Read Lamnso 1 Afòn 13 Bible Online

1 Afòn 13 - Lamnso bible

1 Afòn 13

¹*Ŋgaà ntum Nyùy wùmòʼ ku nèn bvə̀ysín fo, a yì‑iì tùm NYÙY TÀR wun fo Juda ji wù wiy á e Betel. Wù wáa meé fo, a Jeroboam tíy e ghaa kiy cù ji wun yii a cu.

²Wù nèn a fìʼtì ntum NYÙY TÀR, a beèmè kíy cù və̀y jii, «Ébéèy kiy cù, yìiy. NYÙY TÀR yoŋ jii, ‹Á wíy dzəə́ wán e Davir ram, e shù yír rə́ ji Josia, é wù li atàá cù, áwune ve á cu anyùy aàgwan virə́ʼ vidzə̀m, e seèrí a dzə̀ é kitu ke kiy cù fèn, aá wáa tòn vighvə́r vé wíri fó.› »

³Wù yòŋ bèy, e nèn a fo kisəəm é kishiíy fóo fèy, a suúy ji kisəəm ke NYÙY TÀR yòŋèn kí dzə̀ á jii, «Kíy cùu lo, e toʼnín e ntìntìn, é kibvə́ ke kí dzəə̀n shó ki táʼrí.»

⁴Fòn Jeroboam yú beemè ye ŋgaà ntum Nyùy beèmèn kíy cù, a wù kù tíy e ghaa kiy cù fèy, e nèn nàn kiwó, e roòmè ŋgaà ntum Nyùy sho, e yòŋ jii, «Vèn bám jwè və̀y.» Wù roòmè bèy, kóyi nèn tàvtí, là wù yòʼ dzəə yù fóo siìr e bàm.

⁵Kíy cùu nèn kù tòʼnín e ntìntìn, kibvə́ ki táʼrí fó fo, kù réŋréŋ mo ŋgaà ntum Nyùy kì yòŋèn ji NYÙY TÀR waà kì sùúy.

⁶Fòn nèn sùúy e ŋgaà ntum Nyùy jii, «Ku lòn NYÙY TÀR woo Nyùy wò, e fò e mò, é wù fíʼ yiì, é kóy wómé bónén.» Ŋgaà ntum Nyùy nèn kù lòn NYÙY TÀR, wù yiì, kóy fòne bónén, a dzə mo wú kì dzəə̀n fó mbìy.

⁷Fòn nèn sùúy e ŋgaà ntum Nyùy və̀y jii, «Wìy, é wòsò du é ntoʼ, áà yíkír, é m laámé wò fo kinyò ke à yiìn.»

⁸Ŋgaà ntum Nyùy suúy e fòn jii, «Aá lòo dzə, e fə̀m fò mo a dzə̀ kintoʼnìn ke keŋ rə́, la m yòʼ dù a e wun ntoʼ. Yòʼ dzə̀ m yì kifá fèn, a yòʼ dzə̀ m nò mendzə́v,

⁹bìʼ fo NYÙY TÀR kì shaʼnin ji lá m yòʼ yì á kifá, lá m yòʼ nò á mendzə́v fen. Wù kfə̀n kì shàʼnín sá ji m wáa yen a fó kfən a e bàm fó dzəə ye m kì wìyìn fó fo.»

¹⁰Ŋgaà ntum Nyùy və̀n nèn a kfən e bàm fó dzəə ye sən, e làa yòʼ dzə́ə kfən fo dzəə ye wù‑uù wìyìn shó e Betel.

¹¹*Ŋgaà ntum Nyùy wùmòʼ‑oò dzə̀ é Betel a wù dzə́n ne. Wáa dzə e kishiíy fóo fèy, wón və́ vee vilume wìy, e fèr e wun kinyo ke ŋgaà ntum Nyùy və̀y kì yiìn é Betel, e kfə̀n fèr kinyo kidzə̀m ke wù kì suuyin e fòn.

¹²Tàr wov dzə́r jii, «Wù kì lò a dù dzə́ə fó feé?» Wón vəə́ nèn dìn dzə́ə ye ŋgaà ntum Nyùy wo wù kì loòn fó Juda kì duùn fó fo.

¹³Wù nèn sùúy aáwune jii, «Vèn kúr ri kimbèʼbìy kém kí.» Á kúr, wù kóʼ,

¹⁴e nèn a jùmrì ŋgaà ntum Nyùy və̀y. Wù jùmrì, e dù yèn, a wù dzə́ e sar kici kee *terebint. Wù nèn dzə̀r shó jii, «Dzə̀ wò ŋgaà ntum Nyùy wo wù wìyìn fó Juda à?» Wù bínsí jii, «Dzə̀ mo.»

¹⁵Wù suúy shó jii, «Wìy ri, é wòsò du e mǒ lav, áà yíkír.»

¹⁶Ŋgaà ntum Nyùy suúy shó jii, «Yòʼ dzə̀ m kfə̀n é bàm wòsò. Yòʼ dzə̀ m yìkír, a yòʼ dzə̀ m nò mendzə́v fen,

¹⁷bìʼ fo NYÙY TÀR kì suuyin e mò ji lá m yòʼ yì á kifá, lá m yòʼ nò á mendzə́v fen, lá m yòʼ kfə̀n á e bàm fó dzəə ye m kì wìyìn fó fo.»

