Read Lamnso Kèʼlo 33 Bible Online

Kèʼlo 33 - Lamnso bible

Kèʼlo 33

¹Jakov lòo lò fo fo, e màʼ sí, e yèn Esav, a wù wiy wùn à wíri ghii kweè. Wù nèn jàv wón, e fò ámóʼó e Lea wùn Racel, e fò kibér e vikìy vee abaà ve wù‑uù lèmèné,

²e nèn tìír vikìy ve lemèn víyi wùn à wón véví fó mbìy, Lea wùn à və́ vee wóné wáa dzə fo kintìntìn, Racel wùn Joosev nèn sə̀r bám.

³Jakov kitú kfə́ nèn shèm aáwuné mbìy, a dù, a tsəm ndzəə́, a laʼ kitú e nsay. Wù yiì bèy kàŋ saàmbà, e bóo meé e fər və Esav si.

⁴Esav ló kfə́, e tùmnín, e baàmé wun baamén, e nyòʼtì, kitú ki lùm áwune, á dìynìn.

⁵Esav lòo leéy, e yèn vikìy wùn à wóné, e dzə̀r jii, «Víne dzə̀ ala?» Jakov bìnèr jii, «Dzə̀ wir msòŋ wo Nyùy bùʼùn mo woo wánlè wò lìm sho.»

⁶Vikìy ve lemèn viy wùn à wón véví wìy fo mbìy, e tsə̀m ndzəə́, e làʼ kitú e nsay e Esav si.

⁷Lea wùn à və́ vee wóné wíy sá, e tsə̀m bey. Fo bàm, Joosev wùn Racel nèn wìy, e kù yiì sa réŋréŋ.

⁸Esav dzə́r jii, «M kì lòo wìy, e yèn ŋgoo se nyàm sigháʼán, à kì wiy sho ji ka?» Jakov bìnèr jii, «M kì wiy sho ji wòsò fiʼ tàrnín kiwó.»

⁹Esav bìnèr jii, «Fər wòm, m sí kér kéŋ e ŋàŋ, ku lèm nyám see shooy ji sé.»

¹⁰Jakov sháʼnín, e kù a lon jii, «Kii wò, ku sə̀, é wòsò tárnín kiwó. À kì səə̀sí mo bey, m yén sí yé, wáa dzə mo m shòv a dzə̀ á sí Nyùy bèy.

¹¹M lón wò lónén ji à ku sə̀ á fómo wo m wìyìn shó ji wo və̀n, é wó yesòo tárnín. Ku sə̀, bìʼ fo Nyùy kòŋèn ne mo, e bùʼ e kéŋé é ŋàáŋàŋ. Jakov ku cìʼtí Esav bèy, wù sə́ fómo və və̀y.»

¹²Esav nèn sùúy jii, «Wòsò wáa dù, é m wáa dù fo mbìy.»

¹³Yii bèy, Jakov suúy e wun jii, «Kitù kem, à kì ji wón vémé dzə̀ə́ aŋeérín, a nyám see ayǐy won sí dzəə́ nyoor wón vév. Aá lòo dzə e kàn, sí ghán cércér, bo ndzə lóo ji, é sí kpúkír.

¹⁴Kii wò kitù kem, kú a dù fo mbìy. Vèr à nyám si, à wóné yíi siíy, a jùmrì wò fo bàm. M kù yíi a ghan ji weè weè vèr à wóné, à nyám si mo vitaáví vér ví dzəə̀n, e meé e ghan se wòsò kfə̀n yíi tárnín e Seir.»

¹⁵Esav suúy jii, «A sì bey, bo mo‑óò maʼti wír vém ámóʼó e wò.» Jakov dzə́r shó jii, «Shií dzə̀ wo gha? Ku màʼtì mo à səəsin ne mo bey.»

¹⁶Wù suúy bey, Esav nèn bìnkìr, e lì kiwuú é dzəə̀ Seir.

¹⁷Jakov nèn lò kfə́, e dù a dzə̀ é Sukkot[85], e nèn bàʼrì lav rə fó, e kfə̀n tùy vibàn vé nyàm sə́. Á kinyo ke kí yiìn, bo á wáa yòŋ kirə́ʼ kee shooy ji Sukkot.

¹⁸Á mo Jakov‑iì loòn fó Paddan‑Aram, e ghàn kijuujùŋ, e dù, e mèé e ŋkàlaʼ Shekem e wòŋ Kanan, e nèn beè e kirə̀ʼ kímóʼ kí e ghaa ŋkàlaʼ yee shooy.

¹⁹Kirə́ʼ kin ki‑iì dzə̀ ké wón Hamor, Hamor wo yì‑iì dzəə̀n tàr à Shekem. Jakov yún kirə́ʼ kee shooy mbàm wií, e tùy kibàn kfə́ fó,

²⁰e kfə̀n bòm *kíy cù fo, e shù yír ji El Elohe Isray.[86]