Read Lamnso 1 Afòn 22 Bible Online

1 Afòn 22 - Lamnso bible

1 Afòn 22

¹Viyá vi nèn shaà vibaà, a bó Siiria wun Isray yoʼ kfə̀n màʼ rə́r.

²Wáa dzə e kiya ke kí‑iì meen ji taár, Fòn Jehoshafat woó Juda sə́y, e dù yèn Fòn Ahav woó Isray.

³Fòn Ahav yiì lò, e sùúy aàtǎr ntoʼ vəə́ jii, «Vèn kì ji Ramot‑Gilead dzə̀ á nsay yèsən, a vèn dzə́ dzəə́n, e làa yòʼ faàsì fo fòn woó Siiria ji ka?»

⁴Fòn Ahav nèn lò, e dzə̀r e Fòn Jehoshafat jii, «Wòsò yíi dù, e nəə́ rə́r é Ramot‑Gilead à?» Wù bìnèr e fòn woó Isray jii, «Aà fèn dzə̀ kibáʼtín, bo m dzə̀ kibáʼtín, a wír vém wùn à nyám se ŋkoʼ si dzə̀ kibáʼtín.»

⁵Fòn Jehoshafat nèn kfə̀n sùúy e fòn woó Isray jii, «Ku tòmbìy tàr o fo NYÙY TÀR.»

⁶Fòn woó Isray nèn tòóy aŋgàa si və́, aá dzə̀ moo wír ghii kweè bèy, e dzə̀r aáwune jii, «M nəə́ Ramot‑Gilead e rə́r sí moo ŋgáŋ á?» Á bìnèr ji fòn wàá nəə́. Fòn waà du, e tòn a áwune. NYÙY TÀR yíi dù, e way a Ramot‑Gilead e fòn kiwo.

⁷Fòn Jehoshafat dzə́r jii, «Ŋgaà ntum wo dzəə̀n wo NYÙY TÀR[19] yòʼ dzə̀ fen wo dzə̀ á tàr fó fo à?»

⁸Fòn woó Isray bìnèr jii, «Wùmòʼ dzə̀ wo dzə̀ á tàr fó fo, a dzə̀ Mikayia woo wan Imla. Yii bèy, m ban wun bìʼ fo wù yòʼ yii yoŋ kinyo ke juŋ ki kùm mo. Kù yii dzə́ ke bi kí ghán sidzə̀m.» Fòn Jehoshafat suúy ji lá fòn yòʼ a yòŋ a bèy.

⁹Á bèy, Fòn woó Isray nèn tòóy nshìylav rə yìmòʼ, e tùm ji yì du, e wìy a e Mikayia cércér.

¹⁰A Fòn Ahav woó Isray wùn Fòn Jehoshafat woó Juda kì dzə̀ʼə̀m ne aáwuné akàvàʼ e riimé wo wú dzəə̀n é shùu kày wo wú nəə e Samaria, aá máʼ ndzə̀y sé vifòn. Vé‑eè dzəʼə̀m fó bèy, é bo aŋgàa si fòne wiy, a fìʼ vinyo ve ví‑iì yíi a koóy e kwaʼ rər.

¹¹Wùmòʼ‑oò dzə̀ Tsədekiya woo wan Kenaana, a wù fér ne loŋ see kisha ki. Wù wáa suúy e Fòn Ahav ji NYÙY TÀR suuy a jii, «Á mo wù yíi sə̀r wír veé Siiria, e laàr áwune, aá wàá may.»

¹²Aŋgàa si adzə̀me kù‑uù suuy kinyo a dzə̀ kee shó ji fòn du á rə́r é Ramot‑Gilead, a wù du, é wù ton á fó, bìʼ fo NYÙY TÀR yíi way a fó e fòn kiwo.

¹³Nshìylav ye yì kì duùn, e tòóy Mikayia kì dù bey, e sùúy sho jii, «Leéy, e yèn mbà, aŋgàa sii yèn kinyo kimòʼón ji fòn du, e so a rə́r. Ku mùm ji jí sé si tárnín wùn à sév sí, áà kfən tòmrí tomrín.»

