Read Lamnso 1 Afòn 21 Bible Online

1 Afòn 21 - Lamnso bible

1 Afòn 21

¹Ghán sí lòo dù, kinyo ki nèn ŋàʼáy kùm súm vitiír vé *vayin wó Nabot woó Jesreel, a súm və́ne dzə̀ e Fòn Ahav ghaa ntoʼ e Samaria.

²Ahav‑iì sùúy e Nabot jii, «Ku màʼtì súm və́ne e mò, mo wú dzəə̀n e mǒ ghaa ntoʼ bèn, é m siir ji kiboó ké a lìm nyóo shó. Aà biìmé, é m kúvsín, e fò wò súm wo juŋe. À wáa kòŋ a dzə̀ mbàm, é m laʼ wò e káv wo à koŋèe.»

³Nabot bìnèr jii, «Dzə̀ vitsə́ʼ vé atàr vém, NYÙY TÀR wáa teér fo m fó súm vən e fòn.»

⁴Á bèy, Fòn Ahav nèn a kfən e ntoʼ e nsòv, a wù yú bír, bìʼ fo Nabot‑iì bìnèrìn ji bó yòʼ dzə̀ wun fò á vitsə́ʼ vé atàr və́ e wun. Wù dù, e nèn neèm kimbìnàndzə̀m, e tèn fóo yikír.

⁵Wiiy və Jesebel nəə́, e dzə̀r e wun jii, «Vifií və́ ví sà bvəə̀rí bèn, a dzə̀ ka á? Á sà tèn fóo yikír bìʼ ka á?»

⁶Fòn bìnèr e wun jii, «Kí dzə̀ ben, bìʼ fo m kì suuyin e Nabot woó Jesreel ji wù sà‑áà fiine súm və́ vitiír vé vayin e mò mo wù koŋ é m kúvsín, e fò wo səné e wun a, wù tén.»

⁷Jesebel dzə́r e fòn jii, «Á sàá mo á yíi saʼ kfə́ vifon veé Isray a? Á lo á e yuv, e yìkír. Á ku bvə̀tì a vishí və́. Wun yíi yiì, aá koóy á súm Nabot woó Jesreel və̀y.»

⁸Jesebel nèn sàŋ aŋwàʼ e Fòn Ahav yir, e wày kifin keé ntoʼ sho, e tsə̀nsí e ŋgày sé wìr wùn à kfə́m sé wìr se wùn à Nabot‑iì dzə́ e mvə̀mlaʼ si.

⁹Wù‑uù sàŋ é mvə̀m aŋwàʼ fèn jii, «Vèn jaŋ kishiíy kée lèm jíŋ ki, e lì Nabot, e dzə̀ʼə̀r e wìr wo kuʼǔn ntaʼ.

¹⁰Wù dzəʼə̀mè, vèn tàʼ vé kiŋari abaà, e yòŋ, aá dzəʼəm e wun ŋkìʼnìn, a gòv wun ji wù kuù a Nyùy, e kfə̀n kuù a fon. Á gov bèy, é vèn nèn lì, e fə̀ə́r e ndzə, e tsə̀mrí e tíyí, e yùyrí.»

¹¹Ŋgày sé wìr wùn à kfə́m sé wìr seé Jesreel si kù nèn yiì réŋréŋ mo Jesebel ki yòŋèn aáwune e wun mvə̀m aŋwàʼ ve wù kì tsənsin.

¹²Áwune jàŋ kishiíy, e lèm jíŋ, e dzə̀ʼə̀r Nabot e wìr wo kuʼǔn ntaʼ, aáwuné mvəm.

¹³Vé kiŋari nèn wìy abaà, e dzə̀ʼə̀m e wun ŋkìʼnìn, a gòvtì wun e wírí si, a suuy jii, «Nabot‑iì kuù ne Nyùy, e kfə̀n kuù fon.» Á bèy, á nèn tùʼ wun, e fəə̀ ŋkàlaʼ sho, e tsə̀mrí, e yùyrí.

¹⁴Á yúyrí, e nèn tsə̀nsí ntum e Jesebel ji á tsə̀mrí a ne Nabot, e yùyrí.

