Read Lamnso 1 Afòn 10 Bible Online

1 Afòn 10 - Lamnso bible

1 Afòn 10

¹Yaà woó Sheba‑aà yù léŋ Fòn Solomon, e kfə̀n yù nəə́nín ye wù nəənin wùn NYÙY TÀR, wù nèn a wìy ji wun taásín á wun e dzə́tí se tavkín sí.

²Wù nəə́ é Jerusalem e ŋgoo wìr e gháʼán, aàkameri béʼ virə̀ʼtìn ve vifa wùn à *kisha ke mbàm ke baar kí kigháʼán, à *síbaŋ seé kilùm si. Wù wìy bèy, e dzə̀tí vinyo vidzə̀m ve wù‑uù kér e wun vifii e Fòn Solomon.

³Fòn Solomon bìnèr vinyo vidzə̀m ve wù‑uù dzə́ti, la kinyo ki yòʼ a dzə sho kée ghaʼ fo wù naari.

⁴Yaà woó Sheba yén vifií vé Fòn Solomon, e kfə̀n yèn ntoʼ ye wù bàʼrìn,

⁵e kfə̀n siì yèn viyíkìr ve ví‑iì tíy e wun si, e yèn sá mo atǎr ntoʼ vəə́ kér antaʼ jeéy jeéy, e yèn nsheèlav sə́ wùn à ndzə̀y sév sí, e yèn wír və́ ve á béʼ bóm, e kfə̀n yèn sá cu se tonèn sí se wù‑uù yii e NYÙY TǍR lav cù sinín, shúu má wun.

⁶Wù suúy e Fòn Solomon jii, «Vinyo ve mò‑oò yú e mǒ wòŋ ji à yii, kfə̀n yú mo à kér vifií, m dzə̀ a m yén ji ví dzə̀ á rú.

⁷Bó m yòʼ‑oò ló a biimé, bánlà lèn wo m wìyìn, e yèn e sí yémé. Kí din ji m yòʼ‑oò lo yù á kintoʼnìn. Vifií vé wùn à vikuʼùy vé vi shaà kinyo ke mò‑oo yú.

⁸Bòŋ ké wìr vé, bòŋ ké nsheèlav sé, mo áwune rə́si tíy e wò si, yuúri vifií vé ghán sidzə̀m.

⁹Búríi wáa dzə fo NYÙY TÀR woo Nyùy wò, wun wo wù kòŋèn wò, e lèm wò e kàvàʼ woó Isray. NYÙY TÀR kòŋ Isray, e dù màysì, e nèn kòʼór wò ji fon wo wù wáa saʼ áwune, a saʼ vifon tìítiy là kiloʼ.»

¹⁰Yaà woó Sheba nèn fò Fòn Solomon kisha ke mbàm ke baar kí, a kí dzə̀ akilu ansə̀kì akweè, e kfə̀n fò wun virə̀ʼtìn ve vifa vigháʼán, à síbaŋé. Bó Fòn Solomon yòʼ‑oò lo kfə̀n wìy kòóy nyanyày virə̀ʼtìn ve vifa vee mo Yaà woó Sheba‑aà foon e wun vìn.

¹¹Kù dzə̀ sá mo ŋgoo amàvìkoŋ Fòn Hiram‑eè wìyìn e kisha ke mbàm ke baar kí fó Ofir. Ví‑iì lóo wìy bèy, e bèʼèy sa vicí vee jeéy ví vigháʼán wùn à síbaŋé.

¹²Fòn Solomon nèn lì vicí viy, e fèr vitóm ve lav cù sho wùn à veé ntoʼ vi. Wù kfən fèr sa lúŋ mbàytì wùn à yé nshìí shó ji vé yòvi wáa kùm. Bó á yòʼ‑oò lo kfə̀n ghàn kòóy vicí vee jeéy ví vigháʼán moo vee shooy, e shem lán.

¹³Fòn‑eè fò Yaà woó Sheba kifá kidzə̀m ke wù‑uù koŋè, e bóo lì afómo veé ntoʼ ve Fòn‑eè foon ne e wun. Á bèy, Yaà nèn a kfən e bàm e wun wòŋ wùn à nsheèlav sə́ sí.

¹⁴Yì‑iì lóo dzə e kitu ke kiya, Fòn Solomon sə̀ kisha ke mbàm ke baar kí moo akilu nsə̀kì nshòv sitaár e mbaà (23,000) bey,

¹⁵e bóo lì mbàm se wónlě wayí‑iì laʼ e wun, à séʼ wo vé‑eè kooy fo way, à nsùʼ wo afon veé Arabia adzə̀m wùn aàtǎr saʼ veé vibàr ve wòŋe‑eè fó e wun.

¹⁶Fòn Solomon‑eè fèr aŋkeè ve kuʼkìné ghii baà, e dzə̀v kisha ke mbàm ke baar kí, e làʼtí e wùn wó, a ŋkeè wo mòʼón li kisha ke mbàm ke baar kí moo akilu saàmbà[14] bèy.

