Read Lamnso Kèʼlo 48 Bible Online

Kèʼlo 48 - Lamnso bible

Kèʼlo 48

¹Ghán sí lòo dù, Joosev nèn yù ji tàr wov waà joyì. Wù nèn lì wón və́ vee vilum abaà, Manasse wùn Efrayim, a dù ji wùn áwune du, e yèn á tàr wov.

²Á nèn sùúy e Jakov jii, wan və woo Joosev wìy a ne ji wù yén á wun. Wù yú bey, wun woo Isray nèn jeètí, e nànèn, e dzə̀ʼə̀m e kikun.

³Joosev nəə́, wù suúy shó jii, «Nyùy woo Ŋgaà Vitaàví Vidzə̀m‑eè wìy fo mǒ wùn, e səə̀vì mo é Lus e nsay Kanan,

⁴e sùúy e mò jii, wun yíi yiì, é m wáa ker a wón anín, aá kuʼ, é vitúm vinín vi ram á fo mǒ bvə̀m. Wun wíy fo a nsay yee fó e rám yémé ji yéev, e dù, e mày.

⁵«Á bèy lèn, ké won vee abaà ve wò‑oò dzəən é Ejiv fèn, é bo m wáa wìy ki dzə̀ jii, vee shooyi sì vém. Efrayim wùn Manasse kù sì wón vém réŋréŋ mo Ruben wùn Simeon dzəə̀n vém bey.

⁶Wón ve à yíi a dzəə́ aáwuné bàmé dzə̀ vé, aá kù wíy a taŋ áwune a dzə̀ é mvə̀m kfəə Efrayim, kìn e yé Manassèe. Áwune kù wíy a yi vitsə́ʼ a dzə̀ veé mvə̀m kfəə foo fèy.

⁷M yii kinyo kìn bìʼ Racel woo yè won wo wù‑uù kpuun é wòŋ Kanan. Mò‑oò lóo kfən e bàm fó Paddan, a vèr dzə̀ə́ e dzəə, a bér ne shintàm, aá meé é Efrat, wù nèn kpù. Mendzən mem féyì. M nèn dzəə̀mè wun e ghaa dzəə yeé Efrat foo fèy.» Jakov‑iì yoŋ Efrat, a dzə̀ fo á yoŋ lán ji Betlehem.

⁸Isray nèn lò yèn wón Joosev, e dzə̀r jii, «Víne dzə̀ ala?»

⁹Joosev bìnèr e tàr wov jii, «Dzə̀ wón vém ve Nyùy foon e mò fen.» Isray nèn sùúy jii, «Kii wò, wìy aáwune, é m səəvi.»

¹⁰Wáa dzə e ghan sin, a sí Israyi sí səə́ne, a bó wù yòʼ dzəə́ yén virə́ʼ kijuŋ bìʼ vidzəənè, Joosev nèn lì wón viy, e kòʼór e tàr wov Isray mentsə̀m. Wù shàʼtì áwune, e baàmé,

¹¹e sùúy e Joosev jii, «M yòʼ‑oò dzəə́ kí ji m dzəə́ wìy yen a sí yé. Leéy ri, e yèn, Nyùy yiì ne, m yén sá wón vé.»

¹²Joosev tsə̀ʼ áwune fo tàr wóv kibìy, e nèn tsə̀m ndzəə́, e làʼ kitú e nsay e tàr wóv si.

¹³Wù nèn lò, e ghàr wón ji wun tiír á e tàr wóv si. Wù ghár Efrayim e kiwo ke yìy kí, e kòʼór e tàr wóv koy ŋkoòvìi, e ghàr Manasse e kiwo ke ŋkoòvì ki, e kòʼór e tàr wóv koy yìyí.

¹⁴Tàr wov shwáʼsín kóy sə́, e neèr kiwó ke yìy kí e Efrayim woo wán wo terí kitu, e neèr ké ŋkoòvì ki e Manasse woo wán woo ŋgàywìr kitu.

¹⁵Wù wáa səə̀vì Joosev[101], a suúy jii: «Nyùy atàr vém vee Abraham wùn Aysi, Nyùy wo áwune‑eè ghvə́mé, Nyùy wo wù‑uù leey fo mò, e wìy meé lán,

¹⁶Nshìylav Nyùy ye yì sə́ mo fó ŋgeʼ sidzə̀m, kú a səə̀vì wón vee vilum vìn, é wíri wìy a kiíy yír yém wùn à yé atàr vém vee Abraham wùn Aysi. Wù ku yiì, é rám yéví kuʼ é kitu ke nsay, a dzə nyanyày.»

¹⁷Joosev yén, a tàr wov neer kiwó ke yìy kí e Efrayim kitu, kí tén wun. Wù ghár kiwó ke tàr wov ji wun tsəʼ a fo Efrayim kitu, e neèr a e Manasse kitu. Wù wáa tsə̀ʼ bèy,

¹⁸a suúy jii, «Àáyǎ taàtá, wan mbìy dzə̀ və̀n. Neèr kiwó ke yìy kí a dzə̀ e woo shoon kitu.»

¹⁹Tàr wov sháʼnín, e sùúy jii, «M kì mbà, wan wòm. M kì. Wù wíy a dzə sa kitúm ke kuʼùn kí. Yii bèy, bám rəə́ wíy kùʼ, e shaà wun, é rám rəə́ wáa dzə vitúm vitúm.»

²⁰Wù nèn a səə̀vì áwune é kishiíy fóo fèy, a suúy jii, «Wír veé Israyi wíy lòo səə̀vì wíri, aá wáa yòŋ jii, ‹Nyùy ku yiì, é kày wáa dzə moo Efrayim wun Manasse.› » Á mo Isray‑iì tiirin Efrayim fo Manasse mbìy bèy.

²¹Isray nèn sùúy e Joosev jii, «Yén ri, m sì é mentsə̀m me kpu. Kiíy jii, Nyùy kù wíy a dzə vèn áwune, e lì ven, e kfən sho bàm áàtàr véné nsay.

²²Mo‑óò fó sá wò fómo woo jeéy, wo bó m yòʼ‑oò lo fò áàfə́r vée. A dzə̀ jii, gwaáné wo mò‑oò faàsìn[102] e nyùy wùn à kòŋé fo wír veé Amori sì wó.»