Read Lamnso 2 Afòn 11 Bible Online

2 Afòn 11 - Lamnso bible

2 Afòn 11

¹Ataliya woo yìy à Fòn Ahasiya‑aà yèn ji á yùyrí a ne Fòn Ahasiya woo wán və, wù nèn lò, a yuyrí kfə́ə wón ntoʼ.

²Yii bèy, Jehosheba woo wan Fòn Jehoram,[12] a kfə̀n dzə̀ jemèr Ahasiya nèn shòŋ Joash woo wan Ahasiya fo wón ntoʼó mvəm, ve vé‑eè sí yìi yuyrí. Wù shóŋ, e nèn lìtì wùn liy və é mvə̀m lav kishìíy yìmòʼ. Á bèy, la Ataliya yòʼ dzəə yèn, e yùyrí.

³Wù nèn kù a lìr e lav cù, a Jehosheba leey fo fo e bǎm kiya ntuùfú, a Ataliya kù sáʼ woŋ.

⁴Wáa dzə e kiya kee ji saàmbà, Jehoyiada woo taà cù kùm amfòómé wìr ve vé‑eè shiy fon wùn à ntoʼo. Á wìy e NYÙY TǍR lav cù, wùn áwune nèn yiì kilìʼ fó. Á bèy, wù nèn dìn wan fòn aáwune.

⁵Wù yòŋ aáwune jii, «Kinyo ke vèn lo, e yiì lèn ki kìne. Ké ŋgoo wìr ye yì yíi wìy e shùu lìm e kishiíy ké bam, vèn javti áwune vilíŋ vitaár, é kilíŋ kímóʼ kí wáa shìy ntoʼ,

⁶é kímóʼ kí wáa tiy e shùu kày woo Sur, é kímóʼ kí wáa tiy e wír ve á shiy shúu kàyí bàm.[13]

⁷Ké ŋgoo see sibaà se sí yòʼ yii wiy lim e kishiíy ké bam, aá wáa tiy, a shìy lav cù, e fíʼ kìŋsìn fon.

⁸Vèn tiím, e kaàrí fon e vifá vén vé rər ví wo. Wìr lóo meʼ ven, vèn kù yùyrí yuyrín. Vèn wáa dzə e fòn ghaŋ, ǎ ghan se wù fəə́ e ndzə, ǎ ghan se wù nəə.»

⁹Amfòómeé yú kinyo ke Jehoyiada woo taà cù suuyin, a wìr wiy e wír və́ ve á kì yíi lò fo lìme, à ve á kì yíi wìy lim e kishiíy ké bame, wiy yén Jehoyiada sho.

¹⁰Jehoyiada nèn fò kòŋ sí[14] wùn aàŋkèe aàmfòómeé, a dzə̀ vifá ve yì‑iì dzəə̀n vé Fòn Davir mo vé‑eè lèmèn é lav cù.

¹¹Anshìyi tiím é mbìy lav cù fo kíy cùu‑uù dzəə̀n, e kèʼ fo mbìv yee tsə́n, e kfə̀n é mbìv yee kuy, e kaàrí fon e tàr, e vifá ve rər ví wo.

¹²Jehoyiada nèn fə̀ə́r wan ntoʼ woo Joash, e sòv ntáráʼ e wun kitu, e fò nsər se afòn e wun. Á nèn yòʼ wun, e bùn ji fon. Wíri búʼ wó, e bùn jii, «Nyùy ku fò fon dzəʼə̀m ye dáa.»

¹³Ataliya lò, e yù kiyor ke anshìy wùn à ké wíri kí, e nèn dù e lav cù, e yèn wíri fó,

¹⁴e lòo leéy, e yèn, a fòn tíy e wǔn kitom mo liì wòŋ‑eè dzəə̀n, aàmfòómé wùn à wír ve á tóŋ sóŋé tíy e fòn ghaŋ, a wír veé wòŋe yú vijuŋ, shéʼri, tóŋ sóŋ. Ataliya nèn saàsì ndzə̀y sə́, e tòŋ kitávín jii, «Wìr kpù ne lèn, wìr kpù ne lèn.»

¹⁵Jehoyiada woo taà cù yòŋ aàmfòómé ve vé‑eè wám vé rərí jii, «Vèn səŋ Ataliya, e fəə̀ shó fo anshìyí nsàn. A wìr lò a mùm ji wun sə́ wun, vèn kù gwàr gwàrìn e nyùy.» Wù‑uù yoŋ bèy, a wù kì sùúy ne ji lá á yòʼ yùyrí a Ataliya e NYÙY TǍR lav.

¹⁶Á bèy, á nèn sə̀ŋ wun, e dù sho e shùu kibùʼ ke nyám se ŋkoʼ si yii nəə fo fo e ntoʼ, e yùyrí fo.

¹⁷Taà cù woo Jehoyiada nèn tìír Fòn Joash wùn à wíri e NYÙY TǍR si, á gwàr *mensaŋ wùn à NYÙY TÀR ji áwune yíi a dzə a wír NYÙY TÀR. Wù kfən yiì sa fòn wùn à wíri gwàr mensaŋ.

¹⁸Á bèy, wìr dzə̀m woó wòŋ nèn dù, e sàʼày lav cù nyùy woo *Baal, e kètì kíy sə́ sé cù, e bvə̀ʼə́y vibámmbó vee nyùy woo Baal, e nèn yùyrí Mattan woo taà cu və é mbìy kiy se cù. Taà cù woo Jehoyiada nèn tìír anshìy, á wáa shìy lav cù NYÙY TÀR.

¹⁹Wù nèn lì amfòómé wùn à wír ve vé‑eè shiy fone, à ve vé‑eè shiy ntoʼo, à wìr dzə̀m woó wòŋ, á lì fon fo lav cù, a tsəəné, a səy sho e ntoʼ, e dù, e nə̀ə́ sho fo shuù woo wó anshìy. Fòn nèn dzə̀ʼə̀m e wun kàvàʼ.

²⁰Nyaáŋ wáa dzə e mvə̀mlaʼ mo vé‑eè yuyrin ne Ataliya e ntoʼ. Wír veé wòŋe wáa yu vijuŋ, a sheʼrí.

²¹Joash‑iì[15] dzə̀ kiyá saàmbà e ghan se wù‑uù kèʼèn, a saʼ vifon.