Read Lamnso Kèʼlo 30 Bible Online

Kèʼlo 30 - Lamnso bible

Kèʼlo 30

¹Mo Racel kiiyin ji bó yòʼ dzə̀ wun dzə̀ə́ á wán, e nèn a bàn jemèr rə, e sùúy e Jakov jii, «Fó bvə́me e mò cér fo m kpú.»

²Kinyo kìn ki shwiíy kilòŋ ké Jakov, wù suúy jii, «À kwaʼ ji m dzə̀ Nyùy à? Yiì wun ji lá à yòʼ dzə̀ə́.»

³Racel nèn bìnèr jii, «Bilha woo wánlè wiíy wo wù lim fo mò və̀ne, ku lì, é vèn wun shiíy, é wù fiʼ dzə̀ə́ wón e mǒ yir, ji m fíʼ a ker kfəə́, e shaà fo wun.»

⁴Wù suúy bey, e nèn fò Bilha e Jakov ji wíiy və, wùn wun shiíy.

⁵Bilha bóŋ bvəm wùn Jakov, e fùm wán lumèn.

⁶Mo wù fùmèn bey, Racel suúy jii, «Nyùy tàr ne, e yèn ji m dzə̀ á tìítiy, e kfə̀n yù tóŋ yém, e nèn fò mo wán lumèn.» Bìʼ bey, wù nèn shù yír wan ji Dan[72].

⁷Bilha kfən bòŋ bvəm, e dzə̀ə́ wan Jakov wùmòʼ woo lumèn.

⁸Racel suúy jii, «M tsə̀y ne kóy vèr jèmèr yem, e ghàʼ wun.» Wù nèn shù yír wan ji Navtali[73].

⁹Mo Lea yenen ji bó yòʼ dzə̀ wun dzəə dzə̀ə́, wù lí Silpa woo wánlè wiíy wo wù lim fo wun, e fò e Jakov ji wíiy və.

¹⁰Silpa bóŋ bvəm wùn Jakov, e nèn fùm wán lumèn.

¹¹Lea suúy jii, «Á vishí ve juŋ vi a, e nèn shù yír wan ji Gad[74].»

¹²Silpa kfən bòŋ bvəm wùn Jakov, e dzə̀ə́ wán lumèn.

¹³Lea nèn sùúy jii, «M shéʼri feyì, vikìy wíy a yòŋ mo ji ŋgaà kisheʼrì. Wù nèn shù yír wan ji Asher[75].»

¹⁴Wáa dzə e ghan se vé‑eè tín sáŋ ye dzəə̀n *wit, Ruben dù, e yèn kifú ke bór ki é kwaʼ, e tìn, e wìy fò e yè wov Lea. Racel nèn sùúy e Lea jii, «Kii wò, ku fò mo kifú ke bór ki ke wan wò wìyìn shó.»

¹⁵Lea bìnèr jii, «À sə̀ lúm wom, la kí yòʼ ghèén wò à? À kfə̀n sí taʼ e sə kifú ke bór ki ke wan wom wìyìn shó à?» Racel bìnèr jii, «Aà lòo dzə, e fò mo kifú ke bór ke wan wò wìyìn shó, áà yiì shìíy vèn Jakov vitsə́ʼ vé lán vi.»

¹⁶Jakov wáa wìy fó kwaʼ e ŋkuùr foo fèy, Lea fəə́, e dù, e yèn wun, e sùúy sho jii, «À kér fó shiíy e mò vitsə́ʼ vé lán vi, bìʼ fo m kì yunen ne wò e kifú ke bór ki ke wan wom kì wìyìn shó.» Wù suúy bey, wùn wun nèn shìíy vitsə́ʼ vee shooy.

¹⁷Nyùy yú bunrì Lea, wù bóŋ bvəm wùn Jakov, e dzə̀ə́ wán lumèn wo wù meen ji tàn.

¹⁸Lea suúy jii, «Nyùy laàmé ne mo, bìʼ fo mò‑oò foon wán wom lìm e lum wom ji wiíy.» Wù nèn shù yír wan ji Issakar[76].

¹⁹Lea kfən tìím bvəm, e dzə̀ə́ wán lumèn wo wù meen ji ntuùfú.

²⁰Á bèy, Lea suúy jii, «Nyùy bùʼ ne mo e mbùʼmé wo juŋ. Lum wom yíi a ghvəm mo lèn, bìʼ fo m dzəən ne wón və́ vee vilum ntuùfú.» Wù nèn shù yír wan ji Sebulun[77].

²¹Wáa dzə fo bàm, wù dzəə́ wán woo wiíy, e shù yír ji Dina.

²²Nyùy nèn lò, e shàm mendzən me Racel, e yù bunrì rə́, e mvə̀ʼ kidzəə́y kfə́.

²³Wù bóŋ bvəm, e fùm wán lumèn, e nèn sùúy jii, «Nyùy tsə̀ʼ ne liy fo mǒ wùn.»

²⁴Wù nèn shù yír ji Joosev[78], e sùúy jii, «NYÙY TÀR ku dzə̀sì mo wùmòʼ woo wán lumèn.»

