Read Lamnso 2 Samuel 3 Bible Online

2 Samuel 3 - Lamnso bible

2 Samuel 3

¹Vindzəʼ ve wír Saul wùn à wír Davir vi ku nèn a dù duùn fó mbìy, e bònen dù ntàmda, a wír Daviri kúy kuyín é vindzə̀ʼ, a vé Sauli kfə́n kfənén é bàm.

²Davir‑iì dzə̀ə́ wón vee vilum e Hebron ntuùfú, aá dzə̀ jii, Amnon wo yè wov dzəə̀n Ahinoam wo wù‑uù wìyìn fó Jesreel,

³Kileav wo yè wov dzəə̀n Abigail wo yì‑iì dzəə̀n wíiy ŋkfə Nabal woó Karmel, Absalom wo yè wov dzəə̀n Maaka woo wan Talmay, Talmay woo fon woó Geshur.

⁴Adonija wo yè wov dzəə̀n Haggit, Shefatia wo yè wov dzəə̀n Abital,

⁵e lì Itream wo yè wov dzəə̀n Egla. Á wón vee vilum ve Davir‑iì dzəən, a wù dzə̀ é Hebron.

⁶Mo wír veé kfəə Sauli rə́si maʼ rə́r wùn à wír Daviri, Abner wáa kuy e wír Saulí mvəm, a kùʼùr ntaʼ və.

⁷A Fòn Saul kér wiíy wo lemèn wùmòʼ a yírí dzə̀ Rispa woo wan Aiya. Wáa dzə e kishiíy kímóʼ kí, Fòn Ish‑Boshet wáa saʼ Abner ji wù sà lì wiíy tàr wov wo lemèn ji ka á?

⁸Kinyo kìn ki nyár Abner e dzəə ye bi, wù wáa dzər e Ish‑Boshet jii, «À kwaʼ ji m dzə̀ kiŋgàn ké wìr à, e bó a fiìnè kfə́ə Saul e wír veé Judàa? Yòʼ kù‑uù kér mo tàr won Saul wùn aàfə́r vəə́, à ŋkar sə́ sí a? Kí kù kim mo ven fo Davir koó. Yii bèy, à táŋnín mo lán e kinyò ke wiíy à?

⁹Nyùy ku màʼ ŋgeʼ e mǒ kitu, e dzə̀sì, a m fen dzə̀ làa yòʼ yiì kinyo ke NYÙY TÀR‑iì kàʼàn Davir sho, e kfə̀n lìʼ.

¹⁰Wù‑uù kàʼ ji wun wíy sə a vifon fo Saul kfəə, e fo a e Davir, é wù wáa saʼ a Isray wùn à Juda, e kèʼ fo Dan, e dù meé e Beersheba.»

¹¹Ish‑Boshet yú kinyo kee shooy, e làa yòʼ dzə́ə yu fóo suúy kinyo e Abner, bìʼ fo wù‑uù sí fan wun fánen.

¹²Abner nèn lò tsə̀nsí vé ntume fo Davir wùn ji á du, e sùúy sho a ji wun yòʼ méŋ a ŋgaàŋ wo dzə̀ wù wàa saʼ woŋ və̀n e dzə̀m. Wùn wun tátí á shuu, é wun yiì sə̀ wun, é wù wáa saʼ a woŋ Isray e dzə̀m.

¹³Davir dù, e biìmé, e bìnèr ji kinyo ki dzə̀ á kimòʼón ke dzə̀ á kù waà yiì, é bo wùn wun tár á shuu. A kí dzə̀ á ji yòʼ dzə̀ Abner wìy yèn á sí rə́, a bó wù wíy á e Mikal woo wan Saul.

¹⁴Davir nèn kfə̀n tsə̀nsí sa aŋgàa ntum fo Ish‑Boshet woo wan Saul ji wù siir á wíiy və Mikal e wun. Wun‑eè nə̀ə́ á wiíy woo shooy e vinyè vé vilum ve wìr veé Filistia vi wií.

¹⁵Ish‑Boshet nen tsə̀nsí wíri, á dù, e sə̀ Mikal fo lum və Paltiel woo wan Laish.

¹⁶Lum və Paltiel wáa jùmrì wun fo bàm, a toŋ. Wù dù, e mèé e Bahurim, Abner kàntì wun jii, «Á kfən e bàm fó laʼ.» Wù nèn a kfən e bàm.

¹⁷Abner nèn lò, e dù, e yèn kfə́m sé wìr veé Isray, e ghày aáwune jii, «Kí sì ntàmda mo vèn‑eè kèʼèn a yar jíŋ ji bo á kì kòʼór á Davir ji fon won.

¹⁸Vèn yii ri lèn bèy, kí NYÙY TÀR‑iì lo sùúy kùm Davir ji wun wíy shaà a dzə̀ fo ŋgaà lìm və woo Davir, e bóo fəə́r wír və́ veé Isray fo wír veé Filistiàá wo, e bòyìr áwune fo aŋgàa vibàn véví adzə̀m.»

¹⁹Abner kfən nyàʼtí, e dù, e sùŋnín e kfə́ə Benjamine, e nèn dù, e yèn Davir e Hebron, e fèr e wun mo kwaʼtì wìr veé Benjamine dzəə̀n, à yé wìr veé Israyi e dzə̀m.

²⁰Abner wìy, e yèn Davir e Hebron bèy, a wù wiy wùn à wíri mbaà, Davir nèn yiì ŋkàʼ wóv.

