Read Lamnso Kèʼlo 44 Bible Online

Kèʼlo 44 - Lamnso bible

Kèʼlo 44

¹Áwune yíkír, e màysì, Joosev bìn, e sùúy e kitú ke vé lìm kee wun lav ki jii, «Wáy vifá ve yi vi e wír vìné vibàm mo a dzə̀ nyám sév sí bèʼèy, e siìr mbàm se wìr si e wun shùu kibàm.

²Lì sá bàr wom wo á fèrìn e kisha ke mbàm ke fəvír kí, e wày e wìr woo wánlě shùu kibàm wùn à sə́ see mbàm se wù kì wìyìn ji wun yún vifá ve yi sho si.» Wù ku nèn yiì réŋréŋ bey mo Joosev kì suuyin.

³Ndzə bvəə́shí, e jàv, á màʼtì áwune, wùn à vimbèʼbìy vév ví wáa dù.

⁴Áwune lò fo ŋkàlaʼ foo fèy, e ghàn shintàm, Joosev suúy e kitú ke vé lìm kee wun lav ki jii, «Jùmrì áwune cér, kooyì, à dzə̀r jii, ‹Yiì ka bo vèn lo, e siìr kinyo ke juŋ ki e ke bi kí? Vèn shòŋ bàr tàr wor wo á fèrìn e kisha ke mbàm ke fəvír kí bìʼ ka?

⁵Bó yòʼ dzə̀ bàr wo tàr wor yii nó fo fo, kfə̀n shwéŋ fú shó à? Vèn jày kinyo ke ghaʼán kí féyì, bóo shoŋ.› »

⁶Ŋgaà lìm Joosev və̀y ku nèn jùmrì áwune, e kòóy, e nèn tiìsí ntum rə̀y.

⁷Á bìnèr jii, «Kí ghàn é le, bo tàr wor wáa yòŋ kin kee kinyo? Bó yòʼ dzə̀ kí kòóy ji ver moo akwàn vəə́ yii kinyo kee bey.

⁸Leéy, e yèn mo vèr‑iì kfənen fó Kanan, e siìr mbàm se vèr‑iì yenen e věr shuù se vibàm e wò. A dzə̀ vèr yèe le, e bóo kfə̀n a shoŋ visha ve mbàm fo tàr wór lav, kìn dzə̀ ve fəvír ví, kìn ve baar ví.

⁹Bo dzə̀ ji a kí kòóy ji wáa dzə wír fo vèr, á kù yùyrí ŋgaàŋ, é kibér ki wáa dzə akwàn vé.»

¹⁰Wù bìnèr jii, «Bo dzə̀ réŋ mo vèn suuy bèy. Yii bèy, kù jòʼsì wír wo á yenen shó, wo wù yíi a dzə kwàn wóm, é kibér ki boy.»

¹¹Wìr dzə̀m ku nèn gìtì, e sə̀ʼə́r kibam kfə́ é nsay, e mvə̀ʼ.

¹²Wù kèʼ tar fo ké woo ŋgàywìr ki, e jòʼsì e ké wo bàm kí, e nèn yèn bàr woo shooy e Benjamin woo bám yév kibàm.

¹³Kí yiì, wúné beémé áwune, á sàtì ndzə̀y sév. Wìr dzə̀m nèn lò, e kùr vifá e vimbèʼbìy ví ndzə̀m, a kfən sho e ŋkàlaʼ.

¹⁴Juda wùn aàfə́r vəə́ wáa kfən e Joosev lav, a wù kù dzəə́ dzə́ fo. Á gbùkìr e si wo,

¹⁵Joosev dzə́r jii, «Vèn mùm kee ben a dzə̀ ka? Bó vèn yòʼ kì ji a dzə̀ wír moo mo ben, wù kù tàʼ vinyo e fù a?»

¹⁶Juda kóʼtí, e bùʼ wó jii, «A dzə̀ vèr kfə̀n sùúy ji ka lèn e tàr wor? Kinyo ke a dzə̀ vèr kfə̀n sùúy ki bèé? A dzə̀ vèr kfə̀n tùnrí kitú kér é le? Nyùy kù yèn ne njò akwàn vé. Ver víne, aá sì ji akwǎn tàr wor, vèr à wìr wo á kì yenen bàr e wun kibàm.»

