Read Lamnso 2 Afòn 10 Bible Online

2 Afòn 10 - Lamnso bible

2 Afòn 10

¹Wón vee vilum vee Fòn Ahav ramé‑eè dzə̀ é Samaria msaàmbà. Jehu nèn lò, e sàŋ aŋwàʼ, e tsə̀nsí e vitú ve saʼ veé mvə̀mlaʼ yee Jesreel vi wùn aàtaàtaá, à wír ve vé‑eè leey fo wón Ahavi. Wù‑uù sàŋ jii,

²«Mo vèn kér kár se səŋ nyám si wùn à nyám se ŋkoʼ si, a vèn kfə̀n kér mvəmlaʼ ye á bomen kay, e kaàrí sho, kfə̀n siì kér vifá ve rər, a wón tàr wón lìme kfə̀n dzə̀ vèn áwune, a vèn yèn ŋwàʼ və̀n,

³vèn nèn kù lèéy wan tàr won wo wù bòŋèn, e kfə̀n ghèén ji njìlaʼ və, e kòʼór ji fon e tàr wóv ntaʼ, e nèn kù a fùnèn ji lav tàr won wáa tiy.»

⁴Áwune yú, e nèn a fàn e ŋàŋ, a suúy jii, «Mo bó afon vee abàá yòʼ‑oò lo neèr ndzə̀m rə é nsay, bo dzə̀ vèsən ghàn késən é le, e bóo neèr?»

⁵Á bèy, taà ntoʼ wo wù‑uù leey ntoʼ wùn à wo wù‑uù leey mvəmlaʼ nèn tàtí wùn aàtaàtaá, à nshèelav si, e tsə̀nsí ntum fo Jehu jii, «Vèr kù dzə̀ kér aŋgàa lìm vé, a vèr kù yíi a yiì kinyo kidzə̀m ke à suuy ji vèr wáa yiì. Yòʼ dzə̀ vèr kfə̀n kòʼór fon wùmòʼ. Á yiì kinyo ke kí gheenen wò ki.»

⁶Jehu nèn kfə̀n sàŋ ŋwàʼ fo áwune wo wú meen ji baà, a suúy jii, «A vèn fèn tíy rú e mǒ mbìv, a vèn kfə̀n dzə̀ rú kibáʼtín ji vèn yíi a yunín mo, vèn tìnrí ri vitú ve wón tàr won lìm vi, e wìy, e yèn mo shó e Jesreel kibvəə́shí é ghan sin.» Wón ntoʼ vee msaàmbà vìyi‑iì dzə́ e mvə̀mlaʼ wùn à wír ve kuʼkìné ve vé‑eè liy áwune.

⁷Mo ŋwàʼ və̀ne toon e wír ve kuʼkìné kiwo, á nèn kù tìnrí vitú ve won vee msaàmbà, e wàyrí e ŋkaà si, e tsə̀nsí e Jehu e Jesreel.

⁸Ŋgaà ntum dù, e fìʼtì e Jehu ji á wìy a ne e vitú ve wón ntoʼ vìy vi. Wù nèn sùúy ji á fúm á vikfə́r vibaà é shùu kày, é ví wáa neŋ fo, e dù meé mo ndzə yíi ran.

⁹Ndzə bvəə́shi ràn, Jehu fəə́, e tìím, e sùúy e wìr dzə̀m jii, «Kiwó kén kí yòʼ dzə̀ e tàr wor woo Fòn Joram kpu. Yì‑iì shòʼ mo e wun bàm, e yùyrí. Yii bèy, teè la vin?

¹⁰Vèn ku nèn a kiíy ji fo vinyò ve NYÙY TÀR‑iì suuyin kùm lav Ahav, bó kinyo kimòʼón ki yòʼ wíy tum a e nsay. NYÙY TÀR yiì ne kinyo kìn, a kù dzə̀ ke wù‑uù suuyin, e shaà fo *ŋgaà ntum və woo Elija.»