²¹Abner lò, e sùúy e Davir jii, «Bòŋ é m du dúun, e bàʼtí wír veé Isray adzə̀m, e fò e taàtá wom woo fon, é wùn à fòn suúsín, é fòn wáa saʼ áwune, a wàrkìr.» Á bèy, Davir nèn tsə̀nsí Abner, wù wáa dù, e kfə̀n fò sáʼ ji á maʼti Abner, é wù du á kijuŋ.

²²Abner ku nèn lò fo Hebron, a kfən mo Davir kì tsənsin, e fò sáʼ ji á ku màʼtì, é wù du á kijuŋ. Kù mo wù loòn, Joav wùn à wír Davir ve vé‑eè dzəə̀n é kwaʼ rərí nèn nə̀ə́, aá kér vifá vigháʼán ve á kuuyin fó kwaʼ rər.

²³Á nəə́ bey, e kù nèn yù ji Abner woo wan Ner kì wìy, e yèn á Fòn Davir, wù tsə́nsí á e bàm, e fò sáʼ a ji á maʼti, é wù du á kijuŋ.

²⁴Joav nèn dù, e yèn fon, e dzə̀r jii, «Nyàr, a sà dzə̀ kí ghàn é le, é bo Abner tó fen, é fòn kfən màʼtì, é wù du á?

²⁵Nyàr, á sà kì ji Abner woo shooy woo wan Ner kì wìy bey ji wun bóʼtí fon, e kìy woŋ, e kfə̀n shwèʼ mo ghán fòne dzəə̀n á? Yòʼ dzə̀ á kimeŋnìn ke kinyò.»

²⁶Joav lòo màʼtì Fòn Davir, e nèn tsə̀nsí wíri e Abner bàm, a bó Davir yòʼ kì. Á dù, e lì wun fo ghaa ndzəv ye tuŋéné yeé Sira, e kfə̀n shó.

²⁷Abner nəə́ é Hebron, Joav kwàr wun, wùn wun dù e shùu kày moo ji wùn wun kér a visúŋnìn vee wír abaà bey, wù nèn sòv wun fo bvə̀m, e yùyrí. A wù sov bèy ji wun siir á ŋkfə́tír wo Abner‑iì yuyrin Asahel woo fə́r və.

²⁸Davir yiì yù kinyo kìy, e yòŋ jii, «Bó m yòʼ kér kiwó e Abner kpu. Vèr à woŋ wómé yòʼ kér njò e NYÙY TǍR si, e wìy dù mày.

²⁹Lòné ku gbù e Joav wùn à kfə́ə rəə́ kitu, é la wùn à kfə́ə rəə́ yòʼ wìy a buú wír wo wù wáa ker yàsí woo ntònmbàŋ, kìn wo wù joy shivnsay, é la kfə́ə rəə́ yòʼ wìy a buú sa wír woo ghéʼncey, kìn wo wù‑úù kpú é shùu rər, à wo wù wáa dzə e kitàn ke vifa ve yi.»

³⁰Á mo Joav wùn fər və Abishay‑iì yuyrin Abner bìʼ wan yè wov Asahel wo wù‑uù yuyrin é kwaʼ rər é Gibeon.

³¹Fòn Davir lò, e fò sáʼ e Joav wùn à ŋgoo rə jii, «Vèn tiíné ndzə̀y sí fó wùn. Vèn maʼ vinsàʼ ve ndzə̀y ví, a dìy kpú Abneri.» Fòn Davir yòŋ bèy, wúnwun kitú kfə́ wáa ghan e bǎm ŋkùv.

³²Á nèn dù, e dzəə̀mè Abner e Hebron, Fòn Davir wáa toŋ e kitu ke sày kitávín, wíri wáa toŋ sa.

³³Fòn‑eè tóŋ kpú Abner, táŋ jii: «Abner, à ghàn é le, e bóo kpu moo wiíy? Á yòʼ‑oò lo kùr kóy sé, aá yòʼ‑oò lo tàŋsìn wuú yé. À kpù moo wír wo yuyrin vé kighèʼe.»

³⁴Fòn màysì, wíri kfən tòŋnín e Abner kitu ke sày.

³⁵Á rə́sí, a dìy kpú bèy, wíri wáa lon fon kishiíy kifur ji wù ku wày á kifá e shuù. Wù sháʼnín ji a dzə̀ ji wun wáy kifá e shuù, a bó shùy yóʼ ne nə̀ə́, Nyùy kù màʼ a ŋgeʼ ye tavín e wun kitu.

³⁶Wíri yén bey, kí bòŋ áwune, á nèn lì e vifii. Rúrú, kinyo kidzə̀m ke fòn‑eè yii ki‑iì boŋ áwune féyì.

³⁷Wír fòn adzə̀m, à wìr dzə̀m woó Isray nèn kìíy kijuŋ e kishiíy fóo fèy ji bó fòn yòʼ kér a kiwó kfə́ e Abner kpu.

³⁸Fòn lò, e sùúy e wír vəə́ é kishiíy fóo fèy jii, «Vèn yoʼ yèn ji wàn ntoʼ wo dzəə̀n wír wo tavín woó Isray kpù lán à?

³⁹Wúné seèmè ne mo lán mo m fə̀m dzəə̀n fon wo yoʼon Nyùy. Wón Tsəruyia vìne sí táv, gháʼ mo. NYÙY TÀR ku làʼ ŋgaà yiì ye bií mo yii rəə́ dzəə̀n.»