Read Lamnso 2 Samuel 22 Bible Online

2 Samuel 22 - Lamnso bible

2 Samuel 22

¹Yì‑iì dzə̀ é ghan se NYÙY TÀR‑iì bòyìrìn Davir fo aŋgaà və́ vibàné wo adzə̀m, bo taaka Saul, wù nèn a yòv luŋ e NYÙY TÀR.

²Wù‑uù yov, táŋ jii: «NYÙY TÀR, à dzə̀ kilán kém, kirə́ʼ ke kí kiŋsìn mo. À dzə̀ Mfə̀ə́r wom.

³Nyùy wom, à dzə̀ kirùmèn kém ké nsàm. À dzə̀ ŋkeè wom, ntav wo wù luŋèr mo. Dzə̀ wò kirə́ʼ kém ke tavín kí, mbvə̀ʼ ye m lir sho. Dzə̀ wò Mfə̀ə́r wom, aà boyìr mo fo aŋgàa vibàn vémé wo.

⁴Búríi wáa dzə fo NYÙY TÀR. M tóŋ e NYÙY TÀR, a wù sə́ mo fo aŋgàa vibàn vémé wo.

⁵«Kisə̀m kí‑iì mey mo, a kpúu siʼìr mo, a ndzə́v ye yí laar wírií sum mo.

⁶Vitám ve kpu vi‑iì koò ne mo, a m sí du kém áàŋkfəə́ wòŋ.

⁷Ŋgeʼ si‑iì rùn e mǒ kitu, m tóŋ e NYÙY TÀR, m rəə́mé Nyùy wom. Tóŋ yémé tó e wun kitùʼùr, wù yú jí yem e wun lav cù.

⁸Nsay nèn a sə̀ʼsì, a kar. Vitóm ve ví kér yúv ví wáa sə̀ʼsì, a njèʼ, səʼsì, njeʼè, bìʼ fo Nyùy‑iì shwiiy kilòŋ.

⁹Kindzə́ʼ ki wáa mee fo wun yuy, və́yí wáa fəə fo wun shuù, wù tsə́nsí káy se və̀y fó yuv, sí tòn virə́ʼ.

¹⁰Wù shúʼ yúv, a səʼə́y e nsay, a mbàʼ ye sənér dzə̀ e wun sar wuù.

¹¹Wù kóʼ e nshìylav rə́ ndzə̀m, a feŋ, a wìy. Wù dzə́ʼə́m é kitu ke mbàʼ, a wìy e shwer.

¹²Wù sə́tí kitú kfə́ e ndzə ye sənér, kikfə́m ke mbàʼ ki súm wun, mbàʼ wuù, a yì sə́n ji cùm.

¹³Kishèv ki wáa njàʼàm fo wun mbìy, və́yí wáa saʼ, a fəə́r káy si.

¹⁴NYÙY TÀR súŋnín fó yuv, á yú jí Taà Vitu, a yì báykir fo fo.

¹⁵Wù tsə́nsí mvən si, e tàʼár aŋgaà və́ vibàn, wù túm kishèv kí njáʼám, e bvə̀ə́r áwune.

¹⁶Àháà, NYÙY TÀR, à wàm aŋgaà vé vibàn. À fèr yúy yé, shwéri tsə́y áwune, ambuŋ veé rìbà ndzə̀ví yénsín, kinsə̀ŋ ke nsay ki fəə́sín fó meranén.

¹⁷«NYÙY TÀR ràmsì kiwó kfə́ fó yuv, e ghàr mo shó, e fə̀ə́r mo fó mvə̀m ndzə̀v ye shoóné.

¹⁸Wù fəə́r mo fo ŋgaà wom vibàn wo tavín wo. Wù sə́ mo fo wír ve á ban moó, aá sí táv, gháʼ mo.

¹⁹Mò‑oò dzə̀ é mvə̀m ŋgeʼ, áwune kaáy mo, yii bèy, NYÙY TÀR ku tòm mo.

²⁰Wù fə̀ə́r mo fo áwuné wo, m bóy. Wù bòyìr mo, bìʼ fo wù‑uù leey mo, koŋè.

²¹«NYÙY TÀR laámé mo, bìʼ fo m yúnin wun, e laàmé feyì, bìʼ fo m yòʼ kér jay.

²²M kù‑uù ghán a dzə̀ e NYÙY TǍR mbòv, m yòʼ‑oò lo màʼtì dzə́ə rə, e bìn e ye kisaŋ.

²³Mò‑oò yúnin vinyo ve Nyùy‑iì tinen vidzə̀m, m yòʼ‑oò lo ŋwày sáʼ rə́.

²⁴Mò‑oò dzə́ là shilóm e wun si, jámer kitú kém fó kinyò ke bi kí.

²⁵Á bèy, NYÙY TÀR laámé mo, e laàmé feyì, bìʼ fo mò‑oò yúnin wun, dzə́ là jay e wun si.

