Read Lamnso 1 Afòn 18 Bible Online

1 Afòn 18 - Lamnso bible

1 Afòn 18

¹Ntàm lòo dàr, a sì ji viyá vitaár mo wuú‑uù tavin é yuv, NYÙY TÀR suúy e Elija jii, «Dù, e dìn kitú ké ki e Ahav, é m nèn tsə̀nsí wuú.»

²Elija nèn lò, a dù ji wun din kitú kfə́ e Fòn Ahav. Wáa dzə e ghan sin, a jìŋ gháʼtí ne e Samaria.

³Ahav nèn lò, e tòóy Obadia wo wù‑uù leey ntoʼ. Obadia və̀n‑eè dzə̀ wír, a wù ghvə́m NYÙY TÀR é ŋàŋ.

⁴Yì‑iì dzə̀ é ghan se Jesebel‑iì yúyri aŋgàa ntum Nyùy, Obadia lì vee wií, e lìtì e mbvə̀ʼ sibaà, mtàn mtàn, a fo áwune viyíkìr wùn à mendzə́v mè.

⁵Ahav toóy Obadia bèy, e sùúy sho jii, «Dù, e ghàn fo ntòŋ sé ndzəv sí dzə̀kìn, e ghàn fo viwoóy ví dzə̀kìn, e yèn ó ji vèsən sà‑áà koóy kifá ke dzə̀ nyám se ŋkoʼ si yì, é vimbèʼbìy vé nyàmŋkoʼ vi yí sá, e làa yòʼ dzə́ə kpukír a, é nàʼ yí sá, é la vèsən yòʼ dzəə seèrí.»

⁶Áwune nèn jàv virə́ʼ mo wìr yíi a ghan. Ahav nèn a dù e wun mbìv wùn mòʼón, Obadia wáa dù e rə́ə.

⁷Obadia lòo dù, Elija sàsìn, e bvə̀y e wun si. Obadia kiíy wun, e nèn tsə̀m ndzəə́, e làʼ kitú fo nsay, e dzə̀r jii, «Dzə̀ wò Elija woo taàtá wom a?»

⁸Elija biímé ji dzə̀ mo, e nèn sùúy jii, «Dù, e fìʼtì e taàta wò woo fon ji Elija sì á fèn.»

⁹Obadia dzə́r e Elija jii, «M jày ka, é bo à wáa fo mo woo kwàn wó e Ahav ji wù yúyrí.

¹⁰Ké ru kí, mo NYÙY TÀR woo Nyùy wò dzəə̀n shó, kitúm ki yòʼ dzə̀ shó ke taàtá wom woo fon yóʼ ne tsə̀nsí wír fo ji wù taʼ á wò. Wìr du, á yòŋ ji à yòʼ dzə̀ á fo. Fòn nèn yiì, wír vee fóo lìʼ ji á yoʼ yèn á wò.

¹¹À kfə́n a yòŋ lèn ji m du, e yèn fon, e sùúy sho ji Elija dzə̀ fen à?

¹²M yòʼ kì fo dzə̀ Kiyoy ke NYÙY TÀR kí lì wò, e dù sho, a bó m yòʼ dzə̀ə́ wòsò. A m lòo dzə, e dù, e sùúy e Fòn Ahav, wù taʼ wò ntéŋ, bo wù yùyrí ne mo woo kwàn wó. M dzə̀ ben, a mò‑oò kèʼ ne, a ghvəm Nyùy, e kèʼ fo meterí.

¹³Bó taàtá wom yòʼ sà‑aà lo yù kinyo ke mò‑oò yiìn é ghan se Jesebel‑iì yúyri aŋgàa ntum NYÙY TÀR á? Mò‑oò lìtì á áwune wií é mbvə̀ʼ sibaà, mtàn mtàn, a fo a viyíkìr wùn à mendzə́v mè aáwune.

¹⁴Aà yoŋ lèn ji m du, e yèn taàtá wom woo fon, e sùúy sho ji Elija dzə̀ fen, é wù yúyrí mo a?»

¹⁵Elija nèn sùúy jii, «Mo NYÙY TÀR woo Taà Mànjòŋ dzəə̀n shó, wo m tíy e wun si, m yíi dìn kitú kém lán e Fòn.»

¹⁶Á bèy, Obadia nèn dù, e yèn Fòn Ahav, e sùúy sho. Wù nèn a wìy ji wun yén á Elija.

¹⁷Fòn Ahav yén Elija, e dzə̀r e wun jii, «Və̀y dzə̀ wò à, wò wo à fó Isray ŋgeʼ a?»

