Read Lamnso 2 Samuel 14 Bible Online

2 Samuel 14 - Lamnso bible

2 Samuel 14

¹Joav woo wan Tsəruyia lò, e kìíy ji Fòn Davir waà sí yár a jiŋ Absalom,

²wù nèn tsə̀nsí wír e Tekoa ji wù du, e jàŋ a wiíy woo fií wùmòʼ fó fo. Wiíy və̀y wìy, Joav suúy shó jii, «Màʼ ndzə̀y sé kpu si, a yiì mo à diy a kpú bèy. Lá à yòʼ sòr biʼ. Á yiì moo ji à dìy ne a kpú yee shoon ntàmda bèy.

³À yíi dù, e suúy vinyo ve m lo, e naàrì e wò vìn e fòn.» Wù nèn naàrì vinyo ve wù du, e sùúy.

⁴Wiíy woó Tekoa və̀y dù, e bùn fon, e gbù e si wo, e làʼ kitú fo nsay, e lòn jii, «Á ku sə̀ á mo.»

⁵Fòn dzə́r e wun jii, «Kíghàʼ wò dzə̀ ka?» Wù bìnèr jii, «Nyàr, éè mò, m dzə̀ ben, a m dzə̀ á wíiy ŋkfə, lum wom‑eè kpù á ne.

⁶Nyàr, mo woo wánlè və‑əə̀ kér a wón abaà. Áwune ló, a fùnèn e kwaʼ, a wìr yòʼ dzə̀ á fo wóo jàvsìn. Wùmòʼ nèn lì a kifá, e ndzə̀n á wùmòʼ shó, wù kpú.

⁷Kfə́ə lò ne lèn e dzə̀m, e ŋàʼáy a e mò woo wánlè və́ wùn, a suúy a ji m fó á wír wo wù‑uù yuyrin fə́r və və̀y, aáwune wàá yúyrí, bìʼ á dzəʼə̀m fər və ye wù‑uù laàrìn. Nyàr, a kí kòóy bèy, bo m gòʼ a ne là wán wó a yòy, a tiír a e wùn wó. Ŋkfə lum wom kfən gòʼ saa là wán wo wù wíy lèm yír rə́.»

⁸Fòn nèn sùúy e wiíy və̀y jii, «Á kfən fo laʼ. M yíi nəə́ e wò kinyò fèn.»

⁹Yii bèy, wiíy woó Tekoa və̀y kfən bùn fon, e sùúy jii, «Nyàr, a fòn kì tìnén kinyo kìn, jay fəm fəə̀ shó, bo dzə̀ á wo vèr à kfə́ə yémé. Bó kfə́ə fòne yòʼ yíi a ker a jay wùmòʼ.»

¹⁰Fòn suúy jii, «A wìr lòo dzə, e kfə̀n sùúy kinyo e wò, à lì ŋgaàŋ, e wìy sho, é la wù yòʼ dzəə yiì mùm, e fò wò ŋgeʼ.»

¹¹Wiíy və̀y kfən bùn fon ji fòn ku bùnrì a NYÙY TÀR woo Nyùy və ji ŋgaà wo wù lo ntum ji wun yúyrí wán və bìʼ kpú fər və wàá ku màʼtì. Fòn Davir nèn bìnèr jii, «M suuy, liʼ a dzə̀ NYÙY TÀR wo wù dzəə̀n shó, yòʼ dzə̀ kifá ki yiì sə̀ʼ wan wò.»

¹²Wiíy və̀y nèn yòŋ jii, «Á ku màʼtì, é wánlè və kfən sùúy a kinyo kímóʼ kí e wun.» Fòn yòŋ ji wù wàá súŋnín.

¹³Wiíy və̀y bùn fòn jii, «Nyàr, fòn sà ghàn kfə́ é le, e bóo mùm sa kfə́ə kinyo kee ben a dzə̀ e wír ve dzəə̀n kfə́ə Nyùyi á? Mo fòn tenen fóo jàŋ wán və é bàm fó kwaʼ nsàm, bo nsaʼ rə̀n fèn koò a dzə̀ á wun woo fon.

¹⁴Wìr dzə̀m waà wíy kpu. Vèr áwune kù dzə̀ á moo mendzə́v me a mè səə̀rìn, la á yòʼ dzəə koò kifá. Yii bèy, bó Nyùy yòʼ kù dzə̀ ji wun wáa yiì, é wìr wáa kpu. Wù yii lo, wù dìn dzə́ə ye dzə̀ wìr woó kwaʼ nsàm shaà shó, e wìy, e yèn wun.

¹⁵M wìy bèn a ji m fiʼ sùŋnín a e ntoʼ, bìʼ fo wíri yiìn á ne m wáa fàn. M nen yèn á ji kí bòŋ, é m wiy, e sùŋnín a e fòn, a tàm é fòn yii á kinyo ke m waà lóné.

