Read Lamnso 1 Afòn 12 Bible Online

1 Afòn 12 - Lamnso bible

1 Afòn 12

¹Rehoboam nèn lò, e dù e Shekem fo wír veé Israyi‑iì baʼtin ji á yíi koʼór a wun ji fon.

²Jeroboam woo wan Nebat wo wù‑uù leʼen Fòn Solomon, e dù e Ejiv yú sáʼka və̀n, e nèn kfə̀n é bàm fó fo.[17]

³Á nèn tùm wíri fo Jeroboam wùn ji wù wàá wiy. Wù wìy, wùn à màŋgòŋ woó Isray e dzə̀m nèn dù, e yèn Fòn Rehoboam, e bùn, e sùúy sho jii,

⁴«Nyàr, Solomon woo tàr wov‑iì rə́ʼəy a ver e kibeʼèy kí. Kii wun, á ku fàr a kibeʼèy kin, é vèr wáa neŋ a e wun sar.»

⁵Wù suúy aáwune jii, «Vèn du, vishiíy ví shaa vitaár, vèn wìy, e yèn mo. Áwune nèn dùkìr.»

⁶Fòn Rehoboam nèn tòóy ŋgày sé wìr se yì‑iì dzəə̀n aŋgàa ntir tàr wov Solomon, e dzə̀r aáwune jii, «Vèn shu kén ji m suúy ji ka e wír vìne?»

⁷Áwune bìnèr jii, «A fòn dìn koŋ e wír vìne lán, e shèʼér áwune e binèr ye juŋe, bo áwune kù yíi a neŋ a e fòn sar, e wìy dù mày.»

⁸Wù nèn ŋwày ntir ŋgày sé wìr, e dù, e beè a dzə̀ awàʼ və́ ve wùn áwune‑eè kúyí, a sì aŋgàa ntir və́.

⁹Wù dzə́r aáwune jii, «Vèn shu kén ji m biner e wír vìne ji ka? Á tóŋ ji m far á kibeʼèy ke tàr wor‑iì rə́ʼəy áwune shó.»

¹⁰Awàʼ vəə́ suúy ji á biner á e wír ve á toŋ a vìyi jii, «Wàn kiwo və wo terí waà fàŋ a, e shaà mentìntìn me tàr wov.

¹¹Tàr wov‑iì fò áwune á kibeʼèy, a kí gháʼ áwune, a fòn lo lèn, e dzə̀sì a dzə̀sìn. Tàr wov‑iì wívti áwune a dzə̀ áàŋkoó, fòn lo lèn, a dzə̀v áwune a dzə̀ á e ŋgwàn nyari.»

¹²Vishiíy ví shaà vitaár, Jeroboam wùn à wìr dzə̀m nèn wìy, e yèn Fòn Rehoboam mo wù‑uù suuyin ji á du, á waà wìy.

¹³Wù nèn ŋwày ntir ŋgày sé wìr, a taŋnín wíri taŋnín.

¹⁴Wù kù‑uù jùmrì ntir a dzə̀ ye awàʼ və́, e sùúy e wíri jii, «Tàr wor‑iì fó ven kibeʼèy, a kí gháʼ ven, a m kfə̀n lo, e dzə̀sì dzə̀sìn. Tàr wor‑iì wív ven áàŋkoó, a m lo, a dzə̀v ven a dzə̀ e ŋgwàn nyari.»

¹⁵Á bèy, la fòn yòʼ dzəə yuùrí kinyo ke wíri. Kinyo kìn ki‑iì kooy bèy, a ku yiì NYÙY TÀR ji kinyo ke wù‑uù yòŋèn e Jeroboam woo wan Nebat, e shaà fo *ŋgaà ntum və woo Ahija woó Shilo ki wàá gheén.

¹⁶Wír veé Isray adzə̀me yén ji fòn yoʼ biìmé a kinyo kév, e nèn sùúy e fòn jii: «Vèr kér ka e Davir mvə̀m kfəə? Vèr yòʼ kér kilíŋ e wàn Jessi mvəm. Éè wìr veé Isray, wír a e wun kibàn. Kfə́ə Daviri wáa leey rì fo rə́ə yee lav.» Á bèy, wír veé Isray veé mbìv yee kuyi nèn kfə̀nkír aáwuné melaʼ.

¹⁷Rehoboam nèn gòʼ, a saʼ a dzə̀ wír veé Isray ve vé‑eè dzə́ e ntèʼ seé Juda.

¹⁸Fòn Rehoboam lò, e tsə̀nsí Adoram wo yì‑iì dzəə̀n kitú ke lìm vitaavií ji wù du, e yèn á wír veé Isray veé mbìv yee kuy. Wù dù, áwune tsə́mrí wun e tíyí, e yùyrí. Fòn Rehoboam yú kee shooy, e nèn gìtì, e kòʼ kiténtén kfə́ ke səŋ nyám si, e lèʼ, e dù e Jerusalem.

