Read Lamnso Kèʼlo 29 Bible Online

Kèʼlo 29 - Lamnso bible

Kèʼlo 29

¹Jakov ku nèn lò, a dù e mbìv vitum ve ví dzəə̀n é mbìv wòŋ yee fo shùy yii tó.

²Wù lòo meé fo, e màʼ sí, e yèn ndzə́v ye tuŋéné é kwaʼ, e yèn ŋgoo se bvəy sitaár, a sí néŋ e ghaŋ wo, bìʼ fo dzəə̀n fo vé‑eè noorì, aá sə́tí ne shúu ndzəv e màkìlan.

³Lóo dzə e ghan se á baʼtin bvə́y si fó sidzə̀m, anshìyi nèn dòm kilán, e tsə̀ʼ fo shùu ndzəv, e nòór. Á maysì, á nèn dòm, e siìr fo.

⁴Mo Jakov yenen anshìy bèy, e nèn dzə̀r aáwune jii, «Afə̀r vem, vèn lò a dzə̀ fó feé?» Á bìnèr jii, «Vèr lò fo Haran.»

⁵Wù nèn kfə̀n dzə̀r jii, «Vèn kì Laban woo wan wàn Nahor a?» Á bìnèr ji «Vèr kì wun.»

⁶Wù nèn kfə̀n dzə̀r jii, «Wù dzə̀ kitávín á?» Á bìnèr jii, «Wù dzə̀ kitávín. Leéy, Racel woo wán və və̀ne mo wù wiy wùn à bvə́y si.»

⁷Wù yòŋ jii, «Vèn leéy, lèn dzə̀ə́ e shùy, a bó yòʼ sì ghán se á yii báʼti bvə́y si, wáy e kày. Vèn noór, e lì, e dù sho e kwaʼ, a yiír.»

⁸Áwune bìnèr jii, «Bó yòʼ dzə̀ vèr nòór bvə́y si, a bó sí báʼtí sidzə̀m, vèr tsə́ʼ kilán fo shùu ndzəv.»

⁹Kù mo wù súŋnin wùn áwune bey, Racel nèn wìy wùn à bvə́y se tàr wov sí, bìʼ fo yì‑iì leey wun fo fo.

¹⁰Mo Jakov yenen Racel woo wan Laban woo lúmer yè wov wùn à bvə́y se wun woo Laban si, e nèn dù, e tsə̀ʼ kilán fo shùu ndzəv, e nòór nyám se Laban.

¹¹Kí‑iì bòŋ wun e ŋàŋ mo wù yenen Racel. Wù baámé, e dìy,

¹²e sùúy sho ji wun dzə̀ á wan Rebeka woo jemèr tàr wov. Racel nyéŋ, e nèn dù, e bì tàr wov shó.

¹³Mo Laban yuun sáʼka Jakov woo wan jèmèr rə, e nèn nyèŋ, e dù, e yèn wun, e kòytí, e baàmé, e nèn lì, e dù sho e wun laʼ. Jakov fèr kinyo kidzə̀m ke kí‑iì kooyin wun e Laban.

¹⁴Laban yuúrí, e sùúy sho jii, «Rúrú, à dzə̀ mensə́ mem, à dzə̀ kibar kém ké wùn.» Jakov nèn dzə̀ʼə̀m wùn Laban ŋwee fur.

¹⁵Laban yiì lò, e sùúy sho jii, «Kí yoʼ ghèén ji à wáa lìm fo mò kisáŋ ji bìʼ fo à dzəə̀n mensə́ mem. Suúy e mò mo vilaʼày vé vi yíi a dzə.»

¹⁶Laban‑eè kér wón vee vikìy abaà, a yír woo ŋgàywìri dzə̀ ji Lea, a yé wo terií dzə̀ Racel.

¹⁷Lea‑aà tò sí,[67] yii bèy, a Racel‑iì bòŋ féyì e mbom, e kfə̀n bòŋ e nshòm.

¹⁸Jakov wáa kòŋ Racel feyì, e sùúy e Laban jii, «M yíi lìm fo wò kiyá saàmbà, é vilaʼày vém ví wáa dzə Racel woo wan wò wo terí.»

