Read Lamnso Kèʼlo 4 Bible Online

Kèʼlo 4 - Lamnso bible

Kèʼlo 4

¹Adam nèn lò, e shìíy wùn wiiy və Efa. Wù bóŋ bvəm, e dzə̀ə́ wán lumèn, e yòŋ jii, «M kòóy ne wán é vitaaví vé NYÙY TÀR.» Wù nèn shù yír rə́ ji Keen[24].

²Fo bàm, wù kfən tìím bvəm, e dzə̀ə́ fər Keen, e shù yír ji Abel. Abel kúy, a lèm nyám si, a Keen lim súm.

³Wáa dzə e ghan símóʼ sí, Keen lì vifá vímóʼ ví ve wù‑uù kavin fó sum, e wìy, e cù NYÙY TÀR shó.

⁴Á bèy, Abel táy wan nyàm woo dzəə́ mbìyi, e seè, e tàr mbìv se juŋ si, e cù sa NYÙY TÀR shó. NYÙY TÀR yén, kí bòŋ wun, e səə̀sí wun wùn à cu rəə́.

⁵Yii bèy, wù ŋwáy Keen wùn à rə́ yee cúu. Keen nèn a shwiíy kilòŋ é ŋàŋén, a tsəmrí rə́r.

⁶NYÙY TÀR yén bey, e dzə̀r shó jii, à shwiiy kilòŋ kfə̀n tsə́mri rə́r bìʼ ka?

⁷Aà kì yiì réŋ, m wàa ten wò vèn à cu yée á? Kinyo ke bi kí dzə wuú yé, a kí yíi ghaʼ wò, aà ben dzə̀ là fóo bàʼàr, a yiì a dzə̀ kinyo ke réŋ kí.

⁸Keen nèn lò, e bì fə́r və woo Abel ji wùn wun du á e kwaʼ.[25] Á dù, e mèé fo, wù koó Abel, e yùyrí.

⁹NYÙY TÀR nèn dzə̀r e Keen jii, «Abel woo fər wò bèé?» Wù bìnèr jii, «M yoʼ kìíy. Yii leey mo fo wun à?»

¹⁰NYÙY TÀR nèn kfə̀n dzə̀r shó jii, «À mùm kin a dzə̀ ka? Mensə́ me fər wò mè tóŋ fo nsay, kan mo ji m siir ŋkfə́tír.

¹¹Lèn və̀n, m shòv ne wò. Mo à yuyrin fər wò, nsay nó mensə́ mvə, bo yì kù mèŋ ne wò bèy.

¹²À wíy a lìm kifá, é la kí yòʼ a bòŋ. À wíy a ghan ghanén é yuv ji làŋgày e kitu ke nsay, là meemè.»

¹³Keen nèn sùúy e NYÙY TÀR jii, «Ŋgeʼlàʼ yem kùʼ ne e ŋàáŋàŋ, e shaà vitaáví vém.

¹⁴Leéy ri e yèn, à jùm ne mo lán fo wòŋàn, a bó m yòʼ dzəə́ wìy a dzə fo wò mentsə̀m. M sí wìy a ghan e yuv ji làŋgày. Bo a wìr yèn mo, a fèn dzə̀ feé, bo wù sí yúyri.»

¹⁵Yii bèy, NYÙY TÀR suúy e Keen jii, «Bó yòʼ dzə̀ bey. A wìr yùyrí wò, bo rə́ə yee ŋgeʼ yíi tav, e shaà ye, kirə́ʼ saàmbà.» NYÙY TÀR nèn səə̀m Keen ji wìr lóo yen wun, é la wù yòʼ dzəə yùyrí.

¹⁶Keen ku nèn lò fo NYÙY TǍR si, e dù, a dzə e wòŋ woo Nod. Nod və̀n‑eè dzə̀, e lò fo Eden, a dù e mbìv ye shùy yii tó fo fo.

¹⁷Keen‑eè shìíy wùn wiiy və, wù bóŋ bvəm, e dzə̀ə́ Enok. Keen wìy lò, e bàʼrì ŋkàlaʼ yìmòʼ, e fò yír ŋkàlaʼ yee shooy moo yé wan və bey.

¹⁸Enok nèn dzə̀ə́ Irad, Irad dzəə́ Mehujael, Mehujael dzəə́ Metushael, Metushael dzəə́ Lamek.

¹⁹Lamek‑iì kér vikìy abaà, wùmòʼ‑oò dzə̀ Ada, wùmòʼ Tsilla.

²⁰Ada‑aà dzə̀ə́ Jabal. Jabal nèn wìy a dzə tàr à wìr ve vé‑eè shiiy e tàv sí, kfə̀n kér nyám si.

²¹Yír fər vəə́‑əə̀ dzə̀ Jubal, a Jubal və̀n‑eè dzə̀ tàr à wìr ve vé‑eè kum lúŋ, kfə̀n tóŋ loŋ.

²²Tsilla nèn lò, e dzə̀ə́ sa wán lumèn, aá yoŋ ji Tubal‑Keen. Dzə̀ wun wo wù‑uù kèʼèn kilam ké a tòn vifá ve lìm e visha vi, e kfəə́ se vishà si jeéy jeéy. Tsilla wùn Lamek kfən kòóy wán woo wiíy, aá yoŋ ji Naama.

²³Kishiíy kímóʼ kí wìy fəə̀, Lamek yòŋ e vikìy vəə́ jii, «Ada, vèn Tsilla yú kinyo ke m suuy ki. Ven vee vikìy vém, vèn yuúrí é mbòŋén. Wìr lémer mo, bo m kù yúyri. Kìn lò wánlè, e sòy mo, bo m kù yúyri wun.

²⁴A ŋgeʼlàʼ wìr wo wù yuyrin Keen dzə̀ kirə́ʼ saàmbà, bo ye wìr wo wù yuyrin mo féyì, yì yíi a dzə kirə́ʼ nshòv saàmbà e msaàmbà.»

²⁵Adam nèn kfə̀n shìíy wùn wiiy və. Wù bóŋ bvəm, e dzə̀ə́ wán lumèn. Wiíy shú yír ji Set[26]. A wù‑uù shu bèy, suuy jii, «Nyùy fò ne mo wán, wù lí kilíŋ ke Abel wo Keen‑eè yuyrin.»

²⁶Set nen wìy kòóy wán lumèn, e shù yír ji Enosh. Dzə̀ ghán sin se wíri‑iì kèʼèn, a cù Nyùy, a yòŋ yír NYÙY TÀR.