¹¹Jehu nèn yùyrí wír ve vé‑eè berin fo Ahav ram é Jesreel adzə̀m, e kfə̀n yùyrí wír Ahav ve tavkíné adzə̀m wùn à ŋkar sə́ sé tim sí, aàtàá cù vəə́. Wù ku yùyrí bèy, e dù mèé mo wìr Ahav e dzə̀m‑eè màyìn.

¹²Jehu nèn fəə̀, a dù e Samaria. Wù dù, e mèé e Bet‑Eked wo yì‑iì dzəə̀n kiláʼáy ké anshìy anjiì,

¹³wùn à wír ámóʼó tárnín fó, a dzə̀ kfə́ə Fòn Ahasiya woó Juda wo wù‑uù làyìn ne. Wù dzə́r aáwune jii, «Dzə̀ ven ala?» Á bìnèr jii, «Vèr dzə̀ wír vee kfə́ə Ahasiya, a vèr sə́y ji á shaʼti á wón ntoʼ wùn à wón yaà yeèfòne.»

¹⁴Jehu nèn sùúy ji á koórí á áwune atin. Á nèn kù koòrí áwune atin, e dù sho, e seèrí e ghaa bii é Bet‑Eked fèy. Áwune‑eè dzə̀ wír nshòv sibaà e mkweè, a wìr mòʼón yòʼ‑oò lo bèr.

¹⁵Jehu lò fo fo, e lòo dù, e tàrnín wùn Jehonadav woo wan Rekav, a wù wiy ji wùn wun wàá tárnín. Jehu shàʼtì wun, e dzə̀r shó jii, «Shilív shé shi tíy e mǒ wùn mo shém shí tíy e wò wùn á?» Jehonadav biímé ji nyàr, shí waà tíyí. Jehu nèn sùúy jii, «A kí dzə̀ bey, à ràmsì kiwó ké.» Wù ràmsì, Jehu nèn ghàr, e sə̀ŋ, e kòʼór e wun kar,

¹⁶e sùúy sho jii, «Wòsò wáa dù, áà yén shií wo m kér fo NYÙY TÀR.» Wùn Jehu nèn kù a dù e Jehu kar.

¹⁷Á meé é Samaria, Jehu nèn laàr kibér ke rám Ahav kidzə̀m. Wù kù‑uù laàr áwune réŋréŋ mo NYÙY TÀR‑iì suuyin ne, e shaà fo *ŋgaà ntum və woo Elija.

¹⁸Jehu nèn kùm wíri. Á kaárí, wù suúy aáwune jii, «Ahav‑iì cu nyùy woo *Baal fo tèr, a m yíi a cù kém, a shaà wun.

¹⁹Vèn jaŋri aŋgàa ntum nyùy woo Baali wùn à wír ve á cu wune, aàtàá cù vəə́ adzə̀m. Lá vèn yòʼ biìmé, é wìr goʼ é bàm bìʼ cu ye wiyí ye m yíi yiì fo nyùy woo Baal. Wìr wo wù dzəə̀n là wiy yòʼ yíi a dzə sho e tin.» Jehu wáa yòŋ bèy, a wù laarì sí yév láarin, e fíʼ laàr wír ve vé‑eè cu nyùy woo Baal.

²⁰Jehu nèn fò sáʼ ji á kaʼ á kishiíy ke á lo, e banén, e cù a nyùy woo Baal. Á nèn kàʼ.

²¹Wù nèn tsə̀nsí ntum woŋ Isray e dzə̀m. Wír ve vé‑eè cu nyùy woo Baali wìykìr, la wìr yòʼ gòʼ e bàm. Á wìy, e nə̀ə́ e lav ye á cu Baal sho, yì rún ji mbǐŋ.

²²Wù suúy e wìr wo wù‑uù leey kiŋkfə̀ ké ndzə̀y sé cù jii, «Fəə́r ndzə̀y sé cù si, e fò áàŋgàa cù Baali adzə̀m.» Á bèy, wù nèn kù fə̀ə́r ndzə̀y, e fò aáwune.

²³Jehu wùn Jehonadav woo wan Rekav nèn dù, e nə̀ə́ e lav ye á cu Baal sho. Jehu suúy e vé cù Baali jii, «Vèn kaʼay ó vitú vén ví ji kìn wìr wo wù yii cu NYÙY TÀR dzə̀ e věn mvəm. Kù kér fó a dzə wír ve á cu nyùy woo Baal cáʼcáʼ.»

