Read Lamnso 2 Samuel 5 Bible Online

2 Samuel 5 - Lamnso bible

2 Samuel 5

¹Rám seé Isray sidzə̀m si nèn wìy, e yèn Davir e Hebron, e sùúy e wun jii, «Vèr dzə̀ jav yè wùn, e kfə̀n a dzə mensə́ mè.

²Yì‑iì dzə̀ é ghan se sí‑iì shaàn, a Saul dzə̀ fon wor, a yì‑iì li wò wír veé Isray, du sho e shùu rər. A NYÙY TÀR‑iì lo kàʼ wò ji à wíy a leéy a fo wír və́ veé Israyi mo nshìy lèéy fo njiì, aà wíy a dzə a taà saʼ woó Isray.»

³Mo kfə́m sé wìr veé Isray sidzə̀m si wìyìn fo Fòn Davir wùn é Hebron bèy, wù gwàr *mensaŋ wùn áwune e NYÙY TǍR si. Á nèn yòʼ wun, e kòʼór ji fon woó Isray.

⁴Vé‑eè kóʼor Davir ji fon, a wù dzə̀ kiyá mtaár, wù sáʼ vifon kiyá mkweè.

⁵Wù‑uù sàʼ wír veé Juda e Hebron kiyá saàmbà e ŋwee ntuùfú, e sàʼ wír veé Isray wùn à veé Judàa é Jerusalem viyá nshòv sitaár e mtaár.

⁶Vé‑eè kóʼor Davir ji fon, a Jerusalem dzə̀ nsay wìr vee Jebus. Fòn Davir nèn lì wír və́, wùn áwune dù ji á du, e tòn a fó. Wír veé Jebusi‑iì kwaʼtì ji bó yòʼ dzə̀ Davir tòn á ŋkàlaʼ yee Jerusalem. Á nèn a suúy e wun jii, «Bó yòʼ dzə̀ à làʼ kiwuú ké fèn. A fə̀m jòʼ amfìr wùn aàntèŋe, á kù jùm wò fo fèn.»

⁷Yii bèy, Davir ku yòʼ tòn ŋkàlaʼ yee Sion rə̀n ye á bomen, yì táv, e bìnèr yír ji Ŋkàlaʼ Davir.

⁸Wáa dzə e kishiíy fóo fèy, Davir dzə́r e wír vəə́ jii, «Wìr dzə̀ shó fèn wo wù bànèn wír veé Jebusi, e kòóy mo ye dzə̀ wù nə̀ə́ áwune e rə́r sí á? Bo a dzə̀ ŋgaàŋ kù tòsín làvŋgòm, e bóo nəə́, e fùnèn amfìr wùn aàndzə́m vísəə.» Á nèn lò, e fùnèn, e tòn. Á kinyo ke kí‑iì yiìn, é bo á siíy a màʼ lám jii, amfìr wùn aàndzə́mé yòʼ yii nəə e NYÙY TǍR lav.[6]

⁹Mo Davir tònèn ŋkàlaʼ yee shooy, e bìnèr yír ji Ŋkàlaʼ Davir, e nèn a dzə fo. Wù lò, e bòm gháŋ si, e kaàrí, e tàr, e kèʼ fo vé‑eè wayin a dzə̀ nsay ye wayín é wǔn gwan, e mbìv ye shùy yii tó fo fo.

¹⁰Wù ku nèn a tavkír, a dù duùn fó mbìy, bìʼ fo NYÙY TÀR woo Taà Mànjòŋ kù‑uù dzəə̀n wùn wun.

¹¹Hiram wo yì‑iì dzəə̀n fon woó Taya nèn lò tsə̀nsí wír wùn à vicí vé *sidar vi, e kfə̀n tsə̀nsí sa vé kintaa wùn à vé kimbome ji á du, e bàʼrì a ntoʼ Fòn Davir.

¹²Fòn Davir nèn kìíy ji NYÙY TÀR tùúy a ne sáʼ rə́ ji fon wìr veé Isray, e kfə̀n yiì, á kiíynín vifon və́, bìʼ wír veé Isray ve dzəə̀n wír wun woo NYÙY TÀR.

¹³Mo Fòn Davir loòn fó Hebron, e wìy, a dzə e Jerusalem bèy, wù koóy vikìy ámóʼó, e kfə̀n lèm ve lemèné. Wùn áwune dzəə́ wón anín, vee vilum wùn à vee vikìyí.

¹⁴Yír sé won ve wù‑uù dzəən é Jerusalem si dzə̀ jii, Shammua wùn à Shobav, à Natan, à Solomon,

¹⁵à Ibhar, à Elishua, à Nefeg, à Jafia,

¹⁶à Elishama, à Eliada, e lì Elifelet.

¹⁷Wír veé Filistiàa yú ji á kòʼór a ne Davir ji fon wìr veé Isray, e nèn kòʼ ji á jwím á wun, e koò. Davir yú bey, e nèn sə̀y, e dù a dzə e kirə̀ʼ ke kiŋsìn kí.

¹⁸Wír veé Filistiàa wìy, e sàŋrì wún é Kiwoóy ké Refayim,

¹⁹Davir nèn beè NYÙY TÀR, e dzə̀r jii, «A dzə̀ m dù, e fùnèn wír veé Filistia a? À yíi way áwune e mǒ kiwo a?» NYÙY TÀR biímé jii, «Kóʼ fó, m kù yíi way wír veé Filistia e wò kiwo.»

²⁰Davir nèn dù, e tòn áwune é Baal‑Perasim. Wù tòn bèy, a saarí jii, «NYÙY TÀR tsə̀y ne aŋgaà vém vibàn mo tsə̀y kúŋ bey.» Á kinyo ke kí‑iì yiìn, bo á yoŋ yír kirə̀ʼ kee shooy ji Baal Perasim[7].

²¹Wír veé Filistiàa‑aà nyèŋ, e màʼày mebvə̀m mev, Davir wùn à wír vəə́ táyrí.

²²Shintàm shi lòo dàr, wír veé Filistiàa kfən siì wìy, e sàŋrì wún é Kiwoóy ké Refayim.

²³Davir kfən dù, e beè NYÙY TÀR. Wù suúy e wun jii, «Lá à yòʼ kèʼ rə́r fó mbìv fen. Dù, e kèʼ a dzə̀ fó bàm é ŋkìʼnìn vicì vé *balsam.

²⁴À yíi yu kiléŋléŋ ké nsən se givìn sí é kitu ke vici vé *balsam, bo sì ghán, áà nèn kìíy ji m shèm ne a mbìy ji m ton mànjòŋ woó Filistia.»

²⁵Davir nèn yiì mo NYÙY TÀR kì suuyin, e jùm mànjòŋ woó Filistia, e kèʼ fo Geba, e dù, e meé e Geser.