¹⁴Mikayia nèn sùúy jii, «Rúrú, mo NYÙY TÀR dzəə̀n shó, a dzə̀ m kù sùúy kinyo e fòn cáʼcáʼ, a dzə̀ ke NYÙY TÀR yòŋèn e mò.»

¹⁵Mikayia yiì wìy, fòn dzə́r jii, «Mikayia, vèr nəə́ Ramot‑Gilead e rə́r sí moo ŋgáŋ á?» Mikayia bìnèr jii, «Nyàr, á nəə́ á nəə́n. Á waà du, e tòn a fó. NYÙY TÀR kù yíi dù, e way a Ramot‑Gilead e fòn kiwo.»

¹⁶Yii bèy, Fòn Ahav suúy shó jii, «M wíy suŋnín e wò, e dù meé e le, ji à lóo suúy kinyo e mò, e NYÙY TǍR yir, à wàa suúy a dzə̀ ké ru kí.»

¹⁷Mikayia nèn sùúy lèn jii, «M yèn, a wír veé Israyi táʼrí áàgwan moo njiì woo là nshìy, a NYÙY TÀR suuy jii, ‹Wír vìne yòʼ kér kilìmbìy, bòŋ ji wìr mòʼón mòʼón wáa kfən e wun laʼ ji nyaáŋ.› »

¹⁸Fòn woó Isray nèn sùúy e Fòn Jehoshafat jii, «Bó m yoʼ lò sùúy e wò ji bó yòʼ dzə̀ Mikayia tiìsí ntum Nyùy, e sùúy kinyo ke juŋ ki kùm mo a? Kù yii dzə́ ke bi kí.»

¹⁹Mikayia nèn kfə̀n a suúy jii, «Fòn ku yuùrí a kinyo ke NYÙY TÀR. M kì yèn á NYÙY TÀR, a wù dzə́ e wun kàvàʼ, a nsheèlav sə́ sí tíy e wun ghaŋ, à fó koy ŋkoòvìi, à fo wó yìyí,

²⁰wù wáa ghay a ji sà fèn‑éè du la, e lèvtí Fòn Ahav, é wù nəə́ rə́r é Ramot‑Gilead, aá yúyrí á? Nshìylav yìmòʼ suuy kinyo, yìmòʼ sùúy ke sən kí.

²¹Kiyoy ki nen fəə̀, e tìím a e NYÙY TǍR si, e sùúy a jii, ‹M yíi dù, e levtí wun.›

²²NYÙY TÀR dzə́r á sho jii, ‹À yíi ghan e le, e bóo levtí wun.› Kiyoy kìy ki bínér á jii, ‹M yíi dù, e way kimboʼtì aàŋgàa si vəə́ shuù adzə̀m.› NYÙY TÀR biímé, e sùúy jii, ‹À yíi dù rú, e levtí. Dù ri, e yiì mo à suuyin.› »

²³Mikayia nén a màysì, a suúy jii, «NYÙY TÀR fèn kì wày á ne a dzə̀ kimboʼtì aàŋgàa si fòné shuù. NYÙY TÀR kì kàʼ wun woo fon, a dzə̀ á e ŋgeʼ.»

²⁴Tsədekiya woo wan Kenaana və̀y nèn kòʼtí e wìy, e sàn kindzəv e Mikayia bubúʼ, e dzə̀r shó jii, «Kiyoy ke NYÙY TÀR kí lò, e màʼtì mo moó le, e bó a suŋnín e wò?»

²⁵Mikayia bìnèr jii, «À wíy kiíy a dzə̀ é kishiíy ke à wíy nəə́, a laáy e wàn lav woo fó mvəə́mvəm.»

²⁶Fòn Ahav woó Isray nèn sùúy jii, «Vèn bám Mikayia, e dù sho, e fò e Joash woo wan ntoʼ wùn Amon wo wù sáʼ mvəmlaʼ.

