Read Lamnso Kèʼlo 39 Bible Online

Kèʼlo 39 - Lamnso bible

Kèʼlo 39

¹Mo vé way vee wír vee Ishmael vìyi yunen Joosev, e sə̀y shó e Ejiv bèy, wìr Ejiv wùmòʼ yún, a yírí dzə̀ ji Potifar, a dzə̀ taà ntoʼ Farao[94], a kfə̀n dzə̀ kitú ke vé rər ve vé‑eè shiy ntoʼ.

²Joosev ku nèn a rèŋ vikwàn e tàr wov lìm woo wír woó Ejiv və̀y lav. NYÙY TÀR wáa sə wun, vinyo və́ ví wáa ghan kijuŋ.

³Mo tàr wov lìm yenen ji NYÙY TÀR dzə̀ á wùn Joosev, yii, a vinyo və́ ví du fo mbìy,

⁴wù nèn a kòŋ Joosev e ŋàŋ, e lì wun ji wán və lìm woo jwáʼ, wo wù wáa shìy wun. Wù kfən lèm ji kitú ke vé lìm vee wun lav adzə̀m, e wày kéŋ rə́ e dzə̀m a dzə̀ e Joosev kiwo.

⁵Kèʼ fo ghan fóo fèy, NYÙY TÀR nèn màʼ kisəəvì e wìr woó Ejiv və̀y lav, e màʼ e kéŋ rəə́ e dzə̀m, bìʼ Joosev.

⁶Wù màʼtì kéŋ rə́ e dzə̀m e Joosev ji wù wáa leéy a fo fo, e làa yòʼ dzə́ə a leéy a kifá kímóʼ kí e wun lav, bánlà vifá və́ vé yi. Joosev‑iì kér mbom ye juŋ, e kfə̀n tò sí.

⁷Wìy lòo dzə e kishiíy kímóʼ kí, wiiy tàr wov lìm wáa yaŋrí wun, a kàn jii, «Wòsò ku neèm.»

⁸Joosev sháʼnín, e sùúy sho jii, «Leéy mo tàr wor lìm wayin ne vifá vidzə̀m e mǒ kiwo, a bó wù yòʼ dzəə́ leey fo kifa e laʼàn, kù sí leey mo kifá kfə́ kidzə̀m.

⁹Sáʼ vèr wune dzə̀ é lav fèn réŋréŋ, a bó wù yoʼ kìm kifá kímóʼ kí fo mò, e shaà wò wo à tíy və̀n, bìʼ fo à dzəə̀n wíiy və. A dzə̀ m ghàn é le, e bóo kfə̀n yiì kfə́ə joònè vən, é wú yii, é m bír fo Nyùy si.»

¹⁰Wù kú a ci kwán e Joosev bàm mo kishiíy kí‑iì dzəə̀n ji wù kù kér a fóo neèm e wun, la wù yòʼ biìmé, e neèm sho, kìn ji wù suúsín wùn wun.

¹¹Kfə́n a dzə e kishiíy kímóʼ kí, Joosev nəə́, a lìm lim e lav, a bó vé lìm ámóʼó yòʼ dzə̀ fó,

¹²wiíy və̀y tsəə́mé fó vikum, a kàn jii, «À kù neem e mò.» Joosev shwèy vikúm é wo wo, e meè é ndzə.

¹³Mo wiíy və̀y yenen ji wù shwèy ne a ndzə̀y e wun kiwo, e meè á e ndzə,

¹⁴wù fúŋ vé lìm veé lav, e yòŋ aáwune jii, «Vèn yén virom vi. Wìr Hibru wo taà lav wom‑eè wìyìn shó və̀y sí shoor vèsən. Wù nə̀ə́ ne e mǒ lav kishìíy, a ghatí mo, é bo m rəə́mé.

¹⁵Wù yù shirəə́, e bóo shwèy ndzə̀y, e mee e ndzə.»

¹⁶Wiíy və̀y lèm ndzə̀y siy, e dù, e meé e ghan se lum‑eè wìyìn fó laʼ.

¹⁷Lum wìy, wù naàrì kinyo ke kí kì kooyin, a suúy sho jii, «Kwàn woo wir Hibru wo wò‑oò wìyìn shó e laʼàn və̀ne sìíy ne, e wìy, e nə̀ə́ e mǒ lav kishìíy, a màʼ kinyo vèr wun.

¹⁸M rəə́mé, é bo wù shwey ndzə̀y sə́ sin, e meè é ndzə.»

¹⁹Tàr à Joosev lìm yuúrí kinyo ke wiíy fìʼtìn, kí nəə́ e wun vighìy.

²⁰Wù nèn wày Joosev e lav sháŋ fo vé‑eè lem vé sháŋ veé ntoʼ. Joosev wáa lìm

²¹sháŋ bey, NYÙY TÀR kú a dzə wùn wun, a leéy fo wun, e yiì, kitú ke anshìy vé sháŋé kí wáa kòŋ wun.

²²Wù nèn lèm Joosev ji wù wáa leéy a fo vé sháŋé, e kfə̀n a leéy fo vinyò ve ví‑iì shaa e lav sháŋ vidzə̀m.

²³A bó wù yòʼ kfə̀n dzəə́ sov kinyo ke Joosev‑iì yii, bìʼ fo NYÙY TÀR‑iì dzəə̀n wùn Joosev, yii, a lim rəə́ du duùn fó mbìy.