼ kí, Sara yén Ishmael wo Hagar woo wan wìr Ejiv‑iì dzəən wùn Abraham, a wù shéʼ wán və Aysi,

¹⁰e nèn sùúy e Abraham jii, «Jùm wiíy woo kwàn və̀n wùn wan və. Bó yòʼ dzə̀ wàn wiíy woo kwàn və̀n wùn wan wom Aysi wìy jàv vitsə́ʼ.»

¹¹Kinyo kìn ki jívír Abraham e ŋàŋ, bìʼ fo Ishmael kù‑uù dzəə̀n sá wán və.

¹²Nyùy nèn sùúy e Abraham jii, «Lá kinyo kee bìʼ wán wùn wiíy woo kwàn kí yòʼ jìvír wò. Yú kinyo ke Sara suuy e wò ki, bìʼ fo á wíy a kiíy rám yé, a dzə̀ fo wan wò woo Aysi.

¹³Yii bèy, m kù yòʼ wíy yiì, é wan wiíy woo kwàn wáa dzə sa kitúm, bìʼ fo dzəə̀n vitó vé.»

¹⁴Ndzə bvəə́shí, e jàv, Abraham nèn lì vifá ve yi wùn à kitém ke mendzə̀v kí, e fò e Hagar. Wù shúr é mbèʼ wo, e shàʼtì ji wùn wàn ku dù a duùn bey. Hagar nèn lì kiwuú é dzəə, a ghan, a jan e woʼ yeé Beersheba.

¹⁵Wùn wàn nó mendzə́v, mè mày, wù nèn shwèy wán é sar kici kímóʼ kí,

¹⁶e lò fo fo, e dù moo ntàm wií bey, e dzə̀ʼə̀m fo, a wù‑uù rəm ji wun yòʼ koŋ a yen a mo wàn kpú. Wù dzə̀ʼə̀m bèy, e nèn a toŋ.

¹⁷Yii bèy, Nyùy yú tóŋ wan, nshìylav Nyùy yòŋ Hagar fo yuv, e dzə̀r shó jii, «Hagar, kòóy ka wò? Lá à yòʼ a fàn, Nyùy yù ne mo wàn tóŋ fo wù néŋé.

¹⁸Lò é yuv, e dù, e nàn wán, e ghàr e kiwó ki, a tomrí wun. M wíy yiì, é rám rəə́ wáa dzə kitúm ke kuʼùn kí.»

¹⁹Nyùy nèn mvə̀ʼ sí rə́, wù yén bií ndzəv ye tuŋéné, e nèn dù, e tù mendzə́v é kitem, e fò, wàn nó.

²⁰Nyùy kú a leéy fo wàn, wù wáa kuy, a dzə e wòŋ wo dzəə̀n wóʼ wóʼ, a jwim jwím e mvəne é dzəə ye tavín.

²¹Á yoŋ woŋ woo shooy fo wù‑uù dzə́ ji Paran. Yè wov nèn wìy lò, e tàʼ wiíy fo wòŋ Ejiv, e fò shó.

²²Wáa dzə e ghan fóo fèy, Abimelek wùn kilìmbìy kfə́ ké vé rər ke yì‑iì dzəə̀n Fikol ki wìy, e sùúy e Abraham jii, «Nyùy dzə̀ vèn wun e vinyò vidzə̀m ve à yii.

²³Yiì kilìʼ kí wòsò e Nyùy si ji bó à yòʼ wíy yiì a kinyo ke kisaŋ ki e mò, kìn e wón vémé, kìn e wón won vémé. À dzə̀ kiŋgwìy e wòŋàn, a mò‑oò lo səə̀sí wò kijuŋ. Ku keèrí sa mo bey, a dzə e wòŋàn ji nyaáŋ.»

²⁴Wù bìnèr jii, «M lìʼ ne bèy.»

²⁵Abraham nèn lò, a ndzəkír wùn à Abimelek bìʼ bií və́ ndzəv wo wón lìm Abimeleki‑iì faàsìn.

²⁶Abimelek suúy jii, «Nyaa mò, bó m yòʼ kì wír wo wù yiìn kinyo kìn. À yòʼ‑oò lo sùúy e mò. M kù yù kém a dzə̀ lán bèn.»

²⁷Abraham nèn wìy e bvə́y si wùn aànàʼa, e fò e Abimelek. Áwune vee wír abàá nèn gwàr *mensaŋ.

²⁸Abraham fəə́r kifum ke bvəy saàmbà fo mvə̀m ŋgoo, e lèm jeéy,

²⁹Abimelek dzə́r e Abraham jii, «Nsàv vifùm ve bvəy vee saàmbà ve à fəərin, e lèm jeéy vin dzə̀ ji ka?»

³⁰Wù bìnèr jii, «Ghár vifum ve bvəy vee saàmbà vìn vi fo mǒ kiwo ji kisəə́y kee ji yì‑iì tùŋ á mo ndzə́v rən.»

³¹Á kinyo ke kí‑iì yiìn, bo á wáa yòŋ kirə́ʼ kee shooy ji Beersheba[52], bìʼ fo dzəə̀n fo áwune vee wír abàá‑aà yiìn kilìʼ.

³²Á màysì kilìʼ ke vé‑eè yiìn é Beersheba, Abimelek wùn Fikol wo yì‑iì dzəə̀n kilìmbìy kfə́ ké vé rər kí nèn kfə̀n é bàm é mvə̀m wòŋ woo Filistia.

³³Abraham siíy lò, e bìy kicí ke á yoŋ ji *tamarisk e Beersheba foo fèy, e cù NYÙY TÀR fó, wun woo Nyùy wo wù gòʼòn kàŋ mòʼón là may.

³⁴Abraham ku nèn dzə̀ʼə̀m ntàmda e nsay Filistia foo fèy.