Read Lamnso Kèʼlo 37 Bible Online

Kèʼlo 37 - Lamnso bible

Kèʼlo 37

¹Jakov ku nèn a dzə e nsay Kanan fo tàr wov‑iì dzə̀ʼə̀mèn ne moo kiŋgwìy.

²Kimfèr ke Jakov wùn à kfə́ə rə́ kí nén a dzə jii, Joosev‑iì mee ji kiyá nshòv saàmbà e ghvə̀m, a wùn aàfə́r vəə́ kù‑uù sí shiy anjìi tàr wov wùn à bvə́y si. Mo wù‑uù ghán wùn aàfə́r və́ vee wón Bilha wùn Silpàa, wù‑uù lo, wù nyàʼtí, a fèr liì kisaŋ wo áwune‑eè kérí e tàr wov.

³A Jakov‑iì kòŋ Joosev, e shaà wón və́ adzə̀m, bìʼ fo wù‑uù dzəən Joosev, a wun woo Jakov dzə́n ne. Wù nèn lò, e tàr ndzə̀y seé kilùm se sí‑iì kér kóy se da si, e fò e Joosev.

⁴Mo afə́r Joosevi yenen ji tàr wov koŋ a wun e ŋàŋ, e shaà áwune adzə̀m, á nèn a bàn wun, a màʼ lám shó.

⁵Njèm nèn wìy lò, e shì Joosev, wù bí afə́r və́ shó. Njèm rə̀y nèn yiì, á màysì, a bàn wun e ŋàŋ.

⁶Wù‑uù bí áwune shó, suuy jii, «Vèn ku yù njèm ye yì kì shiin mo.

⁷Vèsən‑eè dzə́ e sum, kúr vitiír vé saŋ é mbeʼ sí mbeʼ si. Yéem yee mbeʼ nèn lò, e tìím tìítiy, sén sí kaárí yéem, e tàr, a gvəʼtí, a ghvəm.»

⁸Afə́r vəə́ dzə́r e wun jii, «À kwaʼ ji dzə̀ à wìy kòʼ vifon, a saʼ ver a?» Njèm sə́ wùn à jí sə́ sí kfən yiì, á màysì, e cì kwán é bàm wó.

⁹Njèm yìmòʼ kfən shì Joosev, wù ku kfə̀n bì afə́r və́ jii, «Njèm yìmòʼ kfə̀n shì mo, m yén shúy wùn à ŋwee, à mejiy mè nshòv mòʼón e ghvə̀m, aá gvə́ʼtí e mǒ si.»

¹⁰Wù kfən bì sá tàr wov. Tàr wov wáa shìvìr, a suúy jii, «Lá à yòʼ dzəə wìy fèr kfə́ə njèm yee ben. À kwaʼ ji dzə̀ vèr à yè won, aàfə́r vée wìy gbù rú ben e wò si à?»

¹¹Afə́r Joosevi‑iì yú a dzə̀ nyár rə́, yii bèy, tàr wov ku yòʼ lèm kfə́ kinyo kìn e vifii, a lò, a kuumé.

¹²Wáa dzə e kishiíy kímóʼ kí, aàfə́r Joosevi lí ne nyám se tàr wov, e dù sho e kwaʼ e Shekem ji á du, e yiír,

¹³Jakov nèn sùúy e Joosev jii, «M lo tum wò, áà du é Shekem fo afə́r vée shiy nyám si.» Joosev bìnèr jii, «M dzə̀ kibáʼtín.»

¹⁴Tàr wov suúy shó jii, «Ku dù, e lèéy ji afə́r vé wùn à nyám si sà dzə̀ é kwaʼ kijuŋ a, e wìy, e sùúy e mò.» Wù nèn tùm wun fo mboʼ Hebron foo fèy, wù wáa dù e Shekem.

¹⁵Joosev dù, e mày fo, wìr wùmòʼ yén, a wù ghán, ján e kwaʼ, e dzə̀r shó jii, «À ghán, taʼ a dzə̀ ka?»

¹⁶Wù bìnèr sho jii, «M ghán, taʼ a dzə̀ afə́r vém ve á leey nyám si. À yén rú áwune á?»

¹⁷Wìr və̀y bìnèr jii, «Áwune kì lò ne. M kì yù, aáwune yoŋ ji á dú a e Dotan.» Joosev ku nèn a jùmrì afə́r və́, e lòo dù, e màʼ sí, e yèn áwune é Dotan.

