Read Lamnso 2 Samuel 24 Bible Online

2 Samuel 24 - Lamnso bible

2 Samuel 24

¹Kilòŋ ké NYÙY TÀR kí kfən wìy lò, e shwìíy kùm wír veé Isray. Wù báyír Fòn Davir, wù wáy áwune é ŋgeʼ. Nyùy‑iì sùúy shó ji wù du, e tàŋ á wír veé Isray wùn à veé Judàa.

²Á bèy, Fòn Davir nèn sùúy e Joav wùn aàtàá mfòómé vəə́ jii, «Vèn ghán é virə̀ʼ vé ram seé Isray sidzə̀m, e tàŋ wíri, é m fiʼ kìíy mo á dzəə̀n. Ku kèʼ fo Dan, e sə̀y mèé e Beersheba.»

³Joav nèn sùúy e Fòn jii, «Mo wíri fə̀m dzəə̀n anín bèn, NYÙY TÀR ku kfə̀n dzə̀sì ámóʼó bey kirə́ʼ wií, é taàtá wom woo fon yén e sí rəə́. Yii bèy, taàtá wom woo fon sà kér shií e kin kee kinyo ki ben bìʼ ka á?»

⁴Fòn ku nèn ŋwày kinyo ke Joav wùn aàmfòómé kí ŋwayín. Á bèy, áwune ku nèn lò fo ntoʼ, a dù ji á táŋ á wír veé Isray.

⁵Á líysín Jordan, e nèn beè e mbìv Aror yee tsə́n, Aror wo dzəə̀n ntèʼ ye yì dzəə̀n é kintìntìn ke kiwoóy é nsay Gad. Á kèʼ táŋ fo fo, e nèn kòʼ é ntèʼ yee Jaser.

⁶Á lò fo fo, e dù, e mèé e mbìv wòŋ yeé Gilead wùn à yeé Taktim‑Hodshi,[29] e bóo dù e Dan‑Jaan. Á ló fó fo, e dù e Sidon, e mbìv yee fo shùy yii nəə.

⁷Á meé é ŋkàlaʼ yee Taya ye vé‑eè bomen kay, e kaàrí sho, e nèn dù, a ghan e ntèʼ sé wìr veé Hiv wùn à sé wìr veé Kanan si, e bóo màysì e Beersheba, e mbìv nsay Juda yee tsə́n.

⁸Á ghán woŋ, wú mày, e nèn kfə̀n é bàm é Jerusalem, aá ghán ne ŋwee bvə̀ʼə̀ e vishiíy ví mbaà.

⁹Joav nèn naàrì e fòn mo á taŋen wíri, á wáa dzə. Veé Isray ve yì‑iì dzə̀ á màʼ rə́rí‑iì dzə̀ ansə̀kì ghií waamé (800,000), a veé Judàa dzə̀ ansə̀kì ghii tàn (500,000).

¹⁰Fòn Davir màysì, e tàŋ wíri bey, kitú kfə́ kí nèn a saʼ wun, wù wáa toŋ e NYÙY TÀR jii, «Kinyo ke m yiìn kin ki dzə̀ jay wo tavín. NYÙY TÀR, m lón wò lèn ji à ku làysìn a jay wìr lìm wò. M kì yiì kinyo kìn e kiyúŋ kí.»

¹¹Davir bvəə́shí, a lò e yuv, a NYÙY TÀR tsə́nsí ne ntum rə e Gad woo *ŋgaà ntum və wo kfə̀n‑eè dzəə̀n ŋgaà si Davir.

¹²Ntum‑eè dzə̀ ji Gad suúy á e Davir jii, wun woo NYÙY TÀR fò wun a vinyo vitaár ji wù shóʼ á kee kimòʼón ki, ke wun yii á e wun.

¹³Á bèy, Gad nèn dù, e yèn Davir, e dzə̀r e wun jii, «À shòʼ a dzə̀ jíŋ ye yì koó woŋ wó viyá vitaár[30], moo jum ye aŋgàa vibàn vée wáa jùm wò ŋwee e taár, moo kifə̀ʼ ke kí nəə́ e wò wòŋ vishiíy vitaár a? Kwàʼtì kijuŋ, e nèn fò mo binèr ye m du, e fò e NYÙY TÀR wo wù tumen mo.»