¹⁵Jesebel yú ji á tsə̀mrí a ne Nabot, e yùyrí, e nèn sùúy e Fòn Ahav jii, «Fòn wàá du, e yòv a súm Nabot woó Jesreel wo wù‑uù tenen fóo fiìnè e wun və̀y. Wù sìíy a ne, e kpù.»

¹⁶Fòn Ahav yú ji Nabot kpù á ne, e nèn ŋàʼáy, a səy e Nabot sum ji wun yov a ji və́.

¹⁷NYÙY TÀR nèn sùúy e Elija woó Tishbe jii,

¹⁸«Ŋáʼáy, e sə̀y, e yèn Fòn Ahav woó Isray wo wù dzə́ e Samaria. Wù dzə̀ lèn e Nabot sum ji wun yov á ji və́.

¹⁹À du, à sùúy shó jii, ‹NYÙY TÀR dzə́r a ji wù sà yùyrí ne Nabot, e yòv súm və́ á? NYÙY TÀR nén a suúy e wun a jii, kirə́ʼ kee fo jwí si‑iì laan mensə́ me Nabot, kù dzə̀ sáa fo sí wíy la mvə́ə.› »

²⁰Fòn Ahav yiì tàrnín wùn Elija, e dzə̀r shó jii, «Ŋgaà wom vibàn, wòsò kfə̀n tàrnín à?» Elija biímé, e sùúy jii, «M wíy yen fon bèn a bìʼ vinyo ve wù yii, a ví bír NYÙY TÀR, nèn fiinè a kitú kfə́.

²¹A NYÙY TÀR suuy a ji wun yíi màʼ a ŋgeʼ ye tavín e fòn kitu, e səʼsí a fon ŋkuuŋkùŋ, e laàr a wír fòn vee vilum adzə̀m fo wòŋ Isray, kìn dzə̀ kwàn, kìn dzə̀ wan wòŋ.

²²A wun woo NYÙY TÀR yíi yiì, é kfə́ə fòne lay á moo yé Jeroboam woo wan Nebat, e lày a sa moo yé Baasha woo wan Ahija bèy, bìʼ á fo á ŋaʼarin dòʼshwíiy və, e kfə̀n dòmsì a wír veé Isray, á wáa yiì vinyo ve bi ví.

²³Fo ké Jesebel ki, NYÙY TÀR wáa suúy a jii, ‹Jwí si wíy kfər a wun e Jesreel.

²⁴Jwí si wíy a kfər a wir dzə̀m woo Fòn Ahav kfəə wo wù kpuun é ŋkàlaʼ, é vilùŋŋgùrúʼ ví wáa sàʼ a ve á kpuun é kwaʼ.› »

²⁵Ké ru kí, wìr wùmòʼ yòʼ kfə̀n‑eè dzə̀ shó wo wù‑uù yiìn vinyo ve vi wáa bir NYÙY TÀR, e fiìnè kitú kfə́ moo Fòn Ahav. A kù‑uù domsì wíiy və wun.

²⁶Wù‑uù buʼtì vinyo ve ghaʼtín ví, ghvə́m anyùy kisaŋe, kù réŋréŋ mo wír veé Amori‑iì ghvə́me, wír veé Amor ve NYÙY TÀR‑iì jùmèn fó nsay, é bo wír veé Israyi nəə́, e dzə̀ʼə̀m fo.

²⁷Fòn Ahav yuúrí ntum Elija, e saàsì ndzə̀y sə́, e lò, e màʼ vinsàʼ ve ndzə̀y, e nèn a lèm jíŋ, a shiíy e vinsàʼ ve ndzə̀y ví wùn, a ghan mendzən mendzən.

²⁸NYÙY TÀR kfən sùŋnín e Elija woó Tishbe, e sùúy sho jii,

²⁹«À ku yòʼ yèn mo Ahav gbuùn ne mo á? Mo wù gbuùn ne mo ben, bo m yòʼ dzəə́ lò e màʼ ŋgeʼ e wun kfəə lèn, a wù dzə̀ə́ sho. M wíy màʼ, a sì é ghan se sí sáʼ wán və.»