Read Lamnso 2 Samuel 23 Bible Online

2 Samuel 23 - Lamnso bible

2 Samuel 23

¹Kisúŋnìn ke Fòn Davir ke bàm kí kíne. «Dzə̀ jí sém, mo Davir woo wan Jessi, jí se wìr wo Nyùy‑iì koʼorin, wír wo Nyùy Jakov‑iì yoʼon, a kfə̀n dzə̀ wir yòv wo juŋ e Isray.

²Kiyoy ke NYÙY TÀR kí súŋnin, shaa fo mò, jí sə́ sí dzə̀ e mǒ shuù.

³Nyùy wìr veé Isray sùŋnín ne, Kilán ke wìr veé Isray ki sùúy e mò jii, ‹Taà saʼ lóo fàn Nyùy, lóo saʼ wíri tìítiy,

⁴wù wàa dzə moo ndzə ye yì rán kijàvndzə, a dzə moo kintoshùy ke mbàʼ si yòʼ dzəə̀n é yuv, a dzə moo wuú ye yí ló, shùy lóo ban, vikwiíy ví wàa tokír.›

⁵«Rúrú, á mo Nyùy səəvì kfə́ə yém, bìʼ fo wù gwàrìn ne *mensaŋ mee là may vèr wun. Wù gwàr bèy, e naàrì, e lìʼ, a kí tíy fo. Á bèy, Nyùy kù wíy a ker mo, a lùŋèr ghán sidzə̀m, a yiì, é kinyo ke m diy kidzə̀m ki wáa dzə.

⁶Yii bèy, a wír ve bií dzə̀ moo njoŋ se á maʼày màʼàyìn. Bó yòʼ dzə̀ á ghàr é kiwo, a ker.

⁷Á kù wíy tòn tònèn, aá shwí, e rèŋ. Á lóo baʼtí, á tàʼ a dzə̀ kifá ke kishà ki, kìn à li shwán kòŋ, bóo baʼtí sho.»[25]

⁸Yír sé antav Fòn Davir si dzə̀ jii, Joshev‑Baashebet woo wír woó Ta‑Kemon, a dzə̀ kitú ke antav vee ataár.[26] Wù‑uù lì kòŋ rə́, e laàr wíri shó ghií waamé é shùu rər.

⁹Ntav fo antav vee ataári, wo wù batin wáa dzə Eleasar woo wan Dodo woó kfəə Ahohi. Wù‑uù dzə̀ wùn Fòn Davir e ghan se vé‑eè fùnèn wír veé Filistia ve vé‑eè baʼtin é Pas Dammin, wír veé Israyi wáa leʼkír.

¹⁰Eleasar tiím kfə́ kitávín, e neèr wír veé Filistia, e dù meé mo wù‑uù dorin, kiwó kfə́ kí távtí é nyùy. NYÙY TÀR yiì, wù tòn áwune é kishiíy fóo fèy e dzəə ye ghaʼán. Rə́r sí mày, vé rər veé Israyi kfə́n fo Eleasar‑iì dzəə̀n ji á shóʼtí á vifá ve rər fo dzə́n sí wùn.

¹¹Ŋgaà bàm fo antav vee ataári‑iì dzə̀ Shamma woo wan Agee, Agee woo lò fó Harar. Wír veé Filistiàa nèn lò, e bàʼtí e kwaʼ e Lehi, a kún ye baarí dzə̀ fó, fó e dzə̀m. Wír veé Israyi nèn nyèŋ wír veé Filistia, e tò é kòv.

¹²Yii bèy, Shamma tiím kitávín é kintìntìn ke kwaʼ, e kìŋ fó, e laàr wír veé Filistia. NYÙY TÀR yiì, wù tòn áwune é dzəə ye tavín.

¹³Wáa dzə e ghan símóʼ sí, aá sí lò a kav vifá,[27] wír veé Filistiàa báʼtí rə́r é Kiwoóy ké Refayim, a Fòn Davir dzə̀ é mbvə̀ʼ yeé Adullam. Wír vee ataár vìn ve vé‑eè dzəə̀n é mvə̀m ŋgoo antav Fòn Davir vee mtaári nèn lò, e sə̀y, e dù yèn Fòn Davir,

¹⁴a wù dzə̀ é kirə̀ʼ ké kilìr, a kiláʼáy ké wìr veé Filistia ki dzə̀ é Betlehem e ghan fóo fèy.

