Read Lamnso Kèʼlo 8 Bible Online

Kèʼlo 8 - Lamnso bible

Kèʼlo 8

¹A Nyùy kù kuúme Noa wùn à nyám se wùn áwune‑eè dzəə̀n é kikoŋ si, e nèn lò, e tsə̀nsí shwér, wú shaà kitú ke nsay kidzə̀m, ndzə́ví nèn kèʼ, a shùŋrìn.

²Wù kfən yiì, ntòŋ sé ndzəv se sí‑iì fəəkin fó loònsay si sə́tí, e yiì, shuu se yuv sí sə́tí sá. Wuú nèn tìn,

³ndzə́ví wáa shùŋrìn. Kí lòo meé e kishiíy ke yì‑iì siìn ji vishiíy kishóv mtàn e wiì mo ndzə́ví‑iì kèʼèn, a wìy, a yí fár ne wún.

⁴Kikóŋ ki nèn fàáy e kirùmèn kímóʼ kí áàgwan veé Ararat, a sì kishiíy nshòv saàmbà e ghvə̀m fo ŋwee woo saàmbà, e kiya foo fèy.

⁵A ndzə́ví kù shuŋrìnè, e yiì lòo meé e kishiíy ké mbìy ki fó ŋwee woo ghvə̀m, vitú ve agwan vi nèn kèʼ, a yensín.

⁶Vishiíy ví kfən shaà mkweè, Noa nèn mvə̀ʼ shúu wundu wo wù‑uù fèrìn é wǔn kikoŋ,

⁷e tùm kiŋaʼ. Kí‑iì dù bey, e kù a feŋ, a kar karín, e dù, e mèé mo ndzə́ví‑iì yumen fó nsay.

⁸Mo shinə́n shiy shi duùn, e làa yòʼ dzə́ə kfən e bàm, Noa nèn lò, e tsə̀nsí kibìŋ ji wun kiíy á ji ndzə́ví sá ne màysì, e yùm fó kitu ke nsay a.

⁹Kí nèn dù, a ndzə́ví kù dzə̀ə́ e kitu ke nsay, kí búŋ fóo laʼám, e nèn kfə̀n é bàm. Noa tsə́nsí kiwó, e ghàr shó, e siìr e kikoŋ,

¹⁰e nèn kfə̀n shìy kishiíy saàmbà, e bóo kfə̀n fəə́r, e tsənsí.

¹¹Yiì lòo dzə e ŋkuùr, kibìŋ kí bvə́y e vav kici ké *oliv ye shoòŋe é shuù. Noa nèn kìíy ji ndzə́ví shùŋrìn a ne.

¹²Wù kfən shìy vishiíy vímóʼ ví saàmbà, e kfə̀n tsə̀nsí kibìŋ. Kí dù lèn, e làa yòʼ dzə́ə kfən e bàm.

¹³Ndzə́ví nèn mày fo kitu ke nsay a dzə̀ é kishiíy ké mbìy ki fó ŋwee mbìyi wo Noa‑aà siìn kiyá nshòv mòʼón e ghiì ntuùfú (601). Wù nèn tsə̀ʼ kifá ke wù‑uù sətin vitú ve kikoŋ sho, e màʼ sí fo ndzə, e yèn, a nsay sí yuúme.

¹⁴Kí wáa meé ji ŋwee e baà, e kishiíy kee nshòv saàmbà e mbaà fó ŋwee foo fèy, a kitú ke nsay ki máysí ne, e yùm ŋkuuŋkùŋ.

¹⁵Nyùy nèn sùúy e Noa jii,

¹⁶«Fəə́ fó kikoŋ vèn à wiiy wò, à wón vée, à vikǐy won vée.

¹⁷Ku lì kfəə́ se vifa ve ŋeʼèn ví sidzə̀m, é vèn áwune fəə́. Ku lì menə́n wùn à nyám si, à vifá ve ví ŋaŋrì ŋàŋrìn é nsay vi vidzə̀m, é ví wáa dzəə́ wón, aá wáa run e kitu ke nsay.»

¹⁸Noa ku nèn fəə̀ wùn à wón vəə́, à wiiy və, à vikǐy won vəə́.

¹⁹Kifá kidzə̀m ke kí ghan e kitu ke nsay ki nèn a fəə sa fo kikoŋ e kfəə sí kfəə si, nyám sidzə̀m, menə́n medzə̀m, à kifá kidzə̀m ke kí ŋaŋrì ŋàŋrìn kí.

²⁰Noa nèn bòm *kíy cù wó a cù NYÙY TÀR shó, e shòʼtí nyám se nsər din ji see là *kifàn símóʼ sí, wùn à menə́n mee là kifàn mè, a tòn e kiy fèy, a cù NYÙY TÀR shó.

²¹Kirəm ke cù ki rə́ʼtín, e ghèén NYÙY TÀR, wù suúy fo wun bvə̀m jii, «Bó m yòʼ dzəə́ wìy màʼ ŋgeʼ e kitu ke nsay bìʼ wir msòŋ. Kwaʼtì wìr msòŋ e dzə̀me kù sì yé kisaŋe, e kèʼ fo meterí. Bó m yòʼ dzəə́ wìy laàr kifá ke ŋeʼèn kí fó kitu ke nsay mo mò‑oò laàrìn.»

²²«Mo ndzə wíy a dzə, ghán sé kiŋgway, à ghán se á káv vifá, ghán sé kidzər, à ghán se virə́ʼ ví lumè, bìŋ wùn à lùm, shùy wùn à vitsə́ʼ, ghán sin si yòʼ wíy buú.»