¹⁴Davir suúy e Gad jii, «M sì é ŋgeʼ ye tavín, NYÙY TÀR yii shám mendzən feyì. Bòŋ é wù yii ke wú‑úù yii e vèr, e shaà ke yii wír.»

¹⁵NYÙY TÀR nèn tsə̀nsí kifə̀ʼ e Isray, e kèʼ fo kijàvndzə kee shooy, e dù, e meé mo ghán se vé‑eè foon sí‑iì màyìn. Wíri kpúkír woŋ Isray e dzə̀m nsə̀kì msaàmbà (70,000), e kèʼ fo Dan, e dù, e meé e Beersheba.

¹⁶Yii bèy, nshìylav NYÙY TÀR meé é Jerusalem, e lòo nàn wó ji wun waà sí laarì, NYÙY TÀR rə̀m ntéŋ bìʼ kilày, e nèn sùúy e nshìylav rə ye yì‑iì laar wíri jii, «Gheén lèn.» Wù wáa suúy bèy, a yì tíy e Arauna woo wir Jebus ghaa riimé.

¹⁷Davir yén nshìylav Nyùy ye yì laar wíri, e sùúy e NYÙY TÀR jii, «Jày mo jay və̀n, yiì mo kinyo ke bi kin. Vin vee wíri jày kév ka? Á dzə̀ kév moo anjiì. Kii wò NYÙY TÀR, ku màʼ ŋgeʼ rə̀n a dzə̀ e vèr à kfə́ə yémé kitu.»

¹⁸Wáa dzə e kishiíy fóo fèy, Gad dù, e yèn Davir, e sùúy sho jii, «Kóʼ e Arauna woo wir Jebus riimé, e bòm kíy cù NYÙY TÀRí fó.»

¹⁹Davir ku nèn kòʼ fó mo NYÙY TÀR kì tumen Gad, wù wíy, e sùúy e wun.

²⁰Arauna dù, e lòo leéy, e yèn a fòn wùn aàtǎr wòŋ vəə́ kóʼ fo wù‑uù dzəə̀n, wù meésín, e tsə̀m ndzəə́, e làʼ kitú fo nsay e fòn si,

²¹e dzə̀r jii, «Taàtá wom woo fon sà wìy fo wánlè və lìm bèn ji ka á?» Wù bìnèr jii, «M wiy ji m yún á riímé wó, e bòm kíy cù wóo cù NYÙY TÀR shó, ji kifə̀ʼ ke kí gbuùn e wír vémé kitu kìn ki sà‑áà may á?»

²²Arauna suúy e Fòn Davir jii, «Fòn ku lì a vifá ve ví gheenén á wun, e cù a Nyùy sho. Ambòŋe waà víne ve dzə̀ á yiì á cu ye tonèné shó, a vimbuʼ wùn à vimbùŋ ví waà vìne sa ve dzə̀ á lì á ji meŋkaʼ.

²³Mo woo Arauna, m wáa fo vifá vìn vidzə̀m e fòn, a lon ji NYÙY TÀR woo Nyùy fòn ku səə̀sí a cu fòn.»

²⁴Fòn sháʼnín e Arauna jii, «Àáy, m lo, e yun yunén. Yòʼ dzə̀ m yiì cu ye tonèné ji yé NYÙY TÀR woo Nyùy wom e kifá ke yòʼ dzəə̀n ndzəʼnìn sém kí.» Wù yòŋ bèy, e nèn làʼ riímé vəy wùn aàmbòŋe e *kisha ke mbàm ke fəvír kí *ashekel mtàn.

²⁵Fòn Davir nèn bòm kíy cù NYÙY TÀR fó, e yiì cu ye tonèné wùn à yé kikòŋnìne shó. NYÙY TÀR nèn yù bunrì ye wù‑uù bunrì bìʼ woŋ və́, kifə̀ʼ kìy ki mày fo Isray.