¹⁸Elija bìnèr jii, «Yòʼ fó mo Isray ŋgeʼ. Kù fó vèn à lav tàr won Isray ŋgeʼ. Vèn màʼày ne nsər se NYÙY TÀR, a ghvəm a dzə̀ nyùy woo *Baal.

¹⁹Lèn və̀n, kí nén a dzə jii, ‹Fòn toóy á wír veé Isray, aá báʼtí adzə̀m e mǒ si e Gwan Karmel. Fòn toóy á sa aŋgàa ntum Baal vee kishóv mtàn e ghiì kweè, e tòóy sa vé nyùy woo *Ashera vee ghii kweè ve Yaà Jesebel yiirì, aá báʼtí fó.› »

²⁰Fòn Ahav nèn tòóy wír veé Isray adzə̀m, e kfə̀n bàʼtí aŋgàa ntum Baal e Gwan Karmel.

²¹Elija nèn kòʼtí e wírí mentsə̀m, e dzə̀r jii, «Vèn wíy tùʼtìn e kwaʼtìi e baà ben, e dù meé e le? A NYÙY TÀR dzə̀ Nyùy, vèn wàa jùmrì wun, wáa dzə a dzə̀ Baal, vèn wàa jùmrì rì Baal.» Wíri ku gòʼ gòʼòn kisə́sə.

²²Elija nèn sùúy e wíri jii, «Kù jòʼsì ne mo wo m berin fo aŋgàa ntum NYÙY TÀRí, aàŋgàa ntum nyùy woo Baali dzə̀ kév kishóv mtàn e ghiì kweè.

²³Vèn fó vèr áwune anàʼ vee vilum abaà. Áwune lo, e lì wo mòʼón, e gwàtì e vibàr vibàr, e nètì e kitu ke meŋkàʼ, e làa yòʼ way və́y shó, é m li sá wo mòʼón, e nàŋsín sa bèy, e làa yòʼ way sa və́y shó.

²⁴Áwune lo, a bùnrì nyùy wov, é m wáa bùnrì NYÙY TÀR. Nyùy wo wù lo, e yu bunrì, e tsənsí və́y, bo woo shó dzə̀ Nyùy woo Nyùy.» Wìr dzə̀m bínsí ji wù sùúy a rú.

²⁵Elija nèn sùúy aàŋgàa ntum Baali jii, «Mo vèn dzəə̀n wír anín, vèn li wóon woo nàʼ, e tòmbìy bàʼtí, e nèn a bùnrì nyùy won, yii bèy, lá wìr yòʼ wày və́y shó.»

²⁶Áwune lì nàʼ wo vé‑eè foon aáwune, e nèn bàʼtí, a bùnrì nyùy woo Baal, e kèʼ fo kijàvndzə, e dù mèé e ntìntìn shùy. Aá bunrì bèy, tóŋ jii, «Éè Baal, ku yù bunrì yérí.» Yii bèy, bó á yòʼ yú kighiísí, bó á yòʼ yú binèr. Áwune nèn a liy, a kaarí kíy cù wo áwune‑eè bomen.

²⁷Shùy meé é ntìntìn, Elija wáa te lám aáwune jii, «Vèn bunri kitávín. Baal dzə̀ nyùy. Yii wáa dzə a wù rəm vinyo, kìn wù bàr a dzə̀ wún, kìn wù dù ghán, kìn sùm mbuùné wun, bo dzə̀ á kù yìm wun.»

²⁸Áwune ku nèn a waamé kitávín, a seerí wún wóv e nyùy sí wùn à e kòŋ sí, e dù meé mo mensə́ mè‑eè fəə́ fo áwuné wùn, a dzə̀ mo liì wov cù dzəə̀n.

²⁹Ntìntìn shùy shaà, aáwune kù waáme, tóŋ, káykirì, e dù mèé mo shùy‑iì teemen, a yì‑iì sí méʼ ghán se á yii yii cu yee ŋkuùr. Yii bèy, bó á yoʼ yù kighiísí, bó á yoʼ yù binèr, bó á yoʼ yù kikum ke kifa.

³⁰Elija nèn sùúy e wìr dzə̀m jii, «Vèn kóʼtí, e wìy e mǒ mentsə̀m.» Wìr dzə̀m nèn kòʼtí, e wìy. Wù nèn a naŋsín kíy cù NYÙY TÀR wo wú‑uù kèrkìn ne.

