Read Lamnso 2 Samuel 12 Bible Online

2 Samuel 12 - Lamnso bible

2 Samuel 12

¹NYÙY TÀR nèn tsə̀nsí *ŋgaà ntum və woo Natan fo Davir wùn. Wù dù, a bi wun jii, «Vilum ámóʼó‑oò dzə̀ é ŋkàlaʼ yìmòʼ abaà, a wùmòʼ dzə̀ ŋgaà mbàm, wùmòʼ ŋgaà kitàn.

²Ŋgaà mbàm‑eè kér bvə́y, kér nàʼ nyanyày,

³a ŋgaà kitàn kér kfə́ a dzə̀ shiwán shé njiì shimòʼón, a wù yún yunén, a lìy, shí wáa kuy wùn à wón vəə́ e wun laʼ. Wù lo, wù lì vifá və́ vé yi, e fò shó, shí wàa yi. Wù lo, wù kfə̀n màʼtì, shí wàa no fo wun bàr. Shiwán shé njiì shìn shi kù‑uù shiiy a dzə̀ e wun vikàkàŋ, a shí sì fo wun moo wán və woo wiíy bèy.

⁴«Wìy lòo dzə e kishiíy kímóʼ kí, ŋgaà kiŋgàn wìy e ŋgaà mbàm laʼ, wù bávtí nyám rə fóo see, e tar kiŋgàn shó, e nèn gwèv a dzə̀ shiwán shé njiì she ŋgaà kitàn shìy, e yìír kiŋgàn kfə́ shó.»

⁵Davir yú kimfèr kìn, e shwìíy kilòŋ é ŋàŋ bìʼ ŋgaà mbàm və̀y, e shùsín jii, «Mo NYÙY TÀR dzəə̀n shó, kfə́ə wìr wo wù mùmèn kinyo kee ben kù dzə̀ wo dzə̀ á yùyrí yuyrín.

⁶Mo wù mùmèn kfə́ə kinyò kee ben, e làa yòʼ rər mendzən me ŋgaà kitàn, bo wù kù kér fóo làʼ anjiì akweè.»

⁷Natan nèn sùúy e Davir jii, «Dzə̀ wò wír wo wù mùmèn kinyo kìn. NYÙY TÀR woo Nyùy wìr veé Isray suuy jii, ‹Mò‑oò yòʼ wò ji fon wìr veé Isray, e bòyìr wò fo Saul wo,

⁸e fò kfə́ə rə́, à wáa saʼ, e fò sá vikìy və́ e wò, e kfə̀n wày sá wír veé Isray, à veé Judàa e wò kiwo. A vin vi‑iì dórí, bo a yì‑iì dzə̀ m dzə̀sì sá vímóʼ ví bey.

⁹Yií ka, bo à ŋwáy jí yem, e bùʼ kfə́ə kinyò ke kí kóʼoy mo ben? À yùyrí Uria woo wír woó Hit, e lì wíiy və, a ker. Wò‑oò yiì, wír veé Ammone gwár wun e shùu rər.

¹⁰Bìʼ bey, kfə́ə yée yòʼ wíy buŋ wír wo wù wáa kpu kpú vitaavií. Kù bey, bìʼ fo à tàʼàn mo ntéŋ, e lì wíiy Uria, a ker, Uria woo wir Hit.

¹¹Mo woo NYÙY TÀR suuy e wò jii, leéy, e yèn, m yíi kèr ŋgeʼ e wò kitu, a yì yíi lò a dzə̀ fo wò kfəə. M yíi tayrí vikìy vé, e fo e wìr wo sən, aà yéné. Wù yíi a neŋ sho e ŋgèŋgèr.

¹²Wò‑oò yiì kinyo kìn e kilìr, á bèy, a m yíi yiì, é kin ki koóy é ŋgèŋgèr, é wír veé Isray adzə̀me yén.› »

¹³Davir nèn tuùné e Natan jii, «M fèn jày ne e NYÙY TÀR.» Natan bìnèr jii, «NYÙY TÀR kù tsə̀ʼ ne jay wò, à yòʼ dzəə́ lo, e kpu.

¹⁴Yii bèy, wan wo vèn dzəən və̀y kù kér fó yìi kpu, bìʼ fo à yiìn ne, aŋgàa vibǎn NYÙY TÀRí báʼám é bǎm kinyò fèn, a tàʼ wun ntéŋ.»

¹⁵Natan nèn lò, e kfə̀n é bàm e wun laʼ. NYÙY TÀR nèn yiì, wan wo wiiy Uria‑aà dzəən wun Davir və̀y wáa jòy e ŋàŋ.