¹⁵Davir nèn lò, e yàr jiŋ Betlehem, e njàʼàm, e sùúy jii, «Wìr‑íì lo fó feé wóo fo mo mendzə́v me mè loòn fó ndzəv ye tuŋéné ye yí dzəə̀n é shùu kày e Betlehem.»

¹⁶Á bèy, antav vee ataár vìyi nèn dù, e tòʼnín kiláʼáy ké wìr veé Filistia e vitaáví ví, e tù mendzə́v fó ndzəv ye tuŋén rəy, e wìy sho, e fò e Fòn Davir. Yii bèy, la wù yòʼ nò. Wù cuùrì fo nsay ji wun cu a NYÙY TÀR shó,

¹⁷e sùúy jii, «Nyùy wáa teér fo m nó mendzə́v mèn. Kù sì mensə́ me wìr ve á kì foon vitú vév ji á du, e tù mendzə́v mèn.» Wù nèn kù tèn fóo no. Á vinyo ve ghaʼtín ví ve antav Fòn Davir vee ataári‑iì yiìn.

¹⁸Abishay‑iì dzə̀ kitú ke antav vee mtaár.[28] Fər və‑əə̀ dzə̀ Joav, a yè wov dzə̀ Tsəruyia. Abishay‑iì lì kòŋ rə́, e neèr wíri shó ghii taár, e nèn a ker yír ye kuʼùné moo wír vee ataár vìy bèy.

¹⁹Fo wír vee mtaári, vé‑eè yùʼnín Abishay, e shaà wir dzə̀m. Wù nèn a dzə kilìmbìy kév. Yii bèy, la ghay vəə́ yòʼ mèé e wó wìr vee ataár vìyi.

²⁰Benaya woo wan Jehoyiada wáa dzə sa wir shilìv she tavín shí, a wù‑uù yii viŋgaʼnìn ve vinyò. Wù‑uù dzə̀ wír woó Kabseel. Wù lò e kishiíy kímóʼ kí, e yùyrí agwèy ve tavkíné veé Moav abaà. Wù kfən wìy lò e kímóʼ kí, a mbàʼ gbú, wù nəə́ é bii, e yùyrí bvərə̀ʼ.

²¹Wù kfə̀n‑eè yùyrí kiŋgáʼ ke wìr woó Ejiv, a kí kér kòŋ é kiwo. Benaya‑aà dù, e nə̀ə́ wun a dzə̀ e kibur ki, e faàsì kòŋ fó kiwo wo, e yùyrí wun woo wír woó Ejiv sho.

²²Á vinyo ve Benaya woo wan Jehoyiada‑aà yiìn, bó a ker sa yír ye kuʼùné moo antav vee ataár vìy.

²³Fo wír vee mtaári, vé‑eè kìíynín wun feyì, yii bèy, á yòʼ‑oò táŋ wun e mvə̀m wìr vee ataár vìy. Fòn Davir nèn lèm wun, wù wáa leéy fo vé rər ve vé‑eè shiy wune.

²⁴Kibér ke wìr vee mtaár ki dzə̀ jii: Asahel woo fər Joav wùn à Elhanan woo wan Dodo woó Betlehem,

²⁵à Shamma wùn Elika veé Harod,

²⁶à Heles woó Palti, à Ira woo wan Ikkesh woó Tekoa,

²⁷à Abieser woó Anatot, à Mebunnay woó Hushat,

²⁸à Tsalmon woó Ahohi, à Maharay woó Netofa,

²⁹à Helev woo wan Baana woó Netofa, à Ittay woo wan Ribay woó Gibea e Benjamin,

³⁰à Benaya woó Piraton, à Hidday woó viwoóy veé Gaash,

³¹à Abi‑Albon woó Arbat, à Asmavet woó Bahurim,

³²à Eliaba woó Sha‑albon, à wón Jashenèe, à Jonatan,

³³à Shamma woó Harar, à Ahiyam woo wan Sharar woó Harar,

³⁴à Elifelet woo wan Ahasbay woó Maaka, à Eliam woo wan Ahitofel woó Gilo,

³⁵à Hesro woó Karmel, à Paaray woó Arbi,

³⁶à Igal woo wan Natan woó Tsoba, à Bani woó Gad,

³⁷à Tsəlek woo wan wìr Ammon, à Naharay woó Beerot wo wù‑uù béʼ ŋkeè rə̀r Joav woo wan Tsəruyia,

³⁸à Ira wùn Garev vee wír Itri,

³⁹e lì Uria woo wir Hit. Wìr dzə̀m‑eè dzə̀ nshòv saàmbà e mtaár.