²⁵Mo Racel dzəən Joosev bèy, Jakov nèn sùúy e Laban jii, «Màʼtì mo, é m wáa kfən e bàm fó laʼ, e věr wòŋ.

²⁶Fó ri vikìy vémé wùn à wón vémé e mò, é m wáa dù. M lìm ne fo wò bìʼ áwune, aà kì sá mo m lìmèn kijuŋ.»

²⁷Yii bèy, Laban suúy e wun jii, «Aà fen yèn koŋ ye m kér fo wò, à gòʼ, é wòsò wáa dzə. M shwèŋ ne, kí dín ji NYÙY TÀR səə̀vì ne mo bìʼ wò.

²⁸Yòŋ mo vilaʼày vé vi dzəə̀n, é m fó.»

²⁹Jakov bìnèr jii, «Wówò kitú ké, à kì mo m lìmèn ne fo wò, kfə̀n kìíy mo nyám sé si kùʼùn ne e mǒ kiwo.

³⁰Mò‑oò wiy, aà kér nyám si shishàr, lèn, a sí sì nyanyày. NYÙY TÀR səə̀vì ne wò, e səə̀vì virə́ʼ vidzə̀m ve mò‑oò leey nyám sé fo. A m gòʼ, a lìm fo wò lèn, bo m yíi a leéy sa fo kfə́ə yémé é ghàn ka?»

³¹Laban dzə́r shó jii, «Vilaʼày vé vi dzə̀ é le?» Jakov bìnèr jii, «M yòʼ taʼ vilaʼày. M yíi a yiír nyám sé, a leéy fo fo, aà ben yiì kinyo ke m suuyì.

³²Màʼtì, é m nəə́ e wò mvə̀m ŋgoo bvəy, e fə̀tí bvə́y se njiì se sí kér vishom ve sənér ví sidzə̀m, à wón njiì ve sənérí wùn à bvə́y se loŋ se sí kér vishom ve fəvír ví, kìn vishom vímóʼ ví, bo sì vilaʼày vém bey.

³³Wíy lóo dzə e ghan se sí wiyì, à lóo tàr vilaʼày vém, áà nèn yèn suuyrú wom. Aà wìy yèn bvəy loŋ ye yì yòʼ kér kishom ke fəvír kí, kìn keé le, à wàn njiì wo wù yòʼ sə́né, bo m shòŋ shóŋén.»

³⁴Laban bìnèr jii, «M biìmé, kí kú a dzə mo à suuyin.»

³⁵Yii bèy, wáa dzə e kishiíy fóo fèy, Laban tàr vibév wùn à bvə́y se sí kér vishom ve fəvír ví, à wón njiì ve sənérí adzə̀m, e nèn fò e wón vəə́ ji á wáa leéy a fo fo.

³⁶Wùn à wóné nèn lèʼér bvə́y sìy fo Jakov, e bàr wún, e dù sho ntàmda, ye a dzə̀ wìr ghàn moo vishiíy vitaár bèy, e bóo meé fo. Jakov nèn sìíy, a leéy kibér.

³⁷Jakov nèn lò kfə́, e tàʼ tám se vici ve á yii yuvì, ví wàa fər fərín fó mvəm, e nèn yùv e viliŋ viliŋ, sí wáa shòmkìr shòmkìn. Vicí vin vi‑iì dzə̀ vé *popar, *almon wùn à *plen.

³⁸Wù lo, wù wàa lì tám se vici se wù yùvìn siy, a way e ndzəv ye bvə́y si‑iì nó mendzə́v fó fo, sí wiy, lóo no mendzə́v, sí wàa yen. Mo bvə́y si‑iì wiy ji sí nó mendzə́v, sí wàa koonín,

³⁹lóo koonín, lóo yen vicí ve yuuvìn viy, bo wón ve sí dzəə adzə̀me yíi a ker vishom.

⁴⁰Jakov‑iì lo, wù fə̀tí viyìy vé bvəy fo Laban mvə̀m bvəy. Vibév vi lóo koo viyìy vé bvəy vìn, wù nèn bìnèr, sí wàa leéy sé Laban se sí kér vishom wùn à se sənér sí ji sə́ sí lóo dzəə́, é wóné wáa ker a vishom. Mo wù‑uù yii bèy, bvə́y sə́ sí nèn a kùʼ, wù nèn tòʼnín fo sé Laban si.

⁴¹Kfə́n lóo dzə e ghan se vibév vi koó viyìy vé bvəy ve tavkín ví, wù nèn neèr tám se vici se yuuvìn siy e bvə́y sí si, e ndzəv ye sí yii nó mendzə́v fó fo, ji sí lóo koonín, é sí wáa yen.

⁴²Yii bèy, lóo dzə bvə́y se sí yòʼ kér vitaáví, la wù yòʼ dzəə neèr. Á bèy, bvə́y se sí yòʼ kér vitaáví sí nèn a dzə sé Laban, se tavkín sí nèn a dzə sə́.

⁴³Jakov ku nèn a kùʼ, a kùʼ, a ker káv e ŋàŋ. Wù‑uù kér ŋgoo se bvəy, kér nyám se á yoŋ ji akamer wùn à vimbèʼbìy ví, à wónlě vikìy wùn à vee vilum ve á lim fo wune.