¹⁷Wù kfən fèr sa ámóʼó vee aŋkeè ve ŋeeríné ghii taár, ve vé‑eè dzə̀vìn sá kisha ke mbàm ke baar kí, e làʼtí e wùn wó, a ŋkeè wo mòʼón li kisha ke mbàm ke baar kí moo akilu abaà[15] bey. Wù‑uù lèm aŋkeè vìn adzə̀m e lav ye á yoŋ ji Kóv Lebanon.

¹⁸Fòn Solomon‑eè fèr sá kàvàʼ wo kuʼùn, e tòʼtí sóŋ kitàm, e nàvtì sho, e kfə̀n làʼtí kisha ke mbàm ke baar ke juujùŋ ki é wǔn kàvàʼ.

¹⁹Kàvàʼ woo shooy‑iì kér ŋkèʼ si ntuùfú, a bámé dzə̀, aá fér é kiŋkar. Mbìv sé kàvàʼ see sibaà sí‑iì kér virə́ʼ ve á neer kóy si shó, aá fér abvərə̀ʼ abaà, á wáa tiy fo.

²⁰Abvərə̀ʼ ámóʼó wáa dzə nshòv sibaà e ghvə̀m, aá tíy e ŋkèʼ see ntuùfú. Vé‑eè tíy e ŋkèʼ ye mòʼón abaà, wùmòʼ fó kor fèn, wùmòʼ fó kor fèsə. Bó kfə́ə kàvàʼ woo ben yòʼ‑oò yiì ne a dzə e kitum kímóʼ kí.

²¹Vé‑eè fèr abàr vee Fòn Solomon ntoʼ a dzə̀ e kisha ke mbàm ke baar kí, e kfə̀n fèr sa vifá veé lav ye á yoŋ ji Kóv Lebanon e kisha ke mbàm ke baar kee wúntí kíwun ki. Á yòʼ‑oò lo fèr kifá kímóʼ kí e kisha ke mbàm ke fəvír kí, bìʼ fo e Solomon ghan, vé‑eè li kisha kee shoon ji kifá kee fó tèr.

²²A kí dzə̀ bey, bìʼ fo Fòn Solomon‑eè kér ŋgoo amàvìkoŋ ve vé‑eè ghán e rìbà ndzə̀v wùn à vé Fòn Hiram vi. Yì‑iì lóo dzə e bǎm viya vitaár, amàvìkoŋ vìne kfə̀n, aá béʼéy kisha ke mbàm ke baar kí wùn à ke fəvír ki, à sóŋ sé kitàm si, aàŋkaàvàŋe, e bóo lì ambùy.

²³Fòn Solomon‑eè shaà afon veé kitu ke nsay adzə̀m e bùʼ, e kfə̀n shaà e vifii,

²⁴a wìr dzə̀m woó kitu ke nsay yár jíŋ ji wun ku wìy, e yèn á vifií ve NYÙY TÀR‑iì foon e Fòn Solomon.

²⁵Á ku nèn a wìy, a wìr mòʼón mòʼón kér fómo wóo fo sho. Aá wiy e vifá vee fèr e kisha ke mbàm ke fəvír kí, à vee fèr e ke baar kí. Wùmòʼ wàa wìy e ndzə̀y sí, wùmòʼ wàa wìy e vifá ve rər ví, wùmòʼ wàa wìy e virə̀ʼtìn ve vifa vi. Aámóʼó wiy kév e nyám se ŋkoʼ si, kìn vimbèʼbìy vé nyàm se ŋkoʼ vi, kù bey kù bey, viyá vidzə̀m.

²⁶Fòn Solomon kfə̀n‑eè bàʼtí *viténtén vé rər ve səŋ nyám si wùn à nyám se ŋkoʼ si nyanyày. Wù‑uù kér kár si kishóv ghiì kweè e nsə̀kì (1,400), kfə̀n kér nyám se ŋkoʼ nsə̀kì nshòv sibaà e ghvə̀m (12,000). Wù‑uù lèm vifá vìn e ŋkà se laʼ se á yoŋ ji ŋkà se laʼ se kar, e lèm vímóʼ ví é Jerusalem, fo wun woo fon‑eè dzəə̀n.

²⁷Fòn Solomon‑eè yiì, kisha ke mbàm ke fəvír wùn à ke baar kí wáa dzə e Jerusalem ji kifá kee fó tèr moo tíy bey, a kicí ké *sidar ki fúm fo fumén moo kicí ké *sikamor keé sar agwan veé Juda bèy.

²⁸Nyám se ŋkoʼ se Fòn Solomon si dzə̀, a sí‑iì lo a dzə̀ fó Ejiv wùn à fó Kue. Wónlě way veé ntoʼo‑oò lo, á wàa dù e Kue, a yun fo fo,

²⁹a kávi dzə̀ *ashekel kishóv mtàn e wiì (150), a dzə̀ shekel woo kishà ke mbàm ke fəvír kí. Á lo, á yùn kiténtén fó Ejiv, a kávi dzə̀ ashekel ghií ntuùfú. Á nèn a lò, a dù, a fiìnè viténtén vin wùn à nyám si aàfon veé Hit wùn à veé Arame adzə̀m.