¹⁹Á bèy, kfəə́ yeé Israyi ku nèn a sə kóy wùn à kfə́ə Daviri, e wìy shem lán.

²⁰Vinyo vìn vi koóy bey, wír veé Isray veé mbìv yee kuy adzə̀me lò, e yù ji Jeroboam kfə̀n á ne e bàm fó Ejiv, e nèn bàʼtí, e tsə̀nsí ntum fo wùn wó ji wù wàá wiy. Wù wìy, á nèn kòʼór wun ji fon woó Isray. Á bèy, nen kù jòʼsì rám Juda cáʼ ye yí‑iì yú sáʼ Davir.

²¹Fòn Rehoboam‑eè mèé é Jerusalem, e nèn bàʼtí wir dzə̀m woó ram Juda, à woó ram Benjamin, e shòʼtí vé rərí, wír nsə̀kì kishóv mwaamé e wiì (180,000) ji á du, e fùnèn a Isray woo mbìv yee kuy, é sáʼa kfə́n á e wun woo Rehoboam woo wan Solomon.

²²Yii bèy, Nyùy nèn sùŋnín e Shemayia woo *ŋgaà ntum və,

²³e tùm wun ji wù du, e yèn á Fòn Rehoboam woó Juda woo wan Solomon, à wìr dzə̀m woó ram Juda, à woó ram Benjamin, à kibér ke wíri kí.

²⁴Wù du, wù sùúy aáwune á ji NYÙY TÀR yoŋ a jii, «Lá áwune yòʼ kòʼ ji á funen á afə́r vév veé Isray. Wíri wáa kfən a e melaʼ, bìʼ fo yiì a wun, é bo kinyo ke kí kooyin kí wàá koóy.» Á bèy, áwune nèn yù jí NYÙY TÀR, e kfə̀nkír e melav mo NYÙY TÀR suuyin.

²⁵Fòn Jeroboam nèn nàŋsín mvəmlaʼ yee Shekem e wòŋ agwan woó nsay Efrayim, a dzə fo. Wù nèn lò, e dù bàʼrì sa mvəmlaʼ yee Penuel.

²⁶Jeroboam lò, a rə̀m jii, «Aá yiì shéʼ, bo vifon vi siì lo, e kfən e Davir kfəə.

²⁷A wír vìne fen kù gòʼ, a koʼ, a yiì cu si e NYÙY TǍR lav cù yeé Jerusalem, bo melív mev mè yíi lò, e bìnkìr e Fòn Rehoboam woó Juda wùn, aá binkir, e laàr a wun.»

²⁸Fòn Jeroboam nèn lò, e keèrí kwaʼtì, e fèr wón nàʼ abaà e *kisha ke mbàm ke baar kí, e nèn sùúy e wíri jii, «Vèn kòʼ ne e Jerusalem fèn e ŋàŋ. Wír veé Isray, vèn leéy, anyùy véné víne. Anyùy ve vé‑eè fəərin ven, e kòʼ shó fo Ejivi vìne.»

²⁹Wù nèn tìír wùmòʼ é Betel, e tìír wùmòʼ é Dan.

³⁰Kinyo kìn ki nèn yiì, wíri wáa jay e NYÙY TÀR, bìʼ fo wíri‑iì cu nyùy və̀n, cu bèn, du mee e Dan.

³¹Fòn Jeroboam nèn kfə̀n bòm virə́ʼ vé cù e vitu ve agwan, e shòʼtí vintaàkfəə ve wíri ji atàá cù, a bó wír vìne yòʼ‑oò dzə̀ veé ram Levi.

³²Wù kfən sìysì sa kishiíy ké və́ woo ŋkǎʼ Nyùy wo á wáa yi e kishiíy kee nshòv sitàn e ghvə̀m fo ŋwee woo waamé. Ŋkàʼ və́ne dzə̀ moo wo wú‑uù dzəə̀n é Juda bèy. Jeroboam ku nèn a cù anyùy vee wón nàʼ ve wù‑uù fèrìn, é kiy cù woó Betel. Wù kfən lèm sa atàá cù fo ve á wáa leéy virə́ʼ vé cù ve wù‑uù bomen é vitu ve agwan.

³³Mo Jeroboam sìysìn ŋkàʼ və́ bey, wìy lòo dzə kishiíy nshòv sitàn e ghvə̀m fo ŋwee woo waamé, a dzə̀ ŋwee wo wù‑uù shoʼon, wù nèn a yiì cu e kiy cù wo wù‑uù bomen é Betel ji wun neer á ŋkàʼ woo shoon ji wó wìr veé Isray. Wù nèn lò, e kòʼ é kiy cù, a yiì cu si.