¹⁸Afə́r Joosevi lòo màʼ sa sí, e yèn Joosev, a wù dzə̀ə́ ntàmda, e nèn a ba menàŋ mo á lo, e ghan, e bóo yuyrí wun.

¹⁹Á nèn a kfə̀ynìn jii, «Vèn yén, ŋgaà njèm və̀y və̀sə, a wù wiyì.

²⁰Vèn wáa wìy, é vèsən yúyrí, e màʼ dzə́n é bii wúmóʼó. Vèsən yií kfə́n e bàm, aá suúy e tàr wòsən jii, nyàm kwaʼ yìmòʼ sìíy ne a e koò, e kfə̀r. Vèsən yii bèy, bo á laàr ne njèm sə́.»

²¹Ruben yú ntaŋ wov və̀y, e nèn a mùm ji wun boyir á Joosev fo afə́rí wo, e lò sùúy kfə́ jii, «Lá vèsən yòʼ yùyrí wun yuyrín.

²²Lá vèsən yòʼ lì njò. Kí bòŋ, aá maʼ wun máʼan é bii é kwaʼ fèn. Lá wìr yòʼ sòy wun.» Wù‑uù suuy bèy, bìʼ fo wù‑uù taʼ e yìi wìy, e fəə́r Joosev fo bii, e siìr e tàr wov.

²³Joosev wìy, e mày fo afə́r vəə́‑əə̀ dzəə̀n, á nèn bàm, e shòʼóy kikúm ke tàr wov‑iì foon shó kìy,

²⁴e shùr wun, e màʼ e bii wo wú‑uù dzəə̀n kisáŋ, là mendzə́v shó.

²⁵Á màʼ bèy, e dzə̀ʼə̀m, e lòo yikír, e yèn mbèʼŋkùm wìr vee Ishmael, a wù wiy fo Gilead wùn aàkameri, aá béʼ vifá ve rəʼtìn vímóʼ ví, à kfəə́ se vilay vee *baam wùn à *mer, shaa, sə́y sho e Ejiv.

²⁶Juda wáa ghay wún áàfə́rí jii, «A vèsən yùyrí fər wòsən, e lìtì, bo séʼ dzə̀ ka?

²⁷A sì ji vèsən yúyrí yuyrín, bo bòŋ, aá fiine e wónlě way vee wír vee Ishmael vìne. Lá vèsən yòʼ lèmér wun. Dzə̀ fər wòsən, vèsən áwune dzə̀ mensə́ memòʼón.» Nshù yee shooy gheén afə́r və́, á nèn biìmé.

²⁸Wónlě way veé Midian vìyi lòo shaà, afə́r Joosevi fəə́r wun fo bii fey, e fiìnè wun kisha ke mbàm ke fəvír kí *ashekel mbaà. Á nèn lì Joosev, a dù sho e Ejiv.

²⁹Ruben yiì kfə̀n é bàm é bii fey, e tàʼ Joosev ntéŋ, e nèn sàr kikúm kfə́, a dìy.

³⁰Wù lòo kfən e bàm fo afə́rí kì dzəə̀n, e sùúy aáwune jii, «M tàʼ ne wán ntéŋ, m yíi yèe le?»

³¹Á nèn yiì lò, e seè wan kibev, e cùtì mensə́ e Joosev kikum,

³²e lì, e dù, e dìn e tàr wov, e yòŋ sho jii, «Leéy kifá ke vèr boŋen kí. Dzə̀ kikúm ké wan wò moo ŋgáŋ á?»

³³Jakov leéy, e kìíy, e bìnsí jii, «Dzə̀ kikúm ké wan wom Joosev. Yímóy, yímóy, nyàm kwaʼ yìmòʼ koò ne, e sàtì, e kfə̀r.»

³⁴Jakov nèn sàr kikúm kfə́, e màʼ vinsàʼ ve ndzə̀y, e bònen dìy kpú wan və ntàmda.

³⁵Wón və́ adzə̀m vee vilum wùn à vee vikìyí báʼtí, a səmér wun, wù tén, e kù a shèŋ kitú, a suúy jii, «M wíy a dù aàŋkfəə́ wòŋ, a m kù diy wán wom və̀n.» Wù yòŋ bèy, e kù nèn a dìy Joosev.

³⁶Wù wáa dìy, a wír veé Midiane siíy ne, e dù, e mèé e Ejiv, e fiìnè Joosev e Potifar wo yì‑iì dzəə̀n taà ntoʼ fòn woó Ejiv, a kfə̀n‑eè dzə̀ sá kitú ke vé rər ve vé‑eè shiy ntoʼ.