Read Lamnso Kèʼlo 27 Bible Online

Kèʼlo 27 - Lamnso bible

Kèʼlo 27

¹Aysi wìy dzə̀ʼə̀m, e dzə̀n, síi fìr. Wáa dzə e kishiíy kímóʼ kí, wù jàŋ Esav woo wán və mbìy, e sùúy sho jii, «Wan wòm.» Wù biímé jii, «Mo və̀ne.»

²Wù suúy jii, «Yuúrí kijuŋ, m dzə̀n ne, a bó m yòʼ kì kishiíy kém ké kpu.

³Lèn və̀n, lì vifá ve jwim vi, kinte wùn à ŋkòʼ mvə̀n, e dù sho e kwaʼ jwim, e koò nyám, e wìy sho.

⁴À wiyì, à nàvtì nyóo shó e dzəə ye m yii koŋè, e wìy sho, é m yí, e tìr kpú e wò, e fò wò kisəəvì kém, e bó a kpu.»

⁵Mo Aysi súŋnin e wan və Esav bèy, a Rebeka kù yú. Esav yiì dù e kwaʼ jwim,

⁶Rebeka suúy e Jakov woo wán və tìm jii, «M kì yù, a tàr won suuy e fər wò woo ŋgàywìr ji

⁷wù wiy á e nyàm kwaʼ, e nàvtì nyóo é dzəə ye wun yii koŋè, é wun yí, e nèn tìr kpú, e səə̀vì wun a e NYÙY TǍR si, e bó a kpu.

⁸Á bèy wan wòm, yú ri jí yem, e yiì mo m suuy e wò.

⁹Dù é kitsəə̀m, e koò wón bvəy ve faŋkìné abaà, e wìy sho, é m navti nyóo sé tàr won é dzəə ye wù yii koŋè,

¹⁰áà du shó, e fò e wun, é wù yí, e tìr kpú, e səə̀vì wò, e bó a kpu.»

¹¹Yii bèy, Jakov bìnèr e yè wov jii, «À kì ji fər wom Esav dzə̀ wír wo kwiiyín, a wún wómé dzə̀ e lerìsìn.

¹²M fan ji a tàr wor yiì mùmrì wún wóm, bo wù yíi a yu nyár ji m bòʼtí a wun, bo m lì ne lòn e mǒ kitu, e buŋ kisəəvì.»

¹³Yè wov bìnèr sho jii, «Wan wom, màʼtìi, é lòn wóo gbu a dzə̀ e mǒ kitu. Ku yù jí yem, e dù, e wìy sho.»

¹⁴Wù nèn dù e kitsəə̀m fey, e koò wón bvəy vìy, e wìy, e fò e yè wov. Yè wov sə́, e nàvtì nyóo é dzəə ye tàr à Jakov yii koŋè,

¹⁵e nèn lì ndzə̀y sé Esav woo wán və mbìy, e màʼ e Jakov woo wán və bǎm wùn. A ndzə̀y sin si‑iì dzə̀ sé ntay si se Esav‑iì lèmèn e yè wóv lav.

¹⁶Wù kfən lì júv se wón bvəy vìy, e sə̀tí kóy se Jakov sho, e mèé e wo, à mbìv kilòŋ ye lerìsìn.

¹⁷Wù nèn lì nyóo se wù kì nàvtìn siy wùn à kibán ki, e wày e wan və woo Jakov və̀y kiwo.

¹⁸Jakov nèn dù sho e lav fo tàr wov‑iì dzəə̀n, e yòŋ ji «Tàr wor.» Aysi biímé ji «Eè», e dzə̀r jii, «Wan wòm, dzə̀ wò la?»

¹⁹Jakov bìnèr e tàr wov jii, «Dzə̀ mo Esav woo wan wò mbìy, a m yiì ne mo à kì suuyin. Tàr wor, wìy dzə̀ʼə̀m, a yi nyám ye wan wò koon ji ye. Yí, áà nèn fò mo kisəəvì.»

