Read Lamnso 1 Afòn 5 Bible Online

1 Afòn 5 - Lamnso bible

1 Afòn 5

¹Hiram woo fon woó Taya‑aà kòŋ Fòn Davir feyì. Wù wìy lò, e yù ji á yòʼ á ne Solomon woo wan Davir ji wù li á kirə́ʼ ké tàr wov, wù nèn tsə̀nsí nsheèlav sə́ fo Fòn Solomon wùn.

²Fòn Solomon nèn yòŋ ji áwune du, e tiìsí a e Fòn Hiram a jii,

³«Wù kì á ji yòʼ‑oò dzə̀ Davir woo tàr wov yù á fóo bàʼrì lav NYÙY TÀR woo Nyùy və, bìʼ rə́r se wù‑uù maʼ wùn aàŋgaà və́ vibàn ve vé‑eè kaarin wun, e tàrí. Wù‑uù maʼ bèy, kí ji NYÙY TÀR yíi yiì, é wun ton áwune adzə̀m, é bo á baʼri lav cù.

⁴Wáa dzə lèn, a NYÙY TÀR woo Nyùy wom fó ne mo rəsìn mbìv sidzə̀m, a m yòʼ dzəə́ kér aŋgàa vibàn, kìn wír ve á wáa nəə́ mo e rə́r sí,

⁵m nén a tàʼ lèn, e bàʼrì lav NYÙY TÀR woo Nyùy wom. Dzə̀ kíwun ke NYÙY TÀR‑iì yòŋèn tàr wor Davir, e sùúy jii, ‹Wìr wo wù wíy bàʼrì lav yem wíy a dzə wan wò wo m wíy koʼór, é wù li kirə́ʼ ké.›

⁶M nén a yòŋ lèn a ji wun woo Fòn Hiram fó á sáʼ, aá gwar á vicí vé *sidar fo Lebanon, e fò á e mò. Vé lìm vémé yíi tatí, a lìm wùn à vəə́, a m kù yíi a làʼ mbàm se vé lìm və́ á e shùu kav wo wù waà yíi fo. Wù kì á ji wír vémé yòʼ kì móo gwàr a vicí moo və́ vee wír veé Sidon.»

⁷Á dù, Fòn Hiram yú jí se Fòn Solomon sìy, wúné bòŋ wun feyì, wù yóŋ jii, «Búríi wáa dzə fo NYÙY TÀR é kishiíy ké lán ki. Wù fò ne Davir wán woo fií wo wù wáa saʼ kitúm ke ghaʼán kin.»

⁸Fòn Hiram nèn tsə̀nsí ntum e Fòn Solomon jii, «M dzə̀ a m yú ntum ye à tsənsin e mò. M dzə̀ kibáʼtín fóo yiì kinyo ke à yòŋèn, e fo vicí vé sidar wùn à vé dzəʼə̀y ví.

⁹Wír vémé yíi lì fo Lebanon, e səy sho e shùu rìbà ndzə̀v, e baʼtí, e tàŋsìn, e dòm e ndzəv, e dù sho fo à koŋè. Ví mee fo, é wír vémé nèn bvə̀tì, é wír vée wáa beʼ. Yé yee lim ye m leey wò shoo dzə̀ ji à wáa fo a vifá ve yi e wír vee mǒ ntoʼo.»

¹⁰Á bèy, Fòn Hiram fó vicí vé sidar wùn à vé dzəʼə̀y ví vidzə̀m ve Fòn Solomon‑eè taʼà.

¹¹Fòn Solomon nèn fò sáŋ yee *wit e Fòn Hiram vibam nsə̀kì mkweè (40,000)[2] ji vifá ve yi veé ntoʼ, e kfə̀n fò sá meŋgvə́r me *oliv mee rèéŋ tin si nsə̀kì mbaà (20,000).[3] Fòn Solomon ku nèn a fo bèy kiyá kidzə̀m.

¹²NYÙY TÀR‑iì lo fò Solomon vifií réŋréŋ mo wù‑uù kàʼàn. Nyaáŋ kfə́n a dzə e Fòn Solomon wùn Hiram nsàn, áwune vee abàá nèn lò, e gwàr *mensaŋ.

¹³Fòn Solomon fə́tí wíri nsə̀kì mtaár fo wòŋ Isray e dzə̀m, e kùr ji á wáa lìm a lím vitaavií,

¹⁴wù wáa tsənsí áwune é Lebanon, e ghan sí ghan sí, aàkáŋ aàkáŋ. Káŋ‑eè kér wír nsə̀kì ghvə̀m ve vé‑eè tsə́nsi e Lebanon e ŋwee ŋwee. Á du, lim lim ŋwee e fur, lóo kfən ji á wiy, e meèmè a fo laʼ ŋwee e baà, ámóʼó nèn a dù. Fòn‑eè lèm Adoniram ji wù wáa leéy a vé lìm vìn adzə̀m.

¹⁵Fòn Solomon kfə̀n‑eè kér vé lìm ve vé‑eè béʼ vifá wír nsə̀kì msaàmbà, kfə̀n kér wír ve vé‑eè sán tíy é virə̀ʼ vé agwan, nsə̀kì mwaamé.

¹⁶Wù lém vitú ve lìm kishóv ghii taár aànsə̀kìi ataár (3,300) á wáa leéy lim sìn.

¹⁷Fòn fó sáʼ, á sán tíy ye yí‑iì fàŋkìn, e kfə̀n bòŋkìr, e nèn bùʼ, e nàŋsín ji á wáy á kinsə̀ŋ ke lav cù sho.

¹⁸Aŋgàa kimbom Fòn Solomon wùn à vé Fòn Hiram, à wír ámóʼó ve vé‑eè loòn fó Gebali nèn a buʼ tíy, a naŋsín, e kfə̀n a naŋsín vicí ve á yíi a bàʼrì lav cù sho.