¹⁶Ghanmóʼó, é fòn ku sə̀ á wánlè və fo wìr wo wù taʼ e laàr vèr wan wom, é vèr buú fó wòŋ wo Nyùy‑iì foon e wír vəə́.

¹⁷Mo woo wánlè fòn kì ji jí se fòn woo tàr wor, sí yíi fo mo á rəsìn, bìʼ fo fòn dzəə̀n moo nshìylav Nyùy bèy, a wù kì jeéyjeéy fó kinyò ke juŋ ki wùn à ke bi kí. NYÙY TÀR woo Nyùy fòn kú a dzə a wùn fòn.»

¹⁸Fòn nèn sùúy e wiíy və̀y jii, «M dzə́r kinyo ke m dzə́r e wò, à sùúy mo a dzə̀ suuyrú.» Wiíy və̀y biímé jii, «Nyàr, á wàá dzə́r.»

¹⁹Fòn dzə́r jii, «Kí Joav kì fó kinyò fèn?» Wiíy və̀y bìnèr jii, «Nyàr, rúrú, mo fòn dzəə̀n shó, bo yòʼ dzə̀ wìr lìtì á kinyo fo fòn. Dzə̀ á rú, kì tìr á Joav mo woo wánlè fòn, e wày á jí sìn sidzə̀m e mǒ shuù.

²⁰Ŋgaà lìm və woo Joav yiì bèn ji wun fiʼ nàŋsín a kinyo. Yii bèy, a fòn fìír a moo nshìylav Nyùy, a wù kì á vinyo vidzə̀m ve ví kooy e wòŋàn.»

²¹Fòn yiì lò, e sùúy e Joav jii, «M biìmé ne kinyo ke à kì taʼà. Dù ri, e lì wánlè nsùm woo Absalom və̀y, e wìy sho.»

²²Joav nèn gbù e fòn si, e tsə̀m sí fo nsay, e lòn ji Nyùy ku səə̀vì a fon. Wù nèn bùn fon jii, «Nyàr, ŋgaà lìm və yèn ne rú lèn a ji á koŋ a wun, bìʼ fo fòn yuun á ne tóŋ ŋgaà lìm və.»

²³Joav nèn lò, e dù e Geshur, e lì Absalom, e wìy sho e Jerusalem.

²⁴Fòn fó sáʼ jii, «Absalom kù yíi a dzə, a dzə̀ e wun laʼ, e làa yòʼ a wìy e ntoʼ.» Absalom ku nèn a dzə e wun laʼ, a bó fòn yòʼ tooy wun.

²⁵Absalom‑eè dzə̀, a bó wìr wùmòʼ yòʼ dzə̀ shó wo wù‑uù bòŋèn moo wun, e kàr woŋ Isray, e tàr. Wù yòʼ‑oò kér nsem, e kèʼ fo wuù, e koʼ meé e kitu.

²⁶Kitú kfə́ kí‑iì lo, kí kwìíy, e lòóy, wù wàa kom e kitu ke kiya. Wù kómé, vidzəəsì vé nəŋ vi wàa dzə moo akilu abaà, é mfìʼ vidzəə̀sì yeé ntoʼ.

²⁷Absalom dzəə́ wón vee vilum ataár, woo wiíy e mòʼón, a yír rəə́ dzə̀ Tamar, a wù bóŋ é ŋàŋ.

²⁸Absalom dzə̀ʼə̀m e Jerusalem viyá ve fur vi vibaà, a bó wù yoʼ yèn fon e si.

²⁹Wù nèn lò, e jàŋ Joav ji wun túm á fo fòn wùn, Joav tén fóo wìy. Wù kfən tsə̀nsí ntum fo akàŋ vee abaà, Joav ku kfə̀n tèn fóo wìy.

³⁰Wù nèn sùúy e vé lìm vəə́ jii, «Súm Joavi dzə̀ e wómé ghaŋ, a sáŋ yee *barlìi dzə̀ shó. Vèn du, e wày və́yí shó.» Á nèn dù, e wày və́y shó.

³¹Joav ŋáʼáy kàŋ mòʼón, e dù, e yèn Absalom e wun lav, e dzə̀r shó jii, «Wón vé lìme tòn súm wóm ji ka?»

³²Absalom bìnèr jii, «Á tòn, bìʼ fo mò‑oo tsənsin ntum ji à wiy, à tén. A mò‑oo jaŋ wò bèy ji m túm á wò e ntoʼ, áà du, e dzə̀r á e fòn ji wù sà‑aà tooy mo fó Geshur ji ka á? A sì ben, bo yì‑iì bòŋ, é m goʼ á fo. Lì ri mo lèn, e dù sho, é m yén fon. A lòo dzə, a m jáy, é fòn yúyrí mo.»

³³Joav nèn dù, e naàrì e Fòn Davir kinyo ke Absalom yòŋèn e wun. Fòn toóy Absalom, wù nəə́, e gvə̀ʼtí, e làʼ kitú fo nsay, e nànèn, fòn səə́sí wun, e baàmé.