¹⁶Davir nèn a lon Nyùy ji wù ku yiì a é wàn wàá bónén. Wù wáa lon bèy, a lèm jíŋ, e yiì neèm fo nsay vitsə́ʼ vifur.

¹⁷Atǎr ntoʼ vəə́ wìy, a lon wun ji wù ku lò a e yuv, é wùn áwune wàá yíkír, wù tén.

¹⁸Wàn kú a jòy bèy, kí meé kishiíy saàmbà, wù nèn kpù. Atǎr ntoʼo nèn a fàn fóo suúy e wun ji wàn kpù á ne. Áwune‑eè rəm jii, «Wàn‑ee joyì, á yoŋ ji fòn wáy á kifá e shuù, wù tèn. A kí tò é kitùʼùr wó lèn ji wàn kpù á ne, é kí yiì a dzə e le? A tàm wù yùyrí kitú kfə́.»

¹⁹Davir yén mo áwune səmnìnè, e kù nèn kìíy ji wàn kpù á ne. Wù dzə́r aáwune jii, «Wàn kpù ne à?» Á biímé ji wù kpù á ne.

²⁰Davir nèn ŋàʼáy fo nsay, e sù wún və́, e sòr, e màʼ ndzə̀y se sən sí. Wù màʼ bèy, e nèn dù e NYÙY TǍR lav, e bùnrì. Wù màysì, e nèn kfə̀n e wun ntoʼ. Wù kfə́n bey, e dzə̀r vifá ve yi, á fó, wù yí.

²¹Atǎr ntoʼ vəə́ dzə́r e wun jii, «Kinyo ke fòn yiìn ben ki dzə̀ ka? Wàn‑ee joyì, a fòn tóŋé, kfə̀n lem jíŋ, wàn kpú, fòn nánén, e yìkír à?»

²²Fòn Davir suúy jii, «Wàn‑ee joyì, a m lem jíŋ, kfə̀n tóŋé, kí jii, a tàm é NYÙY TÀR yiì shàm á mendzən mem, e yiì, é wàn wàá bónén.

²³Mo wù kpuun ne, bo shií wo m kfə́n a lèm jíŋ dzə̀ wo gha? Yòʼ dzə̀ m kfə̀n siìr dzəʼə̀m rə́ é bàm. Kù sí wiy dù mo, e yen wun, a bó yòʼ dzə̀ wù dzəə kfə̀n é bàm, e wìy yèn mo.»

²⁴Davir nèn a rəə̀r shilív shé wiiy və woo Batsheba. Wùn wun wíy lò, e shìíy, wù bóŋ bvəm, e dzə̀ə́ wán lumèn. Davir shù yír wan ji Solomon. NYÙY TÀR wáa kòŋ wán və̀n,

²⁵e nèn tsə̀nsí ŋgaà ntum və Natan ji wù du, e sùúy a ji á yii a yòŋ a yír wan á ji Jedidia, a dzə̀ á ji Nyùykoŋè, bìʼ fo Nyùy koŋ a wun.

²⁶Joav ku gìm Rabba woo ŋkàlaʼ wìr veé Ammon, e kèr mbìv yìmòʼ,

²⁷e nèn tsə̀nsí vé ntume fo Davir wùn ji á du, e sùúy sho a ji wun fùnèn ne a Rabba, e faàsì a kirə́ʼ kév fo ntòŋ sé ndzəv sí dzə̀kìn.

²⁸Wù báʼtí á kibér ke vé rərí, aá wiy, é wùn áwune ton á ŋkàlaʼ rə̀n, é búríi fíʼ a dzə a dzə̀ á yé wun woo fon.

²⁹Fòn Davir nen kù bàʼtí kibér ke vé rərí, wùn áwune dù e Rabba, e fùnèn, e tòn fó.

³⁰Á tòn bèy, e nèn shòʼ ntáráʼ fo fòn wóv kitu, e sòv e Fòn Davir kitu. Vé‑eè fèr ntáráʼ woo shooy e *kisha ke mbàm ke baar kí, e tùúy *síbaŋ shó. Vidzəəsì vé ntáráʼ ví‑iì dzə̀ moo akilu nshòv sitàn e mtaár bèy. Davir kfən kùúy vifá veé kwaʼ rər fó mvə̀mlaʼ foo fèy vigháʼán.

³¹Wù‑uù lì wír vee fó, á wáa lìm lim se tavkín sí. Vé‑eè lim lim aàsòó wùn à e visoó vi, à njàm sí, aámóʼó tsə́m nsay, tonè. Kù dzə̀ mo wù‑uù lóvti bèy e ŋkà se laʼ se wìr veé Ammon si sidzə̀m. Wùn à wír vəə́ nèn wìy lò, e kfə̀n é bàm é Jerusalem.