²⁷Vèn du, vèn sùúy ji m yoŋ a jii, ‹Áwune wáy á jwè woo shoon e sháŋ, a fo kibán, é wù wáa lumrí lumrín, a no a dzə̀ mendzə́v é kitu wo, e dù meé mo mo‑óò kfə́n é bàm là kinyo.› »

²⁸Mikayia suúy jii, «A fòn lòo dzə, e dù, e kfə̀n é bàm kijuŋ, là kinyo, bo bó NYÙY TÀR yòʼ‑oò lò sùŋnín rú e mo.» Mikayia wáa dzə̀sì, a suúy jii, «Wìr dzə̀m səəm kinyo ke m suuy ki.»

²⁹Fòn Ahav woó Isray wùn Fòn Jehoshafat woó Juda nèn kòʼ é Ramot‑Gilead,

³⁰Fòn Ahav suúy e Fòn Jehoshafat jii, «M lo, e kuv wún, e màʼ ndzə̀y se sən sí, bó a dù rə́r. Yii bèy, à lo, e màʼ ké a dzə̀ ndzə̀y sé vifòn.» Á bèy, fòn woó Isray nèn kùv wún, e màʼ ndzə̀y se sən sí, e nèn dù rə́r.

³¹Wù wáa dù bèy, a fòn woó Siiria kì fò ne sáʼ aàmfòómé və́ vee nshòv sibaà e mtaár ve vé‑eè səŋ viténténé jii, «Vèn lóo màʼ rə́r, lá vèn yòʼ a ker shií e wìr wo terí, kìn wo kuʼùn. Vèn wáa ker shií a dzə̀ e fòn woó Isray.»

³²Amfòómé veé vitenténé yiì dù, e yèn Fòn Jehoshafat, e nèn a kwàʼtì jii, rúrú, və̀n dzə̀ á fon woó Isray. Áwune nèn bìnkìr ji á funèn a wun. Fòn Jehoshafat tóŋ kitávín,

³³áwune nèn yèn ji yòʼ dzə̀ á fon woó Isray, e yàr fó a nyoòrì wun.

³⁴Rə́r sí kú a màʼ, wìr wùmòʼ lò, e màʼ mvən máʼan e wírí mvəm, yí nèn koò fon woó Isray, e kù koò a dzə̀ fó bvə̀m fo kikúm kfə́ ké rər kí‑iì səyin, e tàtí sə̀là. Wù nèn sùúy e nsə̀ŋ və kitèntén jii, «Bìnèr kiténtén kí, e fə̀ə́r mo fó mvə̀m rə̀r, bìʼ fo m lemen ne.»

³⁵Rə́r sí‑iì tàvkír é kishiíy fóo fèy, Fòn Ahav kú a tiy e mvə̀m kitèntén fey, aá tóm wun tómén, a wù kiʼ wír veé Siiria. Ndzə lòo ji, wù nèn lày, a mensə́ me mè‑eè fəən fo wun kileemé mè‑eè lèém féyì, e sə̀ sár kitentén.

³⁶Shùy lòo nəə́, á fó sáʼ e vé rərí mvəm jii, «Wìr wáa dù e wun laʼ, é wìr wáa dù e wun wòŋ.»

³⁷Fòn‑eè lày bey, á nèn dù sho e Samaria, e lìtì fo,

³⁸e sù kiténtén é kisə̀m keé Samaria, jwí si wáa la mensə mvə, kù mo NYÙY TÀR‑iì suuyin. Ku kfə̀n a dzə fó fo asàkìi‑iì du, su wún.

³⁹Ké vinyò vímóʼ ví vee Fòn Ahav mvə̀m saʼ, à vinyo vidzə̀m ve wù‑uù yiìn ví, à ké ntoʼ ye wù‑uù bomen, e làʼtí sóŋ kitàm e wùn wó, à ké ŋkà se laʼ se wù‑uù bomen sí, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

⁴⁰Mo Fòn Ahav làyìn bey, Ahasiya woo wán və nèn yì vifon, a saʼ e wun ntaʼ.