²⁴Wùn Jehonadav nèn nə̀ə́, a yiì cu si, à se tonèn sí. A Jehu kì tìír ne wíri fó ndzə mwaamé, e yòŋ aáwune jii, «Vèn yùyrí wír vìne adzə̀m. A wìr màʼtì wír fo áwune wù nyéŋ, bo ŋgaàŋ kù lay kitú kfə́.»

²⁵Jehu màysì cu ye tonèné, e nèn fò vitaáví e wír ve vé‑eè shiy wune, wùn à e vé saʼa jii, «Vèn nəə́, e yùyrí áwune, e làa yòʼ biimé é wùmòʼ nyéŋ.» Á bèy, á nèn kù nə̀ə́, e gwàtì áwune e nyùy sév sé rər sí. Á gwàtì bèy, e tàyrí dzə́n sév, e cùúr fo ndzə, e nèn nə̀ə́ e Baal mvə̀m lav yee fó mvəə́mvəm,

²⁶e lì wúr se dzəə̀n sé nyùy woo Baal, e fəə̀ shó, e tòn.

²⁷Á kfən bvə̀ʼə́y sə́y ye vé‑eè tuuyin ji yé nyùy woo Baal, e sàʼ lav cù Baal, e siìr fó ji ŋkùy. A kù dzə̀ mo fóo dzə̀ə́, e wìy shem lán.

²⁸Á bèy, Jehu nèn laàr cu yee kùm nyùy woo Baal fo Isray.

²⁹Yii bèy, wù yòʼ‑oò lo bìn ndzə̀m é vinyò ve bi ví ve Jeroboam woo wan Nebat‑iì yii, kfə̀n domsì wír veé Isray, aá jáyí. Wù yòʼ‑oò lo shàʼàr wón nàʼ ve Jeroboam‑eè fèrìn e *kisha ke mbàm ke baar kí, e tìír wùmòʼ é Betel, e tìír wùmòʼ é Dan, wíri wáa dù, a cù.

³⁰NYÙY TÀR yiì lò, e sùúy e Jehu jii, «Mo à yiìn kijuŋ e mǒ si, e lòvtí e lav Ahav réŋréŋ mo kí dzəə̀n e mǒ shiliv, bo rám yée wíy a saʼ Isray, e dù, e meé ŋgwàʼ sikweè.»

³¹Yii bèy, la Jehu yòʼ fə̀m a mùm ji wun wáa ghar a nsər se NYÙY TÀR woo Nyùy wìr veé Isray shilív sə́ shidzə̀m. Wù yòʼ‑oò lo màʼtì vinyo ve bi ve Jeroboam‑eè yii, kfə̀n domsì wír veé Isray, aá yii.

³²Wáa dzə e ghan see shoon, NYÙY TÀR nèn kèʼ a fàr nsay Isray. Hasael woo fon woó Siiria wáa tòn Isray virə́ʼ vidzə̀m, a faàsì nsay.

³³Wù faàsì virə́ʼ vidzə̀m veé mbìv Jordan ye shùy yii tó fo fo, e sə̀y, e bàʼ e ŋkàlaʼ yee Aror e ghaa ndzəv yee Arnon, a dzə̀ ji nsay Gilead wùn à ye Bashan fo rám Gad wùn à yé Ruben, à yé Manassèe‑eè dzə́.

³⁴Ké vinyò vímóʼ ví vee Jehu mvə̀m saʼ, à vinyo vidzə̀m ve wù‑uù yiìn ví, à mo vitaáví və́ vidzə̀m vi‑iì dzəə̀n, á sàŋ é ŋwàʼ wo dzəə̀n Ŋwàʼ Vinyò ve Afòn veé Isray.

³⁵Jehu‑uù lày, á lìtì wun e Samaria. Jehoahas woo wán və nèn yì vifon, a saʼ e wun ntaʼ.

³⁶Jehu‑uù sàʼ wír veé Isray e Samaria kiyá nshòv waamé e mbaà.