³¹Wù lì tíy nshòv sibaà e ghvə̀m mo rám seé Isray see wón Jakov si dzə̀kìn, Jakov wo NYÙY TÀR‑iì yòŋèn ji á wíy a yòŋ a wun ji Isray.

³²Wù lì bèy, e nèn nàŋsín kíy cù NYÙY TÀR shó, e tùŋ bií, e kaàrí sho, wo dzə̀ wú lì mendzə́v alita nshòv sitàn e ghvə̀m.

³³Wù síysí meŋkaʼ, e neèr, e nèn tòʼtí nàʼ e vibàr vibàr, e nètì e kitu ke meŋkaʼ. Wù nèn yòŋ ji á kúnsí á mendzə́v é mbìʼ e kweè, e cuùrì a e kitu ke cù ye tonèné, e cuùrì e meŋkàʼ.

³⁴Á nèn cuùrì, wù kfən yòŋ ji á cuuri á memoʼ mee mendzə́v bey fo akàŋ vee abaà. Á cuùrì. Wù kfən yòŋ ji á sii cuùrì a fo akàŋ vee ataár. Á cuúrí.

³⁵Mendzə́v mè nèn ghànén kíy cù e dzə̀m, e kfə̀n rùn é bii wo á kì tuŋen.

³⁶Ghán sé cù yee ŋkuùr si gheén, Elija woo *ŋgaà ntum Nyùy kóʼtí é mentsə̀m me kiy, e bùnrì jii, «Éè NYÙY TÀR, Nyùy Abraham wùn à Aysi, à Jakov, ku yiì, é kí wáa dzə kikiíyín lán e Isray ji à dzə̀ á Nyùy, a m dzə̀ á ŋgaà lìm wò, a m yii vinyo vìn vidzə̀m a dzə̀ e wò jì.

³⁷Éè NYÙY TÀR, yú bunrì yémé, ku yù bunrì yémé, é wír vìn adzə̀me nèn kìíy ji wò woo NYÙY TÀR, à dzə̀ á Nyùy, aà sí siir a áwune e wò wùn.»

³⁸Və́y NYÙY TÀRí nèn sə̀y fó yuv, meŋkaʼ mè shwí wùn à nyàm cù, à tíy sí, à nsay, mendzə́v medzə̀m me mè‑eè dzəə̀n é bii mè yúm.

³⁹Wìr dzə̀m yén kinyo kìn, e gbù fo nsay e medà, a rəəmé jii, «NYÙY TÀR dzə̀ Nyùy, NYÙY TÀR dzə̀ Nyùy.»

⁴⁰Elija suúy e wíri jii, «Vèn koórí aŋgàa ntum Baali. Lá vèn yòʼ biìmé é wo mòʼón léʼ.» Á koórí, Elija sə́y shó e Kiwoóy ké Kishon, e yùyrí áwune fó.

⁴¹Elija nèn sùúy e Fòn Ahav ji wù du, e yìkír, e nò á kifá. Wun yú, a wuú waà kiívi, wiyì.

⁴²Fòn Ahav dù ji wun waà sí yíkir, e kfə̀n no a kifá, Elija kóʼ é kitu ke Gwan Karmel, e tsə̀m ndzəə́, e wày kitú kfə́ e wun nsàn vibìy.

⁴³Wù lò, e sùúy e ŋgaà lìm və jii, «Dù lèn, e màʼ sí yée fo rìbà ndzə̀v dzəə̀n.» Wù nèn kòʼ, e lèéy, e wìy sùúy jii, «M yoʼ yèn kifá fo.» Elija suúy ji wù wàá kfən dù, e lèéy. Kí ku kòóy bèy, e dù mèé kàŋ saàmbà.

⁴⁴Wù dù fo kàŋ woo ji saàmbà, e wìy sùúy jii, «Mbàʼ yìmòʼ kóʼ fo rìbà ndzə̀v, a yì yénsin shishàr moo kiwó ke wìr bèy.» Elija nèn sùúy e wun ji wù du, e sùúy a e Fòn Ahav ji wù báʼtí á kiténtén kfə́ ke səŋ nyám si, e nèn a səy, bo wuú lo, e koóy a wun.

⁴⁵Shintàm shi lòo dàr, yúví nèn sə̀n, shwéri wáa shaà, kiŋkò ke wuu kí wáa wìy. Fòn Ahav kóʼ kár rə́, a dù e Jesreel.

⁴⁶NYÙY TÀR wáa dzə wun Elija, a fo wun vitaáví, wù nèn wòvtí ndzə̀y sə́, a leʼ fo mbìy, e tòmbìy mèé e Jesreel, é bo Ahav siíy, a wìy.