Read Lamnso Kèʼlo 28 Bible Online

Kèʼlo 28 - Lamnso bible

Kèʼlo 28

¹Á bèy, Aysi nèn jàŋ Jakov, e shàʼtì, e kfə̀n tìr wun jii, «Lá à yòʼ yiì a tàʼ wiíy fo Kanan fèn.

²Lò cér, e dù e Paddan‑Aram e Betuel woo tàr à yè wón laʼ, e tàʼ wiíy fo Laban woo lúmer yè wón won.

³Nyùy woo Ŋgaà Vitaàví Vidzə̀m kú a səə̀vì wò, e yiì, áà wáa ker wón anín, aá kuʼ, é vitúm vinín vi ram fo wò kfəə.

⁴Wù ku fò vèn à kfə́ə yée kisəəvì ke wù‑uù foon e Abraham, é vèn áwune yov nsay ye à dzə́ sho moo kiŋgwìy rə̀n, nsay rə̀n feyì feyì ye wù‑uù foon e Abraham.»

⁵Aysi súŋnín bey, e nèn tsə̀nsí Jakov e Paddan‑Aram fo Laban wùn. Laban, wo yì‑iì dzəə̀n wan Betuel woo wír woó Aram, a kfə̀n‑eè dzə̀ lúmer Rebeka woo yìy à Jakov wùn Esav.

⁶Esav nèn kìíy ji Aysi kì səə̀vì ne a Jakov, e tsə̀nsí e Paddan‑Aram ji wù taʼ á wiíy fo fo. Wù kfə̀n‑eè kìíy ji tàr wov kì lòo səə̀vì Jakov bèy, e tìr á ji lá wù yòʼ kòóy wiíy fo kitum kee Kanan fèy,

⁷e kfə̀n yèn ji Jakov kì ghvə̀m ne tàr wov wùn yè wov, e lò, e dù a e Paddan‑Aram,

⁸wù nèn kìíy rú lèn ji vikìy veé Kanane yoʼ ghèén a tàr wov Aysi.

⁹Wù nèn dù, e yèn Ishmael woo wan Abraham, e kòóy wiíy wùmòʼ fó fo, e tàtí ve wù‑uù kér sho. A yír wiíy wo wù‑uù kooyiné dzə̀ ji Mahalat, a dzə̀ jemèr Nebayiot woo wan Ishmael, a Ishmael və̀n‑eè dzə̀ wan Abraham.

¹⁰Mo Aysi kì tsənsin Jakov bèy, wù nèn lò fo Beersheba, a dù e Haran.

¹¹Wù meé é kirə̀ʼ kímóʼ kí, a shùy nəə́ ne, e yèn ji bòŋ a ji wun shiíy. Wù nèn lì tíy yímóʼó ji mbuùy, e neèm, a buuné.

¹²Njèm nèn shì wun, wù yén, a kiráŋ ki ló fó nsay, e kòʼ, e tàŋ yúv, a nsheèlav se Nyùy si kóʼ, kfə̀n sə́y e ntuŋ se kiraŋ fèy.

¹³NYÙY TÀR fəə́sín é njèm, e tìím e mbìv kùy kiraŋ,[65] e sùúy jii, «Dzə̀ mo NYÙY TÀR, Nyùy Abraham woo tàr à tàr won, à wo Aysi. M yíi fo nsay ye à néŋ sho rə̀n e wò, é wáa dzə ye vèn à rám yée.

¹⁴Rám yée wíy a dzə e kitu ke nsay moo kibvər, a bó yòʼ dzə̀ á tàŋ. Yí wíy san, e dù vitóŋtóŋ vidzə̀m. M wíy səə̀vì vitúm vidzə̀m, e shaà fo wò vèn à rám yée.

¹⁵Á kiíy jii, m kù wíy a dzə wòsò, a leéy fo wò, e kirə̀ʼ kidzə̀m ke à du sho. M kù wíy lì wò, e kfən sho e bàm é nsay Kanan fèn. M kù wíy yiì kinyo kidzə̀m ke m suuyin e wò, a bó m yòʼ wíy màʼtì wò e ghan símóʼ sí gheéy.»

¹⁶Jakov yiì sàsìn fo mbuùné, a ghay wún jii, «Rúrú, NYÙY TÀR dzə̀ é kirə̀ʼ fen, a bó m yoʼ lò a kiíy.»

¹⁷Wù nèn a fàn, a ghay wún jii, «Kirə́ʼ kee ben ki dzə̀ keé le? Kù‑úù wáa dzə kirə́ʼ ké Nyùy, a kù dzə̀ shúu kibùʼ woó yuv.»

¹⁸Jakov bvəə́shí, e lò e yuv kijàvndzə kijàvndzə, e lì tíy ye wù‑uù neèrìn kitú sho rə̀y, e tùúy fo ji dzə̀ á kirə́ʼ ké Nyùy, e sə̀r meŋgvə́r é kitu wo,

¹⁹e nèn shù yír kirə̀ʼ kee shooy ji Betel[66], a vé‑eè yoŋ fó fo mbìy ji Lus.

²⁰Jakov nèn kàʼ NYÙY TÀR jii, «Nyùy, aà yiì a dzə wòsò, a leéy fo mò é ghan ye m du rə̀n, a fo mo vifá ve yi wùn à ndzə̀y se m wáa màʼ si,

²¹yee ji m kfə́n e tàr wór laʼ ji nyaáŋ, bo à yíi a dzə Nyùy wom,

²²a tíy ye m tuuyin rə́ne wíy a dzə kirə́ʼ, a dzə̀ kee fo á wíy a bùnrì wò. A m kfə̀n wíy a jàv vifá ve à fó e mò vidzə̀m kirə́ʼ e ghvə̀m, a fo kee kimòʼón ki e wò.»