¹⁹Laban bìnèr jii, «Kí bòŋ ji m fó wun e wò, e shaà fo m fó e wìr wo sən. Kú a dzə wòsò.»

²⁰Jakov lìm kiyá saàmbà ji wun keérí Racel ji wiíy. Viyá vìn vi shaà cércér mo dzə̀ á vishiíy vishàr bèy, bìʼ fo wù‑uù koŋ Racel e ŋàŋ.

²¹Jakov nèn sùúy e Laban jii, «Fó ri wiíy wom, é m wáy é lav, bìʼ fo m màysìn ne lim yém.»

²²Laban nèn bàʼtí wír veé kiliŋ foo fèy adzə̀m, e kù nèn yiì ŋkǎʼ vijin.

²³Yii bèy, wáa dzə vitsə́ʼə́, wù nèn lì a dzə̀ wán və woo Lea, e dù, e fò e Jakov, wùn wun shiíy.

²⁴A Laban kì lì ne sa wánlè wiíy wùmòʼ wo wù‑uù lim fo wun, aá yoŋ ji Silpa, e fò e Lea ji və́ə woo wánlè lìm.

²⁵Ndzə bvəə́shí, e ràn, Jakov yén, a kì dzə̀ Lea wo wùn wun kì shiiyin, e nèn dzə̀r e Laban jii, «À mùm kin e mò a dzə̀ ka? Bó m yòʼ‑oò lim fo wò ji à fó a dzə̀ Racel e mò a? À bóʼtí mo ben ji ka?»

²⁶Laban bìnèr jii, «Yòʼ dzə̀ liì wor wòŋ ji á li wan bàm, e fò e lum, a wo mbìy dzə̀ə́ e lav.

²⁷Ku màysì ŋgàm kiŋkàʼ ke vijin vèn Lea, é vèr fó Racel sa e wò, aà fen biìmé ji à kfə̀n‑éè lim fo mò viyá vímóʼ ví saàmbà.»

²⁸Jakov biímé, e màysì ŋgàm kiŋkàʼ ke vijin vé wùn Lea yee shooy. Laban nèn kfə̀n fò Racel sho ji wíiy və wùmòʼ.

²⁹A wù‑uù lì ne Bilha woo wánlè wiíy wo wù‑uù lim fo wun, e fò e Racel ji və́ə woo wánlè lìm.

³⁰Á bèy, Jakov nèn shìíy sa e Racel, a wù‑uù koŋ Racel e shaà Lea, e nèn kfə̀n lìm fo Laban viyá vímóʼ ví saàmbà.

³¹NYÙY TÀR yén ji Jakov yòʼ koŋ a Lea moo Racel, e nèn mvə̀ʼ kidzəə́y ké Lea, Racel wáa dzə kfə́ kár.

³²Lea bóŋ bvəm, e fùm wán lumèn, e nèn shù yír ji Ruben[68], a wù shu bèy, suuy jii, «NYÙY TÀR yèn ne ŋgeʼ sém, a lum wom sí yiì a kòŋ mo lèn.»

³³Wù kfən tìím bvəm, e dzə̀ə́ wán lumèn, e sùúy jii, «NYÙY TÀR kfə̀n fò ne mo wán lumèn, bìʼ fo wù yenen ne ji lum wom yòʼ koŋ a mo.» Wù suúy bey, e nèn shù yír ji Simeon[69].

³⁴Wù nèn kfə̀n tìím bvəm, e dzə̀ə́ wán lumèn, e sùúy jii, «Kin ki‑íì tátí vèr lum wom lèn, bìʼ fo m dzəən ne wón və́ ataár, vilum vilum.» Wù suúy bey, e nèn shù yír ji Levi[70].

³⁵Wù nèn kfə̀n siì tìím bvəm, e dzə̀ə́ wán lumèn, e sùúy jii, «M yíi a burí NYÙY TÀR lèn.» Bìʼ bey, wù nèn shù yír ji Juda[71], e làa yòʼ dzə́ə dzəə́ e bǎm shintàm.