Read Lamnso Kèʼlo 6 Bible Online

Kèʼlo 6 - Lamnso bible

Kèʼlo 6

¹Mo wìr‑iì kèʼèn, a kùʼ e kitu ke nsay, á nèn a dzəə́ sa wón vee vikìy anín.

²Wón Nyùy[28] ámóʼó yén, a wón wíri vee vikìyí bóŋkír é ŋàŋ, yén ve á toon sí yév, á kù nèn a lì liìn ji vikìy vév.

³NYÙY TÀR nèn sùúy jii, «Bó m yòʼ wíy màʼtì wír, é wù shaari gheéy,[29] wù dzə̀ ben, a wù kér fóo wìy kpu. Kèʼ fo lèn, wù yòʼ dzəə́ wìy dzə̀ʼə̀m, e shaà kiyá kishóv mbaà é wiì (120).»

⁴Yì‑iì dzə̀ é ghan fóo fèy, e dù, e meé e ghan símóʼ sí, a viŋgáʼ ve wíri ví dzə̀ é kitu ke nsay, a dzə̀ rám ye wón Nyùy vìyi‑iì dzəən wùn à vikìy ve yì‑iì dzəə̀n wón wíri. Kù dzə̀ wír vìn ve yì‑iì dzəə̀n antav vee fó ŋgùʼ, ve wíri rə́si fer vimfèr vév.

⁵NYÙY TÀR lòo leéy, e yèn, a liì kisaŋ wìr msòŋ gháʼ ne e kitu ke nsay, a wù kù sí kér a dzə̀ kwaʼtì kisaŋe e wun shiliv ghán sidzə̀m,

⁶shilív sə́ shí seèm, wù wáa rə̀m ntéŋ ji wun sà‑aà bòm wír, e lèm e kitu ke nsay ji kaá.

⁷Bìʼ bey, NYÙY TÀR nèn sùúy jii, «M yíi laàr wír wo mò‑oò bomen é kitu ke nsay, e tatí wùn à nyám si, à vifá ve ŋaŋrìn ví, à menə́n mè. M kér mendzən ji mò‑oò bòm vifá vìn.»

⁸Yii bèy, NYÙY TÀR leéy Noa, a kòŋ bìʼ liì və.

⁹Kimfèr ke Noa wùn à kfə́ə rə́ kí nén a dzə jii, Noa‑aà yii mo Nyùy taʼà, dzə́ là nsem e wun ghan, wáy shilív e Nyùy wùn, ghán e Nyùy mbòv.

¹⁰A wù‑uù kér wón vee vilum ataár, aá dzə̀ jii, Shem wùn à Ham, à Jafet.

¹¹Wáa dzə e ghan fen, a kitú ke nsay ki bír ne bírín fo Nyùy si, a wíri buʼtì vinyo ve ghaʼtín ví kitú ke nsay kidzə̀m.

¹²Nyùy nèn yèn ji kitú ke nsay ki fòy a ne, bìʼ fo wìr dzə̀m‑eè sí kér a dzə̀ liì kisaŋ.

¹³Wù nèn sùúy e Noa jii, «M wày ne, m yíi laàr wir msòŋ e dzə̀m, bìʼ fo vinyo ve ghaʼtín ve á buʼtì vi ràmèn ne kitú ke nsay kidzə̀m. M kér fóo yìi laàr áwune, à kitú ke nsay ki shó.

¹⁴Tàʼ kicí ke tavín kí, e fèr kikóŋ ki shó, e tìnrí e melav melav, e teè mvəm kikoŋ wùn à fó ndzəə e kiláy kí.

¹⁵Mfìʼ se à yíi fèr kikóŋ kìn sho si síne. Vida vi yíi a dzə kóy nshòv sitàn e msaàmbà, é mbvə̀ʼ wáa dzə kóy nshòv sibaà e ghvə̀m, é vida ve koʼón ví wáa dzə kóy saàmbà.[30]

¹⁶À lóo fèr vitú ve kikoŋ, à ŋàʼár, é ví wáa yav e kitu ke virəv ntàm se kiwo sibaà. Fèr shúu kikoŋe fó kirəv ke da ki, e fèr mvəm kikoŋ ŋkèʼ sitaár, yìmòʼ fó sar, yìmòʼ fó ntìntìn, yìmòʼ fó yuv.

¹⁷Kiíy jii, m yíi fəə́r ndzə́v, é yí rún kitú ke nsay, e laàr kifá kidzə̀m ke kí ŋeʼè, a bó kimòʼón ki yòʼ yíi gòʼ.

¹⁸Yii bèy, fo ké ki, m wíy gwàr *mensaŋ mem a dzə̀ wòsò. À wíy nəə́ e kikoŋ vèn à wón vée, à wiiy wò, à vikǐy won vée, e fíʼ lùŋ.

¹⁹À wíy lì kfəə́ se vifa ve ŋeʼèn ví sidzə̀m, vibaà vibaà, kee lumèn wùn à kee wiíy ki, é vèn áwune nəə́ é kikoŋ, e fíʼ bòy fo kpu.

²⁰Kfəə́ se vifa ve ŋeʼèn ví wíy wìy, e yen wò, vibaà vibaà, kfəə́ se menə̀n, à sé nyàm si, à vifá ve ví ŋaŋrì ŋàŋrìn ví, é vèn áwune nəə́ é kikoŋ, é ví fiʼ gòʼ vitin.

²¹Áà li sá kfəə́ se vifa ve yi sidzə̀m, e wày é kikoŋ, é vèn à kfə́ə yée, à nyám si yiì a yi.»

²²Noa yú bey, e kù nèn yiì vinyo vidzə̀m réŋréŋ mo Nyùy kì suuyin e wun.