Read Lamnso 2 Afòn 1 Bible Online

2 Afòn 1 - Lamnso bible

2 Afòn 1

¹Fòn Ahav woó Isray‑iì lày, wír veé Moavi nèn kèʼ, a tav kitú fo wír veé Israyi.

²Wáa dzə e kishiíy kímóʼ kí, Fòn Ahasiya wáa dzə e wun kirəsí kee fó yuv é ntoʼ yeé Samaria, e nèn lò, e gbù fo shùu wundu, aá téʼ fó e shibáʼáy shí. Wù ku nèn a neŋ, ntoʼ wáa lùmkìr. Wù yiì lò, e tsə̀nsí vé ntume ji á du, e tàr a fo Baal‑Sebuv woo nyùy woó Ekron ji wun sà yíi bonén fo wun yàsí a?

³Nshìylav NYÙY TÀR nèn wìy, e yèn Elija woo wír woó Tishbe, e sùúy sho jii, «Dùu, e yèn aŋgàa ntum fòn woó Samariàa. Ku dzə̀r aáwune ji sà dzə̀ ji bó Nyùy yòʼ dzə̀ é Isray a, é bo áwune du ji á tar kinyo fo Baal‑Sebuv woo nyùy woó Ekron?

⁴A NYÙY TÀR suuy a ji fòn yòʼ dzəə́ yìi nànèn a fo kikun ké yàsí. Wù waà lo kar, e kù lày a làyìn.» Á bèy, Elija nèn dù.

⁵Aŋgàa ntum vìyi kfə́n é bàm, e yèn fon, wù dzə́r aáwune jii, «Kòóy ka lèn, é bo vèn wáa kfən e bàm?»

⁶Á nèn bìnèr e ntoʼ jii, «Vèr à wìr wùmòʼ waà kì tàrnín, wù suúy á e vèr jii, ‹Vèn kfə́n é bàm, e yèn fon wo wù tumen ven, e sùúy sho ji NYÙY TÀR dzə́r a ji bó Nyùy yòʼ sà dzə̀ é Isray a, é bo wù wáa tsənsí wíri ji á du, e tàr kinyo fo Baal‑Sebuv woo nyùy woó Ekron? A dzə̀ bey, bo wù yòʼ yíi nànèn a fo kikun ké yàsí. Wù yíi kar, e kù lày a làyìn.› »

⁷Fòn dzə́r aáwune jii, «Wìr wo vèn áwune kì tarnin, wù wáa taŋrí vinyo vìn e vèn dzə̀ kfə́ə wìr woó le?»

⁸Áwune bìnèr jii, «Wù kì màʼ á ndzə̀y, a sí dzə̀ á wuy wuy, a wù kúr á kikuúví e wun mentìntìn.» Fòn koóy ji bo dzə̀ á Elija woó Tishbe.

⁹Fòn nèn tsə̀nsí mfòómé wùn à wíri mtàn, ve wù‑uù wámé fo Elija wùn. Wù dù, e yèn Elija, a wù dzə́ fo nsay e kitu ke gwan, e sùúy sho jii, «Wìr Nyùy, fòn tooy wò ji à sə́y, e yèn á wun.»

¹⁰Elija bìnèr e mfòómé jii, «A m dzə̀ rú wir Nyùy, və́yí kù sə̀y fó yuv, e tòn wò vèn à wír vé vee mtàne.» Və́yí ku nèn sə̀y fó yuv, e tòn wun wùn à wír və́ vee mtàne, á kpúkír.

¹¹Fòn kfən tsə̀nsí mfòómé wùmòʼ wùn à və́ vee wíri sá mtàn. Wù kóʼ, e sùúy e Elija jii, «Wìr Nyùy, fòn tooy wò ji à sə́y, e yèn á wun cércér.»

¹²Elija ku bìnèr jii, «A m dzə̀ rú wir Nyùy, və́yí kù sə̀y fó yuv, e tòn wò vèn à wír vé vee mtàne.» Nyùy nèn tsə̀nsí və́y, wú sə́y fó yuv, e tòn wun wùn à wír və́ vee mtàne, á kpúkír.

¹³Fòn sii kfə̀n tsə̀nsí mfòómé wùmòʼ wùn à və́ vee wíri mtàn. Və̀n woo mfòómé wo wù‑uù meen ji taár dù kfə́ bey, e tsə̀m ndzəə́ e Elija si, e lòn wun jii, «Éè wìr Nyùy, kii wò, ku shàm ver, e bàvtí dzəʼə̀m yém wùn à yé aŋgàa lìm vém vee mtàne.

¹⁴Dzə̀ rú, və́yí dzə̀ a wú sə́y fó yuv, e tòn amfòómé vee abaà ve vé‑eè wìyìn mo fó mbìy, e kfə̀n tòn wír vév vee mtàn mtàn. Yii bèy, ku shàm mo, e bàvtí dzəʼə̀m yémé.»

¹⁵Nshìylav NYÙY TÀR nèn sùúy e Elija jii, «Vèn wun sə́y, lá à yòʼ a fàn wun.» Elija nèn ŋàʼáy, wùn wun sə́y, e dù, e yèn fon.

¹⁶Elija suúy e fòn jii, «NYÙY TÀR yoŋ a ji mo fòn tumen aŋgàa ntum ji á du, e tàr kinyo fo Baal‑Sebuv woo nyùy woó Ekron, kí bo fòn sà yèn ji bó Nyùy yòʼ dzə̀ é Isray wo dzə̀ wù tàr kinyo fo fo a? Bìʼ bey, bó fòn yòʼ dzəə́ yìi nànèn a fo kikun ké yàsí. Fòn kù sí yìi kar, e lày a làyìn.»

¹⁷Á bèy, Fòn Ahasiya nèn kù lày, mo NYÙY TÀR‑iì yòŋèn e Elija. Yii bèy, mo wù yòʼ‑oò kér wán, fər və[1] woo Jehoram nèn yì vifon, a saʼ e wun kirə̀ʼ, a Jehoram woo wan Jehoshafat woo fon woó Juda sí sáʼ Juda ji viyá vibaà.

¹⁸Ké vinyò vímóʼ ví vee Fòn Ahasiya mvə̀m saʼ, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.