Read Lamnso 1 Afòn 17 Bible Online

1 Afòn 17 - Lamnso bible

1 Afòn 17

¹*Ŋgaà ntum Nyùy woo Elija nèn lò wìy, e yèn Fòn Ahav. Elija‑aà dzə̀ wír woó Tishbe, a dzə̀ ntèʼ é Gilead. Wù suúy e Fòn Ahav jii, «Mo NYÙY TÀR woo Nyùy wìr veé Isray dzəə̀n shó, wun woo Nyùy wo m lo ntum sə́, bó wuú kìn ŋweʼe yòʼ wíy tum e nsay, a bó m suúy.»

²NYÙY TÀR yiì lò, e sùúy e Elija woo ŋgaà ntum və jii,

³«Lò fo à dzəə̀n, e dù, e làáy e ghaa wàn ndzə̀v woo Kerit wo wù dzəə̀n é mbìv Jordan yee fo shùy yii tó.

⁴À yíi a no mendzə́v fó wàn ndzə̀v fey. M yòŋ ne e viŋaʼ vi ji ví yíi a yiír a wò fo.»

⁵Elija ku nèn yiì mo NYÙY TÀR kì yòŋèn, e dù, a dzə e ghaa wàn ndzə̀v woo Kerit wo wù dzəə̀n é mbìv Jordan yee fo shùy yii tó.

⁶Wù nèn a no mendzə́v fó wàn ndzə̀v fey, a viŋaʼ vi wiy e kibán ki wùn à nyàm vijàvndzə vidzə̀m, wiy sho aŋkuùr adzə̀m.

⁷Shintàm shi lòo dàr, wàn ndzə̀v və̀y yúm, bìʼ fo wuú yòʼ‑oò dzəə lò shèm é nsay.

⁸NYÙY TÀR nèn sùúy e Elija jii,

⁹«Ŋáʼáy, e dù e Tsarefat e Sidon, a dzə fo. M yòŋ ne e wiíy ŋkfə wùmòʼ wo wù dzəə̀n fó ji wù wáa leéy a fo wò.»

¹⁰Á bèy, wù nèn ŋàʼáy, a dù e Tsarefat. Wù meé é shùu kày yeé ŋkàlaʼ, e yèn wiíy ŋkfə və̀y, a wù táyri meŋkaʼ. Wù suúy shó jii, «Wáy mendzə́v mè e kifa, e wìy sho, é m nó.»

¹¹Wiiy ŋkfə və̀y lòo dù ji wun du, e wìy e mendzə́v mè, Elija jáŋ, e sùúy sho jii, «Á wìy sa e kibán ki.»

¹²Wù bìnèr jii, «Mo NYÙY TÀR woo Nyùy wò dzəə̀n shó, m yoʼ fèr kifá gheéy. Kù jòʼsì sí shiŋkfə̀ŋ ye yí dzəə̀n é mbìʼ wùn à shiŋgvə́r she shí dzəə̀n é kiŋgà shí. M táyri meŋkaʼ bèn ji m du, e fèr a kifá ke yi sho, é vèr wàn wom yí, e bó a kpu.»

¹³Elija suúy shó jii, «Lá à yòʼ a fàn, dùu, e yiì mo à yòŋèn. Yii bèy, tòmbìy tòvtí shibanèn shi, e wìy sho, e fò e mò, bó a tàʼ ké vèn wan wò.

¹⁴NYÙY TÀR woo Nyùy wìr veé Isray yòŋ jii, ‹Bó meŋkfəŋ mè yòʼ wíy mày fo mbìʼ, a bó meŋgvə́r mè yòʼ wíy mày fo kiŋgà, e wìy dù meé mo mómò woo NYÙY TÀR wíy yiì, é wuú ló.› »

¹⁵Wiíy ŋkfə və̀y nèn dù, e yiì mo Elija kì suuyin e wun. Á bèy, viyíkìr vi nèn a dzə vishiíy vidzə̀m ve wiíy və̀y wùn à kfə́ə rəə́, à Elija wáa yi.

¹⁶A bó meŋkfəŋ mè yòʼ‑oò lo ghàn sìíy bùŋ fó mbìʼ, a bó meŋgvə́r mè yòʼ‑oò lo ghàn sìíy bùŋ fó kiŋgà.

¹⁷Ghán sí lòo koʼtí, wàn wiíy ŋkfə və̀y nèn gbù yàsí. Yàsí nèn lò, e tàvkír tavkín, kiyoy ke wan kí nèn mày.

¹⁸Wù nèn sùúy e Elija jii, «Wìr Nyùy, à yiì kin e mò ben bìʼ ka? Wò‑oo wiy fen ji à kuúmé vinyo vém ve bi ví e Nyùy, e kfə̀n yiì, é wan wom kpú a?»

¹⁹Elija suúy ji wù fó á wán e wun. Wù wìy sho, Elija sə́ fó koy wo, e kòʼ shó e lav yee fó yuv fo wù‑uù shiiyì, e neèr e wun kikun,

²⁰e nèn a toŋ kitávín e NYÙY TÀR jii, «Éè NYÙY TÀR woo Nyùy wom, à màʼ ŋgeʼ ye tavín e wiiy ŋkfə və̀n bèn bìʼ ka? Wù‑uu leey fo mò kijuŋ, à yií, wan və kpú à?»

²¹Elija nèn nàsì wún e wǎn kitu akàŋ ataár, e bùnrì NYÙY TÀR jii, «Éè NYÙY TÀR woo Nyùy wom, ku siìr kiyoy ke wan və̀n ki é bàm.»

²²NYÙY TÀR nèn yù bunrì Elija, e yiì kiyoy ke wan kí kfə́n é bàm, wù kóʼór.

²³Elija nèn lì wán fó lav yee fó yuv, e sə̀y shó, e nə̀ə́ sho e lav, e fò e yè wov, e sùúy sho jii, «Wan wò və̀ne, leéy, wù sì e tin.»

²⁴Wiíy və̀y suúy e Elija jii, «M kìíy ne lèn ji à dzə̀ wir Nyùy, a jì ye yì fəə́ fo wò shuù dzə̀ rú jí Nyùy.»