²⁰Aysi dzə́r shó jii, «À ghàn é le, e bóo te cér bèn wan wòm?» Wù bìnèr jii, «Dzə̀ bìʼ fo NYÙY TÀR wo à yii ghvə́mé kì foon mo vishí ve juŋ vi.»

²¹Wù suúy e Jakov jii, «Kóʼtí fó mentsə̀m, é m mumri wò, e yù ji sà kù yòʼ dzə̀ rú wán wom Esav a.»

²²Jakov ku nèn kòʼtí e tàr wóv ghaŋ. Wù mùmrì wun, e sùúy jii, «M yú, a ji yè koó moo ye Jakov bèy, yii bèy, a kóy si dzə̀ sé Esav, e dù, e meé e wo.»

²³Aysi yòʼ‑oò dzəə lò kìíy rú ji dzə̀ á Jakov, bìʼ fo kóy sə́ sí‑iì kwiiyin ne moo sé fər və Esav bèy. Wù nèn lò, e səə̀vì wun.

²⁴A kí‑iì dzə̀ jii, wù‑uù dzə̀r shó jii, «À kù yòʼ dzə̀ rú wán wom woo Esav a?» Jakov bìnèr jii, «Eènó, dzə̀ mo.»

²⁵Wù nèn sùúy lèn jii, «Wan wòm, wìy e vifá ve yi vìy vi, é m yí nyám ye à koon rə̀n, e bóo səə̀vì wò.» Jakov wìy sho, e fò, wù yí, e nèn kfə̀n fò meluʼ, wù nó.

²⁶Tàr wov nèn sùúy sho jii, «Wan wòm, kóʼtí, e wìy fo mentsə̀m, e baàmé mo.»

²⁷Jakov nèn kòʼtí fo wun mentsə̀m, e baàmé wun. Wù rə̀msì ndzə̀y sə́, e yù kirəm a dzə̀ ké Esav, e nèn səə̀vì wun lèn, a suúy jii: «Yú kirəm ke wan wom kí. Kí rəm moo ké ŋgvə̀n kwaʼ ye NYÙY TÀR səə̀vìn ne.

²⁸M lón ji Nyùy kú a səʼə́r ŋweʼ fo yuv, é nsay wáa fo wò vifá nyanyày, vifá ve yi wùn à *meluʼ mè.

²⁹Vitúm vi kú a lìm fo wò, e kfə̀n a ghvəm wò. Kù yíi a fo wò sáʼ aàfə́r vée, é wón yè woné kú a ghvəm wò. Nyùy ku shòv wir dzə̀m wo wù roʼ wò, e səə̀vì wir dzə̀m wo wù yii vinyo ve juŋ vi e wò.»

³⁰Kù mo Aysi səə̀vìn Jakov e màysì, Jakov kú a bàʼ kiwuú, fər və Esav nèn wìy fo kwaʼ jwim.

³¹Wù wìy bèy, e nàvtì vifá ve yi e dzəə ye tàr wov yii koŋè, e wìy sho, e sùúy e tàr wov jii, «Tàr wor, wìy dzə̀ʼə̀m, e yì nyám ye wan wò koon ji ye, e bóo fíʼ fo mo kisəəvì.»

³²Tàr wov Aysi dzə́r shó jii, «Dzə̀ wò la?» Wù bìnèr jii, «Dzə̀ mo Esav woo wan wò mbìy.»

³³Mo Aysi kiiyin lèn ji sì á Esav, e nèn a fàn, a yàʼ kitávín, a dzər jii, «Kì koò la nyám, e wìy sho, m yí, e màysì, e səə̀vì wun, é bo à wáa nəə́? Yuúrí, e yù, m səə̀vì ne wun, a bó yòʼ dzə̀ m dzəə sə̀ kisəəvì kee shooy e bàm.»

