Read Lamnso Kèʼlo 22 Bible Online

Kèʼlo 22 - Lamnso bible

Kèʼlo 22

¹Nyùy nèn wìy lò, e mùm Abraham. Wù‑uù jàŋ wun ji Abraham. Wù biímé jii, «Mo və̀ne.»

²Nyùy suúy shó jii, «Lì wan wò, màyshó wan wò Aysi, wo à koŋè, e dù sho e nsay Moria, e tòn, e cù mo shó, e gwan wo m yíi dìn e wò.»

³Ndzə bvəə́shí, e jàv, Abraham báʼtí kimbèʼbìy, e lì wón və́ lìm abaà wùn à wan və Aysi, e shètì meŋkaʼ me cù, wùn áwune nèn ŋàʼáy, a dù e kirə̀ʼ ke Nyùy‑iì suuyin e wun.

⁴Wáa dzə e kishiíy ke kí‑iì meen ji taár, Abraham màʼ sí, e yèn kirə́ʼ kee shooy, a kí dzə̀ə́ ntàmda.

⁵Wù nèn sùúy e wón və́ lìme jii, «Vèn à kimbèʼbìy kí goʼ fen, é vèr wàn du é ndzən fésə, e dù yiì cu, e bóo kfən e bàm, e yen ven.»

⁶Abraham lì meŋkaʼ me cù, e fò, Aysi woo wán və bèʼèy. Wù wáa ker kfə́ a dzə̀ shwàʼ wùn à və́yí é kiwo. Áwune vee abàá nèn a dù.

⁷Aysi lò, e yòŋ Abraham jii, «Tàr wor.» Wù biímé jii, «Mo və̀ne wan wòm.» Wù suúy e tàr wov jii, «Və́yí və̀ne, a meŋkaʼ mè mène, wan njiì wo á yíi tòn, e cù Nyùy sho bèé?»

⁸Abraham bìnèr jii, «Wan wom, Nyùy kitú kfə́ yíi fo wan njiì wo á cu wun sho.» Áwune vee wír abàá nèn kù a dù kiwuú kimòʼón.

⁹Á meé é kirə̀ʼ ke Nyùy‑iì dìnèn e Abraham kìy, wù nèn bòm *kíy cù fo, e sìysì meŋkaʼ sho, e kùr wán və Aysi, e neèr e kiy, e kitu ke meŋkàʼ.

¹⁰Wù nèn lò màʼ kiwó, e lì shwàʼ ji wun sí seé a wán shó.

¹¹Nshìylav NYÙY TÀR yòŋ fo yuv jii, «Abraham, Abraham.» Wù bìnèr jii, «Mo və̀ne.»

¹²Wù suúy shó jii, «Lá à yòʼ màʼ kiwó ké e wǎn kitu. Lá à yòʼ yiì kinyo e wun. M kìíy ne lèn ji à fan a Nyùy, bìʼ fo à yoʼ lò kìm wan wò, màyshó wan wò, fo mò woo Nyùy.»[53]

¹³Abraham lòo màʼ sí, e nèn yèn kiyáʼ, a kí dzə̀ kitaŋsìn fó loŋ, e mvə̀m kighìn. Wù nèn dù, e lì kiyáʼ kìy, e tòn, e cù Nyùy sho e wǎn kiliŋ.

¹⁴Abraham nèn yòŋ kirə́ʼ kee shooy jii, «NYÙY TÀR yíi fo.»[54] Kèʼ fo ghan fóo fèy, e wìy meé lán, á lo, á nèn a yòŋ jii, «E NYÙY TǍR gwan, wù kù yíi fo.»

¹⁵Nshìylav NYÙY TÀR kfən sùŋnín fo yuv e Abraham fo akàŋ vee abaà,

¹⁶a suúy jii, «Súŋnin mo woo NYÙY TÀR lèn. Mo à yiìn kinyo kìn, e làa yòʼ kìm màyshó wan wò fo mò, m nén a lìʼ, a kàn e mǒ yir jii,

¹⁷rú wùn à rú, m yíi bùʼ wò, e yiì, é rám yée wáa dzə e gháʼán moo mejiy meé yuv, e kfə̀n a dzə moo síy seé meshavtí me *rìbà ndzə̀v. Rám yée wíy tòn aŋgàa vibàn vév.

¹⁸Mo à yuun jí yem, e lèm, m wíy shaà fo wò ram, e səə̀vì vitúm veé kitu ke nsay vidzə̀m.»

¹⁹Abraham nèn kfə̀n é bàm fo wón və́ lìme kì siiyin a dzə, wùn áwune wáa kfən e Beersheba. Abraham ku nèn a dzə e Beersheba ntàmda.

²⁰Ghán sí lòo dù, Abraham yú ji Milka woo wiiy fər və Nahor wàa sì á yeè wòn, a wùn Nahor dzə̀ə́ ne a wón vilum vilum.

²¹A vé‑eè dzə̀ jii, Us wo dzəə̀n wo mbìy. Afə́r vəə́ wáa dzə Bus, e lì Kemuel wo wù‑uù kuyin, e dzə̀ə́ Aram.

²²Ámóʼó wáa dzə ji Kesed wùn à Haso, à Pildas, à Jidlav, à Betuel.

²³Wón vee waamé víne dzə̀ ve Milka‑aà dzəən wùn Nahor woo fər Abraham. Betuel wìy kùy, e nèn dzə̀ə́ Rebeka.

²⁴Wiíy wo Nahor‑iì lèmèn, a yírí dzə̀ ji Ruma‑aà dzə̀ə́ sá wón, a yír sév sí‑iì dzə̀ ji Teba wùn à Gaham, à Tahash, à Maaka.