¹⁸Wù nèn sùúy e ŋgaà ntum Nyùy jii, «Mómò kitú kém, m dzə̀ sá ŋgaà ntum Nyùy moo wò. NYÙY TÀR kì tsə̀nsí nshìylav rə fo mǒ wùn, yì suúy e mò jii, ‹M li á wò, é wòsò kfə́n á e bàm e mǒ lav, áà yíkír, e nò mendzə́v.› » A ŋgaà ntum Nyùy və̀y suuy bèy, a wù bóʼti wun bóʼtín.

¹⁹Wùn wun nèn kfə̀n é bàm e wun lav, wù yíkír, e nò mendzə́v.

²⁰Mo áwune kì dzə̀ʼə̀mèn, a yikír, NYÙY TÀR nèn lò, e sùŋnín e kindzə̀n ke ŋgaà ntum və ke kí kì liìn və̀y, e wìy sho e wun lav ki,

²¹kí waámé, e sùúy e ŋgaà ntum Nyùy wo wù kì wìyìn fó Juda və̀y jii, «Mo à tenen fóo yunín NYÙY TÀR, e làa yòʼ jùmrì nsər rə,

²²á bèy, à kfə́n é bàm, e yìkír, e kfə̀n nò mendzə́v é kirə̀ʼ ke wù kì bìnsìn, bo á yíi yuyrí wò, e làa yòʼ dzəə̀mè wò aàtàr vée ghaŋ.»

²³Wùn wun yíkír, e nò, e màysì, wù kúr kimbèʼbìy ké ŋgaà ntum Nyùy wo wù‑uù siìrìn é bàm və̀y,

²⁴wù nèn kòʼ, a dù, e lòo dù, wùn bvərə̀ʼ tárnín é dzəə, wù yúyrí wun, e màʼ e dzəə. Bvərə̀ʼ wùn kimbèʼbìy kí nèn kù gòʼ, a tiy e wun ghaa dzən.

²⁵Vilum ámóʼó lòo shaà, e yèn dzə́n rə́, a yí néŋ e dzəə, a bvərə̀ʼ wùn kimbèʼbìy kí tíy fo ghaŋ, á nèn dù, e fìʼtì e Betel.

²⁶Ŋgaà ntum Nyùy wo wù kì siìrìn é bàm və̀y yú kinyo kìn, e nèn sùúy ji dzə̀ ŋgaà ntum Nyùy wo bó wù yoʼ lò yùnín nsər Nyùy. Nyùy Tàr tsə̀nsí ne bvərə̀ʼ, wù koó wun, e yùyrí. Kí ku kòóy wun réŋréŋ mo Nyùy Tàr kì suuyin e wun.

²⁷Wù nèn sùúy e wón və́ vee vilume jii, «Vèn kúr kimbèʼbìy kí, e fò e mò.» Á nèn kùr,

²⁸wù kóʼ, e dù yèn dzə́n rəy, a yí néŋ e ghaa dzəə, a bvərə̀ʼ wùn kimbèʼbìy kí tíy fo ghaŋ, a bvərə̀ʼ yoʼ kfə̀r dzə́n, a wù yoʼ kfə̀r kimbèʼbìy.

²⁹Ŋgaà ntum Nyùy və̀y nèn lì dzə́n, e neèr e wun kimbèʼbìy, a wìy sho e mvə̀mlaʼ ji wun wàá dzəəme, e dìy a kpú rə́.

³⁰Wù wìy sho, e nèn dzəə̀mè e wun sày, á wáa dìy kpú, a toŋ. Diy bèy, a wù táŋ jii, «Éè fər wom, éè fər wom.»

³¹Wù dìy, e màysì, e sùúy e wón və́ vee vilume jii, «M wíy kpú, vèn dzəə̀mè mo é sày ye á dzəə̀mèn ŋgaà ntum Nyùy sho rə̀n, é dzə́n yémé wáa neŋ e rəə́ ghaŋ.

³²Ké ru kí, kàʼ wo NYÙY TÀR‑iì tumen wun, wù dù, e lòo beèmè kíy cù woó Betel wùn à virə́ʼ vé cù veé ntèʼ seé Samaria vi, a tin, wù kù kér fó wìy gheén.»

³³Vinyo vìn vidzə̀m vi koóy ben, la Fòn Jeroboam yòʼ fèn màʼtì liì və kisaŋ. Wù kú a lèm atàá cù ve á wáa leéy virə́ʼ vé cù, a wù shóʼti fo kfəə sidzə̀m. Wìr lóo dzə wo wù koŋ a dzə taà cù, Jeroboam kù nèn lì ji taà cù woó kirə̀ʼ ké cù.

³⁴Kinyo kìn ki nén a dzə kinyo ke bi kí e Fòn Jeroboam kfəə, ke kí‑iì màʼàn kfə́ə rə́, e laàr fo kitu ke nsay.