Read Lamnso 2 Afòn 12 Bible Online

2 Afòn 12 - Lamnso bible

2 Afòn 12

¹Joash‑iì kèʼ,[16] a saʼ ji fon woó Juda, a Jehu sí sáʼ Isray ji kiyá saàmbà. Joash‑iì sàʼ vifon kiyá mkweè, a wù dzə́ e Jerusalem. Yír yè woví‑iì dzə̀ Tsibia, a wù wíy fó Beersheba.

²Joash‑iì yii vinyo ve ví wáa gheén NYÙY TÀR, a wù kù‑uù yii bèy viyá vidzə̀m ve wù‑uù sáʼá, bìʼ fo Jehoyiada woo taà cù‑uù tír wun.

³Yii bèy, virə́ʼ vé anyùy vi kù‑uù dzə̀ə́ fo là laar, a wíri kù cu, ton kiláy fó.

⁴Joash lò, e tòóy atàá cù, e yòŋ aáwune jii, «Vèn báʼtí mbàm se á wiy sho ji cu yee NYÙY TǍR lavi, e lì sa mbàm se á sə́ ji sé kintaŋ, à se wìr mòʼón mòʼón kì kér fóo fo, à se wìr kòŋèn fo wun shiliv ji wun fó é lav cù si.

⁵Taà cù e mòʼón mòʼón ku sə̀ mbàm sìn fo wír ve á wiy, yén wune, aá ku lì, a naŋsín lav cù sho mo shií dzəə̀n. Á yén kifá ke dzə̀ á nàŋsín, aá náŋsín.»

⁶Yii bèy, wáa dzə ji kiyá nshòv sitaár e mbaà mo Joash‑iì koʼon é kàvàʼ, a bó atàá cùu yóʼ ne nàŋsín kirə́ʼ é lav cù.

⁷Á bèy, Fòn Joash nèn tòóy Jehoyiada woo taà cù wùn aàtàá cù ámóʼó, e dzə̀r aáwune jii, «Vèn tén fó a naŋsín virə́ʼ ve ví bír e lav cù ji ka? Kèʼ fo lèn, a dù, vèn yòʼ dzəə́ lò a lèm mbàm se vèn sə́. Vèn fó, aá wáa naŋsín virə́ʼ ve ví bírkir e lav cù sho.»

⁸Atàá cùu biímé ji áwune yòʼ dzəə́ lò a sə a mbàm fo wíri, a lèm, a bó yòʼ dzəə́ lò a naŋsín áwune á virə́ʼ ve ví birkin é lav cù.

⁹Á bèy, Jehoyiada woo taà cù nèn fèr ŋkùv, e tòʼ shuu e nsər wo, e tìír e ghaa kiy cù, e mbìv koy yìyí mo á du ji á nəə́ é lav cù. Atàá cù ve vé‑eè tíy e shuù wo wú nəə e lav cùu wáa sə mbàm se wíri wiy sho, a way e ŋkùv.

¹⁰Á yén, a mbàm si kúʼ ne e ŋkùv, bo ŋgaà saŋ woó ntoʼ wùn taà cù wo kuʼùn lo, e wìy, e taŋ mbàm se á kooyin e NYÙY TǍR lav cù, e kur e vibàm vibàm.

¹¹Á wáy mo sí dzəə̀n é ŋwàʼ, á nèn fò mbàm see shooy e wír ve á leey lim yee NYÙY TǍR lav cùu. Á nèn lì, a làʼ vé kintaa wùn à vé kimbome ve á lim e NYÙY TǍR lav cù sho,

¹²e kfə̀n a làʼ sa ve á bóm tíy, à ve á náŋsin tíy, búʼúu. Vé‑eè yùn sá vicí ve toʼón ví wùn à tíy ye á naŋsin ne, e bùʼ ji á náŋsín á lav cù NYÙY TÀR shó, e kfə̀n làʼ vifá vímóʼ ví ve kù‑uù dzəə̀n vé kibàʼrì ke lav cù ye vé‑eè taʼ ji yì kfə́n, a tiy a fo kijuŋ.

¹³Áwune yòʼ‑oò lo lì mbàm se vé‑eè wiy sho e lav cù, a jivír e vifa vee moo vighín vee *kisha ke mbàm ke fəvír kí wùn à vimfar ve á náŋsin akfə̀ə́ làm sho vi, à vikóŋ vi, à sóŋ sí, kìn vifá ve ker vímóʼ ví vee kisha ke mbàm ke baar kí, kìn vee ke fəvír kí.

¹⁴Vé‑eè laʼ a dzə̀ vé lìme shó, kfə̀n yún vifá vé a náŋsin lav cù sho.

¹⁵A bó á yòʼ‑oò ló a dzər ji wìr naari á mo á lim e mbàm si, bìʼ fo wír ve vé‑eè leey lim yee shooyi‑iì dzə̀ vé suuyruú.

¹⁶Ké mbàm se vé‑eè kooy fo cù ye yí tsəʼ njò, à se vé‑eè kooy fo cù ajayi, á yòʼ‑oò ló a way e ŋkùv. See shooy si‑iì dzə̀ sé atàá cù.

¹⁷Wáa dzə e ghan see shooy, Fòn Hasael woó Siiria kóʼ, e nə̀ə́ rə́r é Gat, e tòn fó, e nèn bìnkìr, e kìʼ Jerusalem ji wun sí nə́ə a rə́r fó.

¹⁸Joash woo fon woó Juda nèn lì vifá vee jeéy ví, vé atàr və́ vee Jehoshafat wùn Jehoram, à Ahasiya vee afon veé Judàa‑aà foon ji vé NYÙY TÀR, e kfə̀n lì sa ve wúnwun kitú kfə́‑əə̀ foon, e tàtí wùn à kisha ke mbàm ke baar kí kidzə̀m ke kí‑iì dzəə̀n é kitàv kee NYÙY TǍR lav cù, à keé ntoʼ ki, e tsə̀nsí e Fòn Hasael woó Siiria. Hasael nèn tsə̀ʼ vé rər və́, e làa yòʼ dzə́ə nəə́ Jerusalem e rə́r sí.

¹⁹Ké vinyò vímóʼ ví vee Fòn Joash mvə̀m saʼ, à vinyo vidzə̀m ve wù‑uù yiìn ví, á sàŋ é ŋwàʼ wo dzəə̀n Ŋwàʼ Vinyò ve Afòn veé Juda.

²⁰Atǎr ntoʼ Joashi‑iì nànèn, e kìʼ wun, e yùyrí e lav ye vé‑eè bomen é kitu ke kfə̀m woó Jerusalem, e dzəə ye yì sə́y e Silla.

²¹Atǎr ntoʼ ve vé‑eè yuyrin wune dzə̀ Josabad woo wan Shimeat wùn Jehosabad woo wan Shomer. Vé‑eè lìtì wun aàtàr vəə́ ghaŋ e Ŋkàlaʼ Davir. Amatsiya woo wán və nèn yì vifon, a saʼ e tàr wóv ntaʼ.