Read Lamnso Kèʼlo 5 Bible Online

Kèʼlo 5 - Lamnso bible

Kèʼlo 5

¹Rám Adame rə̀ne mo vé‑eè saŋen mo yí‑iì dzəə̀n. A kí dzə̀ jii, Nyùy‑iì bòm wír e wun nshwìnín, wù wáa dzə moo wun.

²A wù‑uù bòm a dzə̀ lumèn wùn wiíy, e səə̀vì áwune, e yòŋ ji wir msòŋ.

³Adam meé kiyá kishóv mtaár e wiì (130), e dzə̀ə́ wán lumèn e wùn nshwìnín, wù wáa dzə rú moo wun, e shù yír ji Set.

⁴Mo wù‑uù dzəən Set bèy, e kfə̀n dzə̀ʼə̀m viyá vímóʼ ví ghií waamé (800), e dzə̀ə́ wón ámóʼó vee vilum wùn à vee vikìyí.

⁵Adam‑eè dzə̀ʼə̀m kiyá kishóv mtaár e ghiì bvə̀ʼə̀ (930), e nèn kpù.

⁶Set dzə̀ʼə̀m kiyá nshòv sitàn e wiì (105), e dzə̀ə́ Enosh,

⁷e kfə̀n dzə̀ʼə̀m viyá vímóʼ ví nshòv saàmbà e ghiì waamé (807), e dzə̀ə́ wón ámóʼó vee vilum wùn à vee vikìyí.

⁸Set‑iì dzə̀ʼə̀m kiyá nshòv sibaà e ghvə̀m e ghiì bvə̀ʼə̀ (912), e nèn kpù.

⁹Enosh dzə̀ʼə̀m kiyá mbvə̀ʼə̀ (90), e dzə̀ə́ Kenan,

¹⁰e kfə̀n dzə̀ʼə̀m viyá vímóʼ ví nshòv sitàn e ghvə̀m e ghiì waamé (815), e dzə̀ə́ wón ámóʼó vee vilum wùn à vee vikìyí.

¹¹Enosh‑iì dzə̀ʼə̀m kiyá nshòv sitàn e ghiì bvə̀ʼə̀ (905), e nèn kpù.

¹²Kenan dzə̀ʼə̀m kiyá msaàmbà (70), e dzə̀ə́ Mahalalel,

¹³e kfə̀n dzə̀ʼə̀m viyá vímóʼ ví kishóv mkweè e ghiì waamé (840), e dzə̀ə́ wón ámóʼó vee vilum wùn à vee vikìyí.

¹⁴Kenan‑eè dzə̀ʼə̀m kiyá kishóv ghvə̀m e ghiì bvə̀ʼə̀ (910), e nèn kpù.

¹⁵Mahalalel dzə̀ʼə̀m kiyá nshòv sitàn e mntuùfú (65), e dzə̀ə́ Jared,

¹⁶e kfə̀n dzə̀ʼə̀m viyá vímóʼ ví kishóv mtaár e ghiì waamé (830), e dzə̀ə́ wón ámóʼó vee vilum wùn à vee vikìyí.

¹⁷Mahalalel‑iì dzə̀ʼə̀m kiyá nshòv sitàn e mbvə̀ʼə̀ e ghiì waamé (895), e nèn kpù.

¹⁸Jared dzə̀ʼə̀m kiyá nshòv sibaà e mntuùfú e wiì (162), e dzə̀ə́ Enok,

¹⁹e kfə̀n dzə̀ʼə̀m viyá vímóʼ ví ghií waamé (800), e dzə̀ə́ wón ámóʼó vee vilum wùn à vee vikìyí.

²⁰Jared‑iì dzə̀ʼə̀m kiyá nshòv sibaà e mntuùfú e ghiì bvə̀ʼə̀ (962), e nèn kpù.

²¹Enok dzə̀ʼə̀m kiyá nshòv sitàn e mntuùfú (65), e dzə̀ə́ Metusela.

²²A Enok dzə́, yúnin Nyùy, ghán e wun mbòv. Mo wù dzəən Metusela, e kfə̀n dzə̀ʼə̀m viyá vímóʼ ví ghii taár (300), e dzə̀ə́ wón ámóʼó vee vilum wùn à vee vikìyí.

²³Enok‑iì dzə̀ʼə̀m kiyá nshòv sitàn e mntuùfú e ghiì taár (365).

²⁴Mo wù‑uù yúnin Nyùy, ghán e wun mbòv bey, wù nèn sàsìn, e lày làyìn, a lí Nyùy wun.

²⁵Metusela dzə̀ʼə̀m kiyá nshòv saàmbà e mwaamé e wiì (187), e dzə̀ə́ Lamek,

²⁶e kfə̀n dzə̀ʼə̀m viyá vímóʼ ví nshòv sibaà e mwaamé e ghiì saàmbà (782), e dzə̀ə́ wón ámóʼó vee vilum wùn à vee vikìyí.

²⁷Metusela‑aà dzə̀ʼə̀m kiyá nshòv bvə̀ʼə̀ e mntuùfú e ghiì bvə̀ʼə̀ (969), e nèn kpù.

²⁸Lamek dzə̀ʼə̀m kiyá nshòv sibaà e mwaamé e wiì (182), e dzə̀ə́ wán lumèn,

²⁹e shù yír rə́ ji Noa[27]. A wù shu bèy, suuy jii, «Wan və̀n yíi fo ver rəsìn fo věr lìm, à fo věr akàtìr veé nsay ye Nyùy‑iì shovin.»

³⁰Lamek kfən dzə̀ʼə̀m viyá vímóʼ ví nshòv sitàn e mbvə̀ʼə̀ e ghiì tàn (595), e dzə̀ə́ wón ámóʼó vee vilum wùn à vee vikìyí.

³¹Lamek‑iì dzə̀ʼə̀m kiyá nshòv saàmbà e msaàmbà e ghiì saàmbà (777), e nèn kpù.

³²Noa dzə̀ʼə̀m kiyá ghii tàn (500), e nèn dzə̀ə́ Shem wùn à Ham, à Jafet.