Read Lamnso Kèʼlo 47 Bible Online

Kèʼlo 47 - Lamnso bible

Kèʼlo 47

¹Á bèy, Joosev nèn dù, e sùúy e Farao jii, «Tàr wor wùn aàfə́r vémé wìy ne fo Kanan wùn à nyám sév sí, à vifá vév ví vidzə̀m. Áwune sì lèn e nsay Goshen.»

²Wù wáa suúy bèy, a wù dzə̀ wùn aàfə́r və́ ámóʼó ve wù kì shoʼtiné atàn, wù nèn dùŋrì e fòn.

³Fòn dzə́r aáwune jii, «Lim yéné yii dzə́ ka?» Áwune bìnèr jii, «Akwàn vəə́ dzə̀ á anshìy mo atàr véví‑iì dzəə̀n.»

⁴Áwune kfən sùúy e fòn jii, «Vèr wìy a ji á dzəʼti fen, bìʼ fo jìŋ dzəə̀n á e wòŋ Kanan e ŋàŋ, a bó nyám se akwàn və́ sí yòʼ kér a yí fo. Kii Fòn, á ku màʼtì, áàkwàn vəə́ dzəʼəm á e Goshen.»

⁵Farao nèn sùúy e Joosev jii, «Tàr won wùn aàfə́r vée wìy ne, e nə̀ə́ wò.

⁶À kér vitaáví fó nsay Ejiv. Ku dzə̀ʼə̀r tàr won wùn aàfə́r vée é mbìv ye juujùŋ. Lèm áwune, aá wáa dzə e Goshen. Aà kì wíri fo áwuné mvəm ve á kiìn lim yév, à lèm áwune, aá wáa leéy sa sém see nyám.»

⁷Joosev nèn lì tàr wov Jakov, e wìy sho, e dìn e fòn. Jakov bùn, e yòŋ ji Nyùy səəvi á fon.

⁸Fòn dzə́r e wun jii, «À dzə̀ viyá visìʼín?»

⁹Jakov bìnèr jii, «Viyá ve m beʼrin ne e nsay fèn vi dzə̀ á kishóv mtaár e wiì (130). Viyá vém ví dzə̀ vishàr, a kù dzə̀ ŋgeʼ ŋgeʼ. Ví yoʼ mèʼ ve atàr vémé‑eè dzəʼə̀mè aáwuné ghan.»

¹⁰Jakov kfən fò fon kisəəvì kfə́, bó a lò.

¹¹Joosev ku nèn dzə̀ʼə̀r tàr wov wùn aàfə́r vəə́ é wòŋ Ejiv fèy, e fò áwune kirə́ʼ é mbìv wòŋ ye juujùŋ ye yì dzəə̀n é Rameses réŋréŋ mo Farao‑oò suuyin.

¹²Joosev wáa fo vifá ve yi e tàr wov wùn aàfə́r vəə́, a fo e wìr dzə̀m wo wù‑uù dzəə̀n e tàr wóv lav, kù mo wír vee ŋgaàŋ lavi‑iì dzəə̀n.

¹³Jìŋ ye yì‑iì koon rə̀n‑eè dzə̀ e távín féyì, a bó kifá ke yi ki yòʼ‑oò dzə̀ é wòŋ wúmóʼó gheéy. Jìŋ nèn a yuy wír veé Ejiv wùn à veé Kanane yúyín.

¹⁴Joosev wáa fiìnè vifá ve yi aáwune, e nèn a baʼtí mbàm se wìr veé Ejiv wùn à sé wìr veé Kanan si sidzə̀m, a dù sho e ntoʼ.

¹⁵Mbàm si lòo mày fo wírí wo, wìr dzə̀m woó Ejiv nèn wìy, e yèn Joosev, a toŋ jii, «Mbàm sér sí mày ne. Fó ver vifá ve yi. Bó yòʼ dzə̀ vèr wàa kpukír, à wàa leéy leeyín.»

¹⁶Joosev nèn sùúy jii, «A mbàm sén sí mày ne, vèn wìy e nyám sén sí, e fò e mò, é m fó ven vifá ve yi.»

¹⁷Áwune nèn a wìy e nyám sév sí, nyám se ŋkoʼ wùn aànjìi, à bvə́y se loŋ si, aànàʼa, à vimbèʼbìy ví, e nèn a fo e Joosev, a sə vifá ve yi. Joosev kú a fo bèy, kiyá kee shooy ki lòo mày, nyám sév sí mày sidzə̀m.

