Read Lamnso 1 Afòn 3 Bible Online

1 Afòn 3 - Lamnso bible

1 Afòn 3

¹Fòn Solomon nèn lò, e làáy e bǎm wiíy ji wun koó á viŋkar wùn Farao woo fon woó Ejiv, e nèn lì wan Farao ji wiíy. Wù lì bèy, e lèm a dzə̀ é Ŋkàlaʼ Davir. Wiíy ku nèn a dzə fo, e dù meé mo Solomon‑eè màysìn, e bàʼrì ntoʼ rə wùn à lav cù, e kfə̀n bòm kay ye yí kaarin Jerusalem.

²Yì‑iì dzə̀ é ghan fen, a wíri kù dzəə́ cu Nyùy e kiy se cù e virə̀ʼ jeéy jeéy, bìʼ fo á yòʼ‑oò ló ne bàʼrì lav cù ye á wáa cù NYÙY TÀR shó.

³Solomon‑eè koŋ NYÙY TÀR, jumrì ntir se tàr wov Davir, ghán e wun mbòv. Yii bèy, a wù kù‑uù cu sa Nyùy kfə̀n ton kiláy, a kù dzə̀ é virə̀ʼ vé cù vee jeéy jeéy viy.

⁴Fòn Solomon nèn wìy lò, e dù e Gibeon ji wun cu á Nyùy fo, bìʼ fo dzə̀ fó fo kíy cù wo kuʼùné‑eè dzəə̀n, e kù nèn a yiì cu fo, e dù meé kàŋ nsə̀kì.

⁵NYÙY TÀR nèn wìy fo Solomon wùn é Gibeon foo fèy, e sùŋnín e wun e njèm vitsə́ʼə́. Wù‑uù súŋnin suuy jii, «Yòŋ kifá ke à taʼ ji m fó wò ki.»

⁶Solomon bìnèr jii, «Wò‑oò din koŋ ye wiyí e tàr wor Davir woo ŋgaà lìm wò ghán sidzə̀m, bìʼ fo wù‑uù dzə́, ghán e wò mbòv shilív shimòʼón, yúnin wò, yii mo à taʼà. Lèn, aà kù dzəə́ du fo mbìy, din koŋ yé yee shooy e wun, mo à foon wun wán wo wù yí ntaʼ və, a saʼ wíri.

⁷NYÙY TÀR woo Nyùy wom, à kòʼór ne wánlè wò lìm e Davir woo tàr wór ntaʼ, a m kù dzə̀ə́ wán wo terí, a m yòʼ kì kinyo kée yiì.

⁸Wánlè wò lìm və̀ne e wír ve à tayiné mvəm, aá dzə̀ agháʼán, a yòʼ dzə̀ wìr tàŋ.

⁹Ku fò wánlè wò lìm a dzə̀ vifií ve wù wáa saʼ wír vé sho, a kiíy jeéyjeéy fó kinyò ke juŋ ki wùn à ke bi kí. Búŋ là bey, bo wìr wo dzə̀ wù sàʼ wír vé ve ghaʼán víne dzə̀ la?»

¹⁰Kí‑iì ghèén NYÙY TÀR féyì ji Solomon lòn a dzə̀ á vifií.

¹¹NYÙY TÀR nèn sùúy e wun jii, «Mo à lonen a dzə̀ vifií vé a tinén vinyo sho e dzəə yee réŋ, e làa yòʼ lon a dzə̀ dzəʼə̀m ye dáa, kìn vikuʼùy, kìn ji m yúyrí aŋgaà vé vibàn,

¹²bo mo‑óò fó kifá ke à lonen. M sí fó wò vifií ve à wáa kiíy jeéyjeey vinyò, kfə́ə ve wìr yòʼ‑oò yiì ne a ker, a wìr yòʼ wíy a ker.

¹³M kfə̀n‑éè fó wò kifá ke bó à yoʼ lò dzə̀r. M sí fó wò káv wùn à ghvə́me ye bó yòʼ dzə̀ fòn wùmòʼ wìy fìʼsìn vèn wun e wò ghan.

