Read Lamnso 1 Afòn 19 Bible Online

1 Afòn 19 - Lamnso bible

1 Afòn 19

¹Fòn Ahav dù, e yòŋ e wiíy ntoʼ woo Jesebel kinyo kidzə̀m ke Elija kì yiìn, à yúyrí ye wù kì yuyrin aŋgàa ntum Baali adzə̀m.

²Jesebel nèn tùm wír fo Elija wùn, wù dú, e tiìsí ji Yaà suuy a ji a lòo dzə moo lèn bèn kibvəə́shí, a bó wun yoʼ lòvtí e wun mo wù kì lovtin áàŋgàa ntum və́ víyi, anyùyi kù màʼ ŋgeʼ a e wun kitu, e kfə̀n dzə̀sì.

³Elija yú, a fàn, e nèn tùmnín, a leʼ e kitú kfə́ kí. Wù léʼ, e dù mèé e Beersheba, e nsay Juda, e lèm ŋgaà lìm və fó,

⁴e nèn kfə̀n ghàn kishiíy kifur, e dù mèé e woʼ. Wù meé bey, e sèsín e sar kici keé njà dzəʼə̀y woó kwaʼ, a dzə fo, a lon ji bòŋ á ke wun kpú. Wù wáa bùnrì, a suúy jii, «Éè NYÙY TÀR, kí sì é ŋàŋ. Lì ri mo lèn. Bó m yoʼ bòŋ, e shaà atǎr atàr vér.»

⁵Wù nèn neèm e sar kici, a buuné. Nshìylav NYÙY TÀR ku nèn wìy fo, e kùm wun, e sùúy e wun jii, «Lò é yuv, e yìkír.»

⁶Wù lòo leéy, e nèn yèn kibán wùn à kitém ke mendzə̀v kí e wun ghaa kitu. Wù yíkír, e nò, e nèn kfə̀n neèm.

⁷Nshìylav Nyùy kfən wìy fo wun fo akàŋ vee abaà, e kùm wun, e sùúy jii, «Lò é yuv, e yìkír, bìʼ fo ghán yée dzəə́ bér e kuʼùn.»

⁸Wù nèn lò e yuv, e yìkír, e nò. Viyíkìr vìn vi fó wun vitaáví, wù ghán kishiíy mkweè wùn à vitsə́ʼ ví mkweè, e nèn mèé e Sinay wo dzəə̀n Gwan Nyùy.

⁹Elija‑aà mèé fó, e nə̀ə́, e shìíy e mbvə̀ʼ yìmòʼ. NYÙY TÀR ku nèn sùŋnín e wun, e dzə̀r jii, «Elija, à yii ka fen?»

¹⁰Wù bìnèr jii, «NYÙY TÀR, Nyùy woo Taà Mànjòŋ, mò‑oò rə́si ghán ntum a dzə̀ ye. Yii bèy, wír veé Israyi gbù ne *mensaŋ mè, e kètì kíy sé se cù, e yùyrí aŋgàa ntum vé. Bèr ne mo vèr mòʼón, aá kfə̀n sí taʼ sa ji á yúyrí á mo.»

¹¹NYÙY TÀR suúy shó jii, «Dù, e tìím e mǒ kitu ke gwan e mǒ si.» Wù dù, e tìím, NYÙY TÀR nèn a shaà. Kinsəm ke taatavín kí wáa shaà, a kètì agwan, a waʼtí vilán e wun woo NYÙY TǍR mbìy. Yii bèy, la Elija yòʼ yèn NYÙY TÀR é mvəm wó. Kinsəm ki mày, nsay sə́ʼsí, wù leéy, e làa yòʼ yen NYÙY TÀR.

¹²Nsay sə́ʼsí, e yàr, və́yí wáa shwi. Yii bèy, la wù yòʼ yèn NYÙY TÀR é və̀y. Və́yí mày, wù yú shijí shitérí.

¹³Wù yú bey, e nèn sə̀tí sí rə́ e ndzə̀y sə́ sí, e nèn dù, e tìím e shùu mbvə̀ʼ. Jì wìr súŋnín, e dzə̀r e wun jii, «Elija, à yii ka fen?»

¹⁴Elija bìnèr jii, «NYÙY TÀR, Nyùy woo Taà Mànjòŋ, mò‑oò rə́si ghán ntum a dzə̀ ye. Yii bèy, wír veé Israyi gbù ne mensaŋ mè, e kètì kíy sé se cù, e yùyrí aŋgàa ntum vé. Bèr ne mo vèr mòʼón, aá kfə̀n sí taʼ sa ji á yúyrí á mo.»

¹⁵NYÙY TÀR suúy e wun jii, «Lì dzə́ə yè, a kfən fo woʼ yeé Damaskus. À mee fo, à yòʼ Hasael ji fon woó Siiria,

¹⁶e yòʼ Jehu woo wan Nimshi ji fon woó Isray, e kfə̀n yòʼ Elisha woo wan Shafat woó Abel‑Mehola, é wù li kirə́ʼ ké ji *ŋgaà ntum wom.

¹⁷A wìr yiì bàʼàr nyùy rə̀r Hasael, bo ye Jehu kù neer wun. Wìr kfən bàʼàr ye Jehu, bo ye Elisha kù‑úù neer ŋgaàŋ.

¹⁸Yii bèy, m yíi bavtí wír nsə̀kì saàmbà e Isray, a dzə̀ wír ve á yòʼ‑oò yiì ne tsə̀m ndzəə́ e nyùy woo *Baal, aá yòʼ‑oò yiì ne baàmé shibvə̀m sə́.»

¹⁹Elija nèn lò fo fo, e dù yèn Elisha woo wan Shafat, a wù lim súm e nyám si. Nyám si‑iì dzə̀ viŋkàŋ nshòv sibaà e ghvə̀m, aá táŋsín sibaà sibaà, a wù lim e seé kiŋkàŋ ké bàm kí. Elija nèn shòʼ kikúm kfə́ e dù, e màʼ e Elisha wùn.

²⁰Elisha nèn kù màʼtì nyám si, a jùmrì Elija e kileʼ ki, jumrì bèy, suuy jii, «Mo‑óò du, e shàʼtì tàr wor wùn yè wor ji á bèr á ne, é bo wòsò wáa dù.» Elija suúy shó jii, «Dù ri. Kí à kì kinyo ke m yiìn e wò?»

²¹Elisha nèn kfə̀n é bàm, e lì nyám se wù‑uù tàŋsìn siy, e seèrí, e lì vimbùŋ vév, e tòn, e nàá nyám sho, e fò, wíri yí. Wù nèn lò e Elija bàm, e dù, a lìm lim ji wánlè və.