Read Lamnso 2 Samuel 4 Bible Online

2 Samuel 4 - Lamnso bible

2 Samuel 4

¹Wan Saul woo Ish‑Boshet yú ji á yùyrí a Abner e Hebron, wúné tiíné wun, wìr dzə̀m woó Isray wáa yàʼ.

²Ish‑Boshet wáa dzə, a wù kér vilìmbìy ve rər vibaà. Yír wo mòʼóne‑eè dzə̀ ji Baana, a yé wùmòʼó dzə̀ ji Rekav. Áwune‑eè dzə̀ wón Rimmon woo wír woó ntèʼ yee Beerot, a dzə̀ ji áwune kù dzə̀ kfə́ə Benjamin, bìʼ fo vé‑eè li ji Beerot dzə̀ á ntèʼ Benjamin.

³Kí‑iì dzə̀ bey, bìʼ fo wír veé Beeroti‑iì loòn a dzə̀ fó Gittayim, e dù a dzə fo, e wìy shem lán.

⁴Wan woo Saul ram wùmòʼ wáa dzə Mefiboshet woo wan Jonatan, a yì‑iì dzə̀ ntèŋ. Wù‑uù dzə̀ viyá vitàn e ghan se vé‑eè yuyrin Saul wùn Jonatan. Sáʼka woo kùm kpú yév‑iì wìy fó Jesreel, liy və nèn lì wun, a leʼ sho. Á bèy, mo wù‑uù gir e ŋàŋ, Mefiboshet nèn gbù, e bóo keerí ndzə́m.

⁵Rekav wùn Baana nèn wìy fəə̀ é kishiíy kímóʼ kí, e dù e Ish‑Boshet ntoʼ, a shùy kóŋrí ne, a sì ghán se fòn meemè. Á wáa meé e faáy kishiíyí,

⁶a wiíy ntoʼ wo wù kì dzə́ e shùu kibùʼ, féti sáŋ kì yèʼ ne, a buuné, Rekav wùn Baana nèn soòné, e nə̀ə́ e lav.[5]

⁷Á nəə́ bey, e nèn dù duùn e Ish‑Boshet mvə̀m fàáy kishiíyí, e laàr wun e mbvə̀ʼ, a wù buúne. Á nèn shòʼ kitú kfə́, e lì, a dù sho. Á ghán vitsə́ʼ vifur, e tòsín kiwoóy ké ndzəv yee Jordan,

⁸a dù e Hebron, e dù, e fò kitú kìy e Fòn Davir. Fó bèy, suuy jii, «Kitú ke Ish‑Boshet woo wan Saul ki kíne. Dzə̀ kitú ke ŋgaà vibàn fòn. Wù‑uù táŋ ji á laar á fon. NYÙY TÀR siìr ne ŋkfə́tir fòn lán e Saul wùn à rám rəə́.»

⁹Davir bìnèr e Rekav wùn fər və Baana vee wón Rimmon woó Beerot jii, «Mo NYÙY TÀR wo wù‑uù fəərin mo fó ŋgeʼ sidzə̀m dzəə̀n shó, vèn‑éè yén ke kí lo, e koóy ven.

¹⁰Wìr‑iì wìy é Tsiklag, e sùúy e mò ji Saul kpù á ne, suuy bèy, kwaʼtì kfə́ ji wun wiy a dzə̀ á e sáʼka wo juŋ, m nèn bàm wun, e yùyrí. Á vilaámé ve mò‑oò foon e wun.

¹¹Á bèy, bo ké wìr wo wù yuyrin wír woo là jay, a wù buúne e wun lav ki yíi a dzə kfə́ é le? M lo lèn, e siìr ŋkfə́tír e věn kitu, e laàr ven fó kitu ke nsay.»

¹²Davir suúy bey, e yòŋ vé rər vəə́ yúyrí Rekav wùn Baana, e shètì wó sév wùn à wuú sév sí, e keèrì dzə́n sév é ghaa kisə̀m keé Hebron. Á nèn lì kitú ke Ish‑Boshet, e dù, e lìtì e Abner sày e Hebron foo fèy.