Read Lamnso Kèʼlo 7 Bible Online

Kèʼlo 7 - Lamnso bible

Kèʼlo 7

¹NYÙY TÀR nèn lò, e sùúy e Noa jii, «Lì kfəə́ yee wò lavi e dzə̀m, é vèn áwune nəə́ é kikoŋ. M yèn ne ji kù mày a wò fo ŋgwàʼ yee lán, wo à yii mo m taʼà.

²Ku lì nyám se nsər din ji see là *kifàn sí, sibaà sibaà, e kfəə sí kfəə si, yee wiíy wùn à yee lumèn, virə́ʼ saàmbà. Fo nyàm se nsər din ji sí kér kifàn, ku lì cáʼ sibaà sibaà, yee wiíy wùn à yee lumèn.

³Kfən lì sa menə́n mè, mebaà mebaà, shee wiíy wùn à shee lumèn shi, kirə́ʼ saàmbà fo kfəə se menə̀n sidzə̀m. Ku yiì bèy, fo rám sév sí lay fó kitu ke nsay.

⁴Kú a kiíy jii, yíi lòo dzə e bǎm kishiíy saàmbà, é m tsə́nsí wuú é kitu ke nsay, é yí ló kishiíy mkweè, a lo e shùy, a lo vitsə́ʼə́, e laàr vifá ve ŋeʼèn ví ve m bomen vidzə̀m, é ví lay fó kitu ke nsay.»

⁵Noa ku nèn yiì vinyo vidzə̀m ve NYÙY TÀR‑iì suuyin e wun.

⁶Ndzə́ví‑iì sum kitú ke nsay, a Noa dzə̀ kiyá ghií ntuùfú.

⁷Noa lò, e nə̀ə́ e kikoŋ wùn à wóné, à wiiy və, à vikǐy woné, e fíʼ bòy fo ndzəv ye yí‑iì yíi a run rə̀y.

⁸Vé‑eè lòo nəə́, nyám sidzə̀m si wáa wìy, a yen Noa, a nəə́ e kikoŋ mo Nyùy‑iì suuyin. Sí‑iì wiy sibaà sibaà, yee wiíy wùn à yee lumèn. A sí‑iì lo fo nyàm se nsər din ji see là kifàn, à se sí kér kifàn sí, wùn à menə́n mè, à vifá vidzə̀m ve ví ŋaŋrì e nsay vi.

¹⁰Vishiíy ví meé saàmbà, ndzə́ví nèn kèʼ, a wìy, a sə kitú ke nsay.

¹¹A kishiíy kee shooy ki‑iì dzə̀ kee nshòv saàmbà e ghvə̀m fo ŋwee woo baà, e kiya ke Noa‑aà meen ne viyá ghií ntuùfú. E kishiíy fóo fèy, ntòŋ sé ndzəv sí mvə̀ʼkìr, ndzə́ví wáa meekír fo loònsay,[31] yúví mvə́ʼ shuu, e lèm e rə́,

¹²kiŋkò ke wuu kí shùʼùy là meemè, vishiíy mkweè, shuʼùy e shùy, shuʼùy vitsə́ʼə́.

¹³Wuú kèʼ, a shùʼùy e kishiíy fóo fèy, Noa wùn à wiiy və, à wón və́ vee Shem wùn à Ham, à Jafet, à vikìy vév vee ataári nèn nə̀ə́ e kikoŋ.

¹⁴Á wáa dzə fo wùn à kfəə́ se nyàm si sidzə̀m, seé laʼ wùn à seé kwaʼ si, à vifá ve ví ŋaŋrì ŋàŋrìn ví, à kfəə́ se menə̀n sí sidzə̀m.

¹⁵Vifá ve ŋeʼèn vin vidzə̀m vi‑iì wìy, e yèn Noa, kee wiíy wùn à kee lumèn ki, e bóo nəə́ e kikoŋ.

¹⁶Ví‑iì nə̀ə́ a dzə̀ mo Nyùy‑iì suuyin e Noa. Ví nəə́, e mày, wun woo NYÙY TÀR nèn sə̀tí shúu kikoŋ.

¹⁷Ndzə́ví ku nèn a dzə̀sì, a run runén kishiíy mkweè. Yí‑iì bèʼèy kikóŋ, kí ŋáʼáy fó nsay, a koʼ e yuv.

¹⁸Ndzə́ví kú a run runén é kitu ke nsay, kikóŋ ki wáa laʼ laʼán é kitu ke ndzəv.

¹⁹Ndzə́ví nèn lò, e rùn é ŋàŋ, e sùm kifá kidzə̀m, à virùmèn ve daadà vi shó,

²⁰e yiì lò, e yàʼáy virùmèn moo kóy e kweè bèy.

²¹Vifá vidzə̀m ve ví ŋeʼ e nsay vi nèn fìʼsín, e kpùkír, menə́n, nyám seé laʼ wùn à seé kwaʼ si, vifá ve ŋeerín ví vidzə̀m, à wìr msòŋ shó e dzə̀m.

²²Vifá ve ví‑iì yoy e nsay vidzə̀m vi fíʼsín, e kpùkír.

²³Nyùy ku nèn laàr kifá kidzə̀m ke kí‑iì ŋeʼ e kitu ke nsay, wir msòŋ wùn à nyám si, à kifá kidzə̀m ke kí ŋaŋrì e nsay ki, à menə́n meé yuv mè. Kù‑uù jòʼsì Noa wùn à kfə́ə rəə́, à vifá vidzə̀m ve ví‑iì dzəə̀n é kikoŋ wùn áwune ví.

²⁴Ndzə́ví kù‑uù sə̀tí nsay bèy kishiíy kishóv mtàn e wiì (150).