⁴¹Jehoshafat woo wan Asa‑aà kèʼ, a saʼ Juda, a dzə̀ é kiya ke Fòn Ahav‑iì sí sáʼ Isray ji viyá vikweè.

⁴²Fòn Jehoshafat‑iì kèʼ, a saʼ vifon, a wù dzə̀ viyá nshòv sitàn e mtaár, e sàʼ viyá nshòv sitàn e mbaà, a wù dzə́ e Jerusalem. Yè wòv‑iì dzə̀ Asuba woo wan Shilhi.

⁴³Jehoshafat kù‑uù lì sáʼ a dzə̀ yé tàr wov Asa, là bar. Wù kù‑uù yii a dzə̀ vinyo vee réŋ ví e NYÙY TǍR si. Yii bèy, virə́ʼ vé anyùy vi‑iì gòʼ là ketì. Wíri nèn kù a dù, a yiì cu si, a tòn kiláy fó.

⁴⁴Fòn Jehoshafat‑iì lèm sá nyaáŋ wùn fòn woó Isray.

⁴⁵Ké vinyò vímóʼ ví vee Fòn Jehoshafat mvə̀m saʼ, à vitaáví ve wù‑uù kér vi, à rə́r se wù‑uù maʼ si, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

⁴⁶Wù‑uù laàr kibér ke vé kineŋ vee vikìy wùn à vee vilume adzə̀m, a dzə̀ ve vé‑eè rə́si e virə̀ʼ fo vé‑eè cu anyùy. Kù dzə̀ ve tàr wov Asa‑aà lòo yuyrí, á bér.

⁴⁷Fòn yòʼ‑oò dzə̀ é Edom e ghan sin, kù‑uù sáʼ wír wo fòn woó Juda‑aà shoʼon.

⁴⁸Fòn Jehoshafat‑iì fèr sá vikóŋ ve ví ghán e rìbà ndzə̀v ji ví wáa dù e Ofir, a wìy a e *kisha ke mbàm ke baar kí fó fo. Yii bèy, la ví yòʼ dù, bìʼ fo kinsəm ki‑iì lò, e sàʼtì, a ví dzə̀ə́ e Etsiyon‑Geber.

⁴⁹Wáa dzə e ghan fóo fèy, Fòn Ahasiya woo wan Fòn Ahav nèn a taŋ wùn Jehoshafat jii, wù ku biìmé a ji və́ vé kikoŋe ku tàtí a vé wun woo Jehoshafat, aá wáa ghan a ndzəv, Fòn Jehoshafat sháʼnín.

⁵⁰Fòn Johoshafat wìy lày, á lìtì wun aàtàr vəə́ ghaŋ e Ŋkàlaʼ Davir, Davir woo tàr à ràm yév. Wan və Jehoram nèn yì vifon, a saʼ e tàr wóv ntaʼ.

⁵¹Fòn Ahasayia woo wan Ahav‑iì kèʼ, a saʼ Isray e Samaria, a Fòn Jehoshafat sí sáʼ Juda ji kiyá nshòv saàmbà e ghvə̀m. Wun woo Ahasiya‑aà sàʼ Isray viyá vibaà.

⁵²Wù‑uù yii vinyo ve ví wáa bir NYÙY TÀR réŋréŋ mo tàr wov wùn yè wov‑iì yii, jumrì liì Jeroboam woo wan Nebat wo wù‑uù dòmsìn wír veé Isray, á wáa yiì vinyo ve bi ví.

⁵³Wù‑uù ghvə́m nyùy woo *Baal, cu wun, e nèn ŋàʼár dòʼshwiiy NYÙY TÀR woo Nyùy wìr veé Isray, kù réŋréŋ mo tàr wov‑iì yiìn.