³⁴Mo Esav yuun kinyo ke tàr wov suuyin kin, shilív shí baárí wun, wù waá kimà ké toŋ, e sùúy e tàr wov jii, «Tàr wor, ku səə̀vì sa mo.»

³⁵Tàr wov bìnèr jii, «Fər wò Jakov kì wìy ne, e bòʼtí mo, e sə̀ kisəəvì ke m kì yíi fo e wò.»

³⁶Esav suúy jii, «A kù dzə̀ yír rəə́ wàa dzə rú ji Jakov[64]. Wù bòʼtí ne mo lèn ji akàŋ abaà. Wù‑uù tòmbìy sə̀ viŋgày vé wìr vém moo wan mbìy. Wáa dzə lèn, wù kfən sə̀ kisəəvì ke á kì yíi fo e mò.» Wù suúy bey, e dzə̀r e tàr wov jii, «Kímóʼ kee kisəəvì kí yoʼ bèr ke a dzə̀ à fò e mò a?»

³⁷Tàr wov bìnèr sho jii, «Yuúrí kijuŋ, m lèm ne wun ji wír wo à wíy a yu sáʼ fo fo. Afə́r və́ adzə̀me wíy a lìm fo wun. M kfən bùʼ wun e vifá ve yi vi wùn à meluʼ mè. A dzə̀ m kfə̀n fò ka e wò lèn?»

³⁸Esav kú a lon tàr wov jii, «Kímóʼ kee kisəəvì kí yòʼ dzə̀ə́ ke a dzə̀ à fò e mò a? Tàr wor, ku səə̀vì sa mo.» Wù lón bey, e bùr tóŋ, e nèn a dìy.

³⁹Tàr wov Aysi nèn lò, e sùúy jí sìn sho jii: «Yuúrí, e yù, à wíy a dzə kwaʼda fo nsay ye yì fəər vifá ve yi nyanyày, e kfə̀n a dzə kwaʼda fo kirə̀ʼ ke ŋweʼe gbu, yii, a vifá ve yi vi boŋè.

⁴⁰À wíy a lùŋ a dzə̀ fó rər se à maʼà, aà wíy a lìm fo fər wò woo Jakov. Yii bèy, ghán sí wíy gheén, à ŋwáy sáʼ rə́, áà nèn shwèy kimbùŋ ké vikwàn ve à reŋ fo wun.»

⁴¹E bǎm vinyò vìn, Esav nèn a bàn Jakov bìʼ kisəəvì kfə́ ke tàr wov foon shó. Wù wáa sev fo wùn bvə̀m ji tàr wov yíi kpu, á diy kpú, maysì, é wun ku yùyrí a Jakov.

⁴²Kinyo ke Esav kìy ki nèn tò e Rebeka kitùʼùr, wù yú ntaŋ wan və mbìy, e jàŋ Jakov woo wán və bàm. Wù wìy, wù suúy shó jii, «Yuúrí, e yù, fər wò Esav báʼti ji wun ló yuyrí a wò, é bo shilív sə́ shí rəsin.

⁴³Bìʼ kee shoon wan wòm, ku yù jí yem. Lò cér, e nyèŋ, e dù fo fər wom Laban wùn é Haran.

⁴⁴Ku dzə̀ʼə̀m vèn wun e bǎm shintàm, e meé mo shilív shé fər wò shi wíy rə̀sìn.

⁴⁵Shí wíy rəsìnè, wù laysìn kinyo ke wò‑oò yiìn e wun, é m tsə́nsí ntum, áà wáa wìy. A dzə̀ wóné kpù mo abaà kishiíy kimòʼón e le?»

⁴⁶Rebeka nèn sùúy e Aysi jii, «M yú nyár e mǒ dzə̀ʼə̀m bìʼ vikìy vee rám Hit ve Esav kér ji vikìy və́. A kí kòóy ji Jakov kfən kòóy wiíy fo fo, bo nyár yee ben e mǒ dzə̀ʼə̀me dzə̀ yeé le?»