¹⁸Mo kiyá kee shooy ki màyìn bey, áwune wìy, e yèn wun, e sùúy sho jii, «Tàr wor, bó yòʼ dzə̀ vèr lìtì kinyo fo wò gheéy. Mo mbàm sér sí màyìn ne, a nyám sér sidzə̀m si sì sé, bó kifá kímóʼ kí yòʼ kfə̀n dzə̀ shó, ke a dzə̀ vèr fò e wò, e shaà vitú vér wùn à nsay yer.

¹⁹A dzə̀ vèr màʼtì súm sér, sí dù é vinshaàrì, é vèr kpú jíŋ e wò si à? Yún ver wùn à nsay yer, e fò ver vifá ve yi, é nsay yer kfə́n ji ye Farao, é vèr wáa rèŋ vikwàn fo wun. Fó ver ŋgoòy se vifa ve yi, é la nsay yòʼ dzəə gòʼ kisáŋ, é vèr fiʼ lùŋ, e làa yòʼ dzə́ə kpukír.»

²⁰Joosev nèn yùn nsay Ejiv e dzə̀m e fòn yir. Wír veé Ejiv adzə̀me‑eè fiìnè súm sév, bìʼ fo jìŋ ye yì‑iì koon‑eè tavin é ŋàŋ. Nsay yee fó e dzə̀m nèn kfə̀n ji ye Farao.

²¹Joosev nèn bìnèr wír vee fó adzə̀m ji akwàn.

²²Yii bèy, bó wù yòʼ‑oò lo yùn súm sé atàá cù, bìʼ fo Farao‑oò laʼ áwune e vifá ve yi vi ghán sidzə̀m. Á kinyè ké kinyò ke kí‑iì yiìn, la áwune yòʼ fiìnè súm sév.

²³Joosev nèn sùúy e wíri jii, «M yùn ne ven, à súm sén sí lán, e fò e fòn. Ŋgoòy se vifa si sìne. Vèn li, e dù, a way.

²⁴Vèn wíy káv vifá, vèn jàv virə́ʼ vitàn, e fò kirə́ʼ kee kimòʼón ki e fòn, e nèn lì vee vikweè ji ŋgoòy wùn à viyíkìr ve vèn à wóné, à wír vee věn lavi.»

²⁵Áwune nèn sùúy e Joosev jii, «À tìn ne ver fo kpúu. Vèr biìmé feyì ji vèr yíi a dzə a akwǎn Farao.»

²⁶Á bèy, Joosev nèn lì kinyo kìy ji nsər nsay Ejiv, a yì dzəə́ tíy sho e shem lán, a yì dzə̀ jii, wìr káv kifá, wù jàv virə́ʼ vitàn, e fò kirə́ʼ kee kimòʼón ki e fòn. Kù‑uù jòʼsì súm sé atàá cù se sí yòʼ‑oò lo kfə̀n ji sé fòn.

²⁷Wír veé Israyi ku nèn a dzə e Ejiv, e mbìv wòŋ yee Goshen, a keŋ vifá fo, a dzəə́ wón, a kùʼ, a dzə nyanyày.

²⁸Jakov dzə̀ʼə̀m e Ejiv kiyá nshòv saàmbà e ghvə̀m, viyá və́ vé dzə̀ʼə̀m vidzə̀m vi wáa dzə nshòv saàmbà e mkweè e wiì (147).

²⁹Isray lòo meʼ mentsə̀m me kpu, e jàŋ Joosev, e sùúy sho jii, «Aà fèn koŋ rú mo, à wày kiwó ké e mǒ sar kibìy,[100] e kàʼ ji à yíi dìn koŋ yé e mò là kiloʼ. Lá à yòʼ dzəə̀mè mo é Ejiv fèn.

³⁰Ku dzəə̀mè mo áàtàr vémé ghaŋ. M kpú, à lì mo fó fèn, e dù, e dzəə̀mè fo vé‑eè dzəə̀mèn áwune.» Joosev nèn sùúy jii, «M wíy yiì mo à suuyin.»

³¹Isray suúy shó jii, «Yiì kilìʼ kí.» Joosev nèn lìʼ. Isray gvə́ʼə́r kitú e wun kitu ke kikun, a beèrì.