²⁶«NYÙY TÀR, à tíy vèn à wír ve á tíy e wò wùné. À yii dzə́ là shilóm vèn à wír vee là shilóme.

²⁷À kér shilív she juŋ shi vèn à wír ve á kér melív me juŋ mè, din nyár yé e wìr wo wù yòʼ ghán tìítiy.

²⁸À sə́ wír ve á yòʼ yén vitú vév, sen wír ve á kóʼor wún.

²⁹«NYÙY TÀR, à dzə̀ rú kikaʼày kém, à binèr ndzə yem ye sənér, a yì kfə́n ji ye ranén.

³⁰NYÙY TÀR, à fó mo vitaáví, a m laar shúu rər, kfə̀n líy kay ye á bomen, e kaàrí láʼ sho.

³¹«Nyùy wor və̀n dzə̀, a wù yii vinyo vidzə̀m tìítiy. Ŋkàʼme NYÙY TÀR kù yii tíy fo. NYÙY TÀR dzə̀ ŋkeè wìr dzə̀m wo wù tiir wun fo mbìy.

³²Dzə̀ la Nyùy, e shaà NYÙY TÀR, a dzə̀ la kilán, e shaà Nyùy wor?

³³Dzə̀ wun kikiŋ kém ke tavín kí, wù binèr dzə́ə ye m ghán sho e mboʼ.[24]

³⁴Wù yii, a wuú yémé caʼ moo yé nshà, a m ghán kicaárín é vitu ve aŋkoŋ.

³⁵Wù yéʼey mo mo dzə̀ m màʼ rə́r. Wù távir mo, a m maʼ kinte ke kishà ki.

³⁶«NYÙY TÀR, à kiŋ mo e ŋkeè wò, a m luŋ e shùu rər. Mo à tíy e mǒ ghaŋ, m kfə̀n ne ji ntav.

³⁷À fò mo kirə́ʼ é shùu rər, wuú yémé tiím, la m yòʼ lèrìr.

³⁸«Mò‑oò jùm aŋgaà vém vibàn, e koòrí, yòʼ‑oò dzə̀ m kfə̀n é bàm, a bó m laár áwune.

³⁹M sóvtí, la wìr yòʼ kfə̀n ŋàʼáy e yuv, m fòtì áwune, á kpúkír adzə̀m e mǒ sar wuù.

⁴⁰Wò‑oò fò mo vitaáví vé rər, m gháʼ aŋgàa vibàn vém adzə̀m.

⁴¹Áwune yú wó yém ntéŋ, a leʼkír, m ku laàr áwune láarin.

⁴²Á wáa tàʼ wír wo wù sə́ áwune, la wìr yòʼ a dzə. Á wáa toŋ sa e NYÙY TÀR, la wù yòʼ yuùrí.

⁴³M jò áwune, á wáa dzəʼ dzəʼə́n moo kibvər. M nyèŋrì áwune mo á nyèŋ kishaʼàr é dzəə.

⁴⁴«À sə́ mo, m gháʼ wír ve á tsə́y kóy vèr áwune. À lém mo, m wáa dzə taà saʼ fo vitúm vi, vitúm ve bó m yòʼ‑oò kiìn ví wáa shwi mo.

⁴⁵Á kú a neŋ, e mǒ si, a yàʼ. Á yú jí yem, á kù yùnín yunín.

⁴⁶Wúmé kpú fo áwuné bvə̀m, á wáa yàʼ, a meekír fo virə̀ʼ ve ví kiŋ áwune.

⁴⁷«NYÙY TÀR dzə̀ shó e tin, Á wáa burí wun wo dzəə̀n kirùmèn kém ké nsàm. Á wáa wùʼsì yír Nyùy wo dzəə̀n kilán ke kí kìŋsìn mo, m lúŋ.

⁴⁸Dzə̀ wun woo Nyùy wo wù‑uù səən mo, m tón aŋgaà vém vibàn, e wày áwune e mǒ sar saʼ.

⁴⁹Dzə̀ wun wo wù‑uù fəərin mo fo aŋgaà vém vibàné wo. Rúrú, NYÙY TÀR, wò‑oò kòʼór mo áàŋgàa vibàn vémé kitu. Wò‑oò bòyìr mo fo vé kinjuyrìí wo.

⁵⁰Bìʼ bey, NYÙY TÀR, m yíi a nàn vikuʼùy vé e vitúm ví mvəm. M yíi a yòv, a wùʼsì yír yé.

⁵¹«Rúrú, NYÙY TÀR leey fo fòn wo wù shoʼon, fó wun vitaáví, a wù ton vitúm vinín. Wù din koŋ rə́ ye wiyí e wìr wo wù yoʼon, din e Davir wùn à rám rəə́, e dù, e jòʼsì.»