¹⁷Joosev bìnèr jii, «Àáy, yòʼ dzə̀ m mùm bey. Kù jòʼsì wír wo á yenen bàr e wun, wo wù lo, a dzə kwàn wóm. Vèn wáa kfən kén kí é bàm ji nyaáŋ, e dù yèn tàr won.»

¹⁸Juda nèn kòʼtí fo wun mentsə̀m, e sùúy jii, «Kii wò taàtá wom, ku màʼtì, é kwàn wóo súŋnín e wò kicaárín. M lón ji lá à yòʼ shwìíy a kilòŋ fo kwàn wóo. M kì ji à dzə̀ sáa moo fon kitú kfə́.

¹⁹Taàtá wom‑eè dzə̀r áàkwàn vəə́ jii, vèr sà kér kitàr, kìn fə́r woo lumèn wùmòʼ á?

²⁰Vèr bìnèr e taàtá wor jii, vèr kér a tàr, a wù dzə̀n a ne, kfə̀n kér a fə́r woo lumèn, wo kitàr kí‑iì dzəən e wun viŋgày vé wìr, a fər və woo lumèn‑eè kpù á ne, bér wun fo wun kiyìy, a tàr wor kòŋ a wun e ŋàŋ.

²¹Taàtá wom nen yòŋ aàkwàn vəə́ á ji vèr du, e lì a wun, e sə̀y shó fèn, é taàtá wom yén á wun e sí rəə́.

²²Vèr suúy e taàtá wom jii, a dzə̀ á la wan woo shooy yòʼ lò fo kitàr kí ghaŋ. A wù lò, bo kitàr kí kpù á ne.

²³Taàtá wom nèn sùúy aàkwàn vəə́ jii, a dzə̀, a bó kinjòʼsìbàm kér kí wíy á vèr áwune, lá taàtá wom yòʼ dzəə wìy yèn á sí yér.

²⁴«Vèr kfə́n é bàm, e dù, e yèn kwàn wó woo tàr wor, e fìʼtì jí se taàtá wòm sho sidzə̀m.

²⁵Tàr wor ló, e kfə̀n yòŋ ji vèr kfə́n á bàm, e yùn á viyíkìr shishàr.

²⁶Vèr bìnèr ji bó yòʼ dzə̀ vèr sə̀y á fo. A kì dzə̀ ji kinjòʼsìbàm kér kí kì du, bo vèr du, bìʼ fo a wù bùŋ, la vèr yòʼ kfə̀n dzəə yèn á sí taàtá wom.

²⁷Kwàn wó woo tàr worí nèn sùúy e vèr ji vèr kì sáa ji wùn wiiy və woo Racel‑iì dzə̀ə́ á wón vee vilum abaà cáʼcáʼ.

²⁸Wùmòʼ‑oò màʼtì á ne wun, a wun kì kfə́ ji nyám si‑iì kfə̀r á ne. E kèʼ fo ghan fóo fèy, bó wun yòʼ dzəə́ wìy yen a wun.

²⁹A vèr kfə̀n màysì və̀n fo wun, e lì, kinyo ki koóy wun, bo vèr yíi yiì, é wun wo kitú ki fərin ne kpú, e dù aàŋkfəə́ wòŋ e mensíy mè si.

³⁰«Lèn və̀n, a m lò, e kfə̀n é bàm là wán və̀n, bo tàr wor lo yen ji bó wàn yòʼ dzə̀, e nèn kpu, bìʼ fo dzəʼə̀m rəə́ dzə́ bèn, a yí dzə̀ wùn à yé wané kilàŋsìn. A kí kòóy bèy, bo vèr yiì ne, tàr wor kpú, e dù e sày e mensíy mè e si.

³²Fó a dzə̀sì, mò‑oò lo kàʼ tàr wor, e tìír kitú kém, e sùúy jii, a m dzə̀ là fó wìy kfən e wan və̀n, bo njò kù wíy a dzə a yéem, e wìy dù, e mày.

³³Lèn və̀n taàtá wòm, m yíi gòʼ fèn ji kwàn wó, e wǎn kiliŋ. Kii wò, ku màʼtì, é wù wáa kfən wùn aàfə́rí.

³⁴A siì dzə̀ m kfə̀n é bàm fo tàr wór wùn é le, a bó wàn yòʼ dzə̀ vèr wun? M fan fóo yen kinyo ke bi ke kí yíi koóy tàr wor.»