¹⁴Aà ghán e mǒ mbòv, yú sáʼ yém, kfə̀n yúnin nsər sém mo Davir woo tàr won‑eè yii, bo m wíy fo wò dzəʼə̀m ye dáa.»

¹⁵Solomon yiì lò e yuv, e nèn kìíy ji kì súŋnin a NYÙY TÀR e wun e njèm. Á bèy, wù nèn dù e Jerusalem, e tìím e mbìy ŋkùv mensàŋ NYÙY TÀR, e cù NYÙY TÀR e cu ye tonèné wùn à yé vibeèrìí, e nèn yiì ŋkàʼ fo wìr dzə̀m wo wù‑uù rə́si e ntoʼ.

¹⁶Wáa dzə e kishiíy kímóʼ kí, asàkì ámóʼó wìy abaà, e yèn Fòn Solomon.

¹⁷Wo mòʼón bùn fon, e sùúy jii, «Éè tàr wor, vèr wiíy və̀n yii shiiy lav e mòʼón. Mò‑oo dzəə́ wán lumèn e lav, a wiíy və̀n dzə̀ fó.

¹⁸Vishiíy ví lóo meé vitaár, wù dzəə́ sá və́ə woo wán lumèn. Kù‑uu dzə ver ver é lav, wìr wùmòʼ yòʼ kfə̀n‑ee dzə é lav, kù‑uu dzə vèr wun wír abaà.

¹⁹Yì‑ii lóo dzə vitsə́ʼə́, wiíy və̀n neém, e rə̀ʼə́y wán və, wù kpú.

²⁰Wù nèn‑ee lo é yuv e ntìntìn vitsə̀ʼə́, a m buúne, e lì wán wom fo mǒ ghaŋ, e dù neèr e wun kikun, e lì kimkpú kfə́ ké wan, e wày e mǒ koy.

²¹M bvəə́shi, e lò e yuv ji m fó a vín e wàn, e nèn yèn, a wàn kpú ne. M leéy wán kijuujùŋ, e yèn á ji bó yòʼ dzə̀ á wán wo mò‑oo dzəən.»

²²Wù wáa suúy bèy, wùmòʼ woo wiíy ku nèn shàʼnín jii, «Aày, wan wo tin dzə̀ wóom, a woo kimkpú dzə̀ wo.» Wiíy wo wù‑uù suŋnin mbìy suúy jii, «Wan woo kimkpú dzə̀ wo, a wo tin dzə̀ wóom.» Á kú a tiy, a bìʼ bèy e fòn si.

²³Fòn suúy jii, «Kày suuy ji wan wo tin dzə̀ wóom, a kimkpú ki dzə̀ ké, a kày suuy sa jii, ‹Aày kimkpú ke wan kí dzə̀ ké, a wóom dzə̀ wo tin.› »

²⁴Fòn nèn yòŋ ji á wiy á e nyùy rə̀r, e fò á e wun. Á nèn wìy sho, e fò e fòn.

²⁵Wù yòŋ ji á tóʼnín á wán vintóʼ vibaà, e fò á kintóʼ kímóʼ kí e wo mòʼón, e fò á kímóʼ kí e wùmòʼ.

²⁶Wiíy woo ŋgaà wàn wo tin yú bey, mendzən me wàn mè rə́r wun. Wù bùn fon jii, «Nyàr, lá á yòʼ à tòʼnín. Taàtá wom woo fon ku fò á wán wo tin e wiíy və̀sə.» Woo shooy ku shàʼnín jii, «Á yòʼ fó e mò, a bó á yòʼ fó e wò. Á tóʼnín toʼnín.»

²⁷Fòn nèn sùúy ji lá á yòʼ yùyrí a wán. Á fó á e wiíy mbìy. Dzə̀ á wun yeè wàn.

²⁸Wír veé Israyi yú mo Fòn Solomon tinen nsaʼ rə̀n, e nèn a ghvəm wun, bìʼ fo wìr dzə̀m‑eè yenen ji Nyùy fò wùn a vifií ve wù wáa tinén a nsaʼ réŋréŋ mo yì dzəə̀n.