Read Lamnso Kèʼlo 50 Bible Online

Kèʼlo 50 - Lamnso bible

Kèʼlo 50

¹Joosev gbù e tàr wóv kitu, a toŋ, a bamrí wun.

²Wù nèn lò, e sùúy e vé shìv ve vé‑eè lim fo wune ji á wàá yóʼ á dzə́n tàr wov Isray. Á nèn yòʼ.

³Kí‑iì lì kishiíy mkweè mo nsər yee kùm dzə́n wìr ye yoʼóné taʼà. Wír veé Ejivi nèn dìy kpú rə́ kishiíy msaàmbà.

⁴Á dìy kpú, yí mày, Joosev nèn sùúy aàtǎr ntoʼo jii, «A vèn koŋ rú mo, vèn sùŋnín e Farao, e fò e mò. Vèn suúy e wun jii,

⁵‹Tàr wor‑iì lóo kpu, e yiì, m lìʼ ji m wíy dzəə̀mè wun a e wun sày ye wù‑uù naŋsin é wòŋ Kanan. Kii wun, wù ku màʼtì a, é m kóʼ, e dzəə̀mè tàr wor, e bó a kfən e bàm.› »

⁶Fòn nèn dù, e bìnèr ji wù kóʼ á rì, e dù, e dzəə̀mè tàr wov mo wù‑uù lìʼìn.

⁷Joosev nèn lò, a koʼ ji wun du, e dzəə̀mè a tàr wov. Atǎr ntoʼ adzə̀m, vibay vidzə̀m wùn aàtǎr laʼ veé Ejivi‑iì kòʼ sá e Joosev bàm,

⁸e lì sa wír vee wun lav adzə̀m, aàfə́r və́ wùn à kibér ke wìr kee tàr wóv lav ki. Kù‑uù jòʼsì wón ve terií wùn aànjìi, à bvə́y si, aànàʼa ve vé‑eè gòʼòn é Goshen.

⁹Vé kar se səŋ nyám si wùn à vé nyàm se ŋkoʼo‑oò kòʼ sá e Joosev bàm. Yì‑iì dzə̀ ŋgoo e da.

¹⁰Áwune meé é riimé yímóʼó é Atad, a dzə̀ kirə́ʼ é ghaa ndzəv yee Jordan, e nèn a dìy kpú, e rə̀sí tòŋ ntàmda. Joosev dìy kpú tàr wov fó kishiíy saàmbà.

¹¹Wír veé Kanan ve á yii dzə́ foo yén kpú ye vé‑eè diy e riimé yeé Atad, e nèn a suúy jii, «Kin ki dzə̀ kiŋgaʼnìn ke kpu ke wír veé Ejivi diyì.» Á kifá ke kí‑iì yiìn, é bo á siíy, a yòŋ yír kirə̀ʼ keé ghaa Jordan kìn ji Abel‑Mitsrayim.[105]

¹²Á mo wón Jakovi‑iì yiìn e dzə́n rəə́ mo wù‑uù suuyin aáwune.

¹³Vé‑eè bèʼèy wun, e dù sho e nsay Kanan, e dzəə̀mè e mbvə̀ʼ yeé kwaʼ woó Mak‑Pela e ghaa Mamre. Kwáʼ və̀ne dzə̀ wo Abraham‑eè yunen fo Efron woo wan Hit ji kirə́ʼ kfə́ ké kindzəə̀mèwìr.

¹⁴Joosev màysì dzəə̀mè tàr wov bey, e nèn kfə̀n é bàm é Ejiv wùn aàfə́r və́ vee vilume, à wír ve wun áwune‑eè duùn ji á dzəəme tàr woví.

¹⁵Mo afə́r Joosevi yenen ji tàr wov kpù á ne, á nèn a kfə̀ynìn jii, «A Joosev sà yiì lò, a tsəmrí rə́r wùn áwune, e kfə̀n a siìr ŋkfə́tír bìʼ ajay ve vé‑eè jayin e wun, é kí sáa dzə e le á?»

¹⁶Áwune nèn tsə̀nsí ntum e Joosev jii, tàr wov‑iì lóo kpu, e lèm a ntìr kpu

¹⁷ji á suúy e wun woo Joosev ji wun yoŋ a jii, kii wun, wù ku làysìn a jay wo afə́r vəə́‑əə̀ jayin e wun. Lèn və̀n, wù ku làysìn a rì jay wov, áwune vee aŋgàa lìm Nyùy wo tàr wov‑iì ghvə́mé. Joosev yú ntum afə́r və́ rə̀n, e nèn a dìy.

¹⁸Afə́r vəə́ nèn lò wìy sa, e gbù e wun si, a suúy jii, «Ver víne, vèr sì akwàn vé.»

¹⁹Joosev suúy aáwune jii, «Lá vèn yòʼ a fàn, m dzə̀ Nyùy à?

²⁰Vèn‑eè wày wáyín ji á yii kinyo ke bi kí e mò, yii bèy, Nyùy nèn lì, e siìr ji kinyo ke juŋ ki, e fíʼ lèm wíri aneénín atin, mo vèn yén lèn.

²¹Lá vèn yòʼ a fàn, m yíi a leéy fo vèn à wón véné.» Wù ku nèn a ruvtí, a suŋnín aáwune é dzəə yé a rəə̀r melív mev.

²²Joosev ku nèn a dzə e Ejiv wùn à kfə́ə tàr woví. Wù‑uù shìíy kiyá kishóv ghvə̀m e wiì (110),

²³e yèn wón wón Efrayim. Makir woo wan Manasse dzəə́ wón, Joosev keérí, á kúy sá e wun kiwo.

²⁴Joosev nèn lò, e sùúy aàfə́r vəə́ jii, «M sí méʼ mentsə̀m me kpu. Nyùy kù wíy sham ven, e fəə́r fo wòŋ fèn, e dù sho e wòŋ wo wù‑uù kàʼàn Abraham wùn à Aysi, à Jakov sho, e kfə̀n lìʼ.»

²⁵Joosev nèn yiì, áwune vee wón Israyi lìʼ kilìʼ jii, Nyùy wíy sham áwune, e fəə́r fo Ejiv, á lóo lò, aá lì á vighvə́r və́ fó fo, a dù sho.

²⁶Á bèy, Joosev nèn kpù, a wù dzə̀ kiyá kishóv e ghvə̀m e wiì (110). Á nèn yòʼ dzə́n rə́, e